ករណីណាហ្គា៖ អ្នកសិទ្ធិមនុស្សជំរុញឲ្យភាគីពាក់ព័ន្ធងាកទៅរកការចរចាជាជាងការបន្តចាប់ខ្លួនអ្នកតវ៉ា
មន្ត្រីសិទ្ធិមនុស្សអំពាវនាវឲ្យភាគីពាក់ព័ន្ធវិលចូលតុចរចាឡើងវិញដើម្បីដោះស្រាយវិវាទការងាររាំរ៉ៃនៅក្រុមហ៊ុនកាស៊ីណូណាហ្គាវើល។ ការអំពាវនាវនេះធ្វើឡើង នៅពេលដែលសមត្ថកិច្ចបន្តចាប់ខ្លួនអ្នកតវ៉ាយ៉ាងហោចណាស់១៤នាក់បន្ថែមទៀត រួមទាំងស្ត្រីមានផ្ទៃពោះម្នាក់ផង ខណៈអ្នកតវ៉ាចំនួន៦នាក់ក្នុងចំណោម៩នាក់ត្រូវបានបញ្ជូនទៅកាន់តុលាការ។
ចុះផ្សាយនៅថ្ងៃ៖
ស្តាប់ - ០១:៥៦
នៅចំពោះមុខបញ្ហាវិវាទការងារដែលមិនទាន់មានដំណោះស្រាយនៅក្រុមហ៊ុនកាស៊ីណូណាហ្គាវើល ដែលអូសបន្លាយពេលជាង៨ខែមកនេះ លោក អំ សំអាត នាយករងអង្គការសិទ្ធិមនុស្សលីកាដូ បានលើកឡើងថា ច្រកចេញសម្រាប់វិវាទមួយនេះ គឺភាគីពាក់ព័ន្ធត្រូវវិលចូលតុចរចាសារជាថ្មី។
អ្នកការពារសិទ្ធិមនុស្សរូបនេះ ព្រមានថា ការបន្តចាប់ខ្លួនទៅលើក្រុមអ្នកតវ៉ាពីសំណាក់កម្លាំងសមត្ថកិច្ច ដោយប្រើយន្តការតុលាការមិនមែនជាដំណោះស្រាយល្អឡើយ។ ផ្ទុយទៅវិញ ការចាប់ខ្លួនអ្នកតវ៉ាបន្ថែមទៀតនេះ លោកថា នឹងធ្វើឲ្យមានរូបភាពមិនល្អដែលបង្ហាញពីការរំលោភសិទ្ធិសេរីភាព នៃការតវ៉ាដោយសន្តិវិធី។
សូមបញ្ជាក់ថា កាលពីថ្ងៃទី៣មករា កម្លាំងសមត្ថកិច្ចបានបន្តចាប់ខ្លួនអ្នកតវ៉ានៅមុខក្រុមហ៊ុនណាហ្គាវើល យ៉ាងហោចណាស់១៤នាក់បន្ថែមទៀត រួមទាំងស្ត្រីមានផ្ទៃពោះម្នាក់ផង ខណៈអ្នកតវ៉ាចំនួន៦នាក់ក្នុងចំណោម៩នាក់ត្រូវបានបញ្ជូនទៅកាន់តុលាការ។
នៅក្នុងសន្និសិទសារព័ត៌មាននៅព្រឹកថ្ងៃអង្គារ ស្នងការដ្ឋាននគរបាលរាជធានីភ្នំពេញ រួមជាមួយតំណាងអយ្យការអមសាលាដំបូងរាជធានីភ្នំពេញ បានបង្ហាញរូបភាព និងឯកសារភស្តុតាងមួយចំនួនដោយចោទប្រកាន់ថា ការតវ៉ារបស់បុគ្គលិកកាស៊ីណូមួយនេះគឺមានអ្នកញុះញង់ ទើបធ្វើឲ្យមានការប្រមូលផ្តុំតវ៉ាកើតឡើង។
តំណាងអយ្យការ បានសម្រេចចោទប្រកាន់ អ្នកតវ៉ាចំនួន៩នាក់ ពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម រួមមាន៖ កញ្ញា ឈឹម ស៊ីថរ ប្រធានសហីពប្រចាំកាស៊ីណូណាហ្គាវើល កញ្ញា ឈឹម សុខន អគ្គលេខាធិការសហជីពនេះ រួមទាំងសមាជិកនិងសកម្មជន៧នាក់ទៀត។ ប៉ុន្តែក្នុងចំណោមនោះ គឺមានអ្នកតវ៉ាចំនួន៦នាក់ដែលចាប់ខ្លួនបានកាលពីយប់ថ្ងៃទី៣១ខែធ្នូ ត្រូវបានបញ្ជូនទៅតុលាការ ខណៈ៣នាក់ទៀតដូចជា កញ្ញា ឈឹម ស៊ីថរ លោក សុខ ណារិទ្ធ និងលោក សុខ គង្គា កំពុងលាក់ខ្លួននៅទីកន្លែងដែលមានសុវត្ថិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ