ករណីចាប់ខ្លួនបុគ្គលិកណាហ្គា៖ប្រតិកម្មចម្រុះបន្តធ្លាក់មក ទាំងសង្គមស៊ីវិល និងអ្នកនយោបាយ
សេចក្តីថ្លែងការណ៍ថ្កោលទោសជារួម និងដាច់ដោយឡែកពីគ្នា នៅតែបន្តធ្លាក់មកជាបន្តបន្ទាប់ ទៅលើករណីចាប់ខ្លួនបុគ្គលិកដែលធ្វើការតវ៉ានៅមុខក្រុមហ៊ុនណាហ្គាវើល។ ទាំងក្រុមអង្គការសង្គមស៊ីវិល និងគណបក្សនយោបាយមួយចំនួន បានទទួចឲ្យដោះលែងមេដឹកនាំសហជីព និងសកម្មជនដែលត្រូវបានចាប់ខ្លួនជាង២០នាក់នោះ ដោយឥតលក្ខខណ្ឌ ហើយត្រូវវិលទៅរកការចរចារសាជាថ្មី ករណីបញ្ឈប់បុគ្គលិកជាង១ពាន់នាក់។
ចុះផ្សាយនៅថ្ងៃ៖
ស្តាប់ - ០២:២០
នៅក្នុងសេចក្តីថ្លែងការណ៍របស់អង្គការ សហជីព និងសហគមន៍ដីធ្លីចំនួន១១៩ ស្ថាប័នចេញនៅល្ងាចថ្ងៃទី៤ មករា ពួកគេសំដែងការខកចិត្តចំពោះវិធានការរបស់សមត្ថកិច្ចដែលចាប់ខ្លួនថ្នាក់ដឹកនាំសហជីព ប្រតិភូចរចា និងសកម្មជនសហជីពទ្រទ្រង់សិទ្ធិការងារបុគ្គលិកកម្មករខ្មែរនៅក្រុមហ៊ុនណាហ្គាវើល។ បុគ្គលិករបស់ក្រុមហ៊ុនកាស៊ីណូនេះបានធ្វើការតវ៉ាជាងកន្លះមកហើយ បន្ទាប់ពីមានការបញ្ឈប់បុគ្គលិកជាង១៣០០នាក់កាលពីជាង៨មុន។
ជាលទ្ធផលគឺមានមេដឹកនាំសហជីព គឺកញ្ញា ឈឹម ស៊ីថរ លោក សុខ ណារិទ្ធ លោក សុខ គង្គា និងកញ្ញា ឈឹម សុខន រួមទាំងសកម្មជនសហជីពសរុបទាំងអស់ជាង២០នាក់ត្រូវបានចាប់ខ្លួនជាបន្តបន្ទាប់ នៅគ្រាដែលបុគ្គលិករាប់រយនាក់នៅតែបន្តធ្វើការតវ៉ា។
មិនមែនមានតែក្រុមអង្គការសង្គមស៊ីវិលប៉ុណ្ណោះទេចេញសេចក្តីថ្លែងការណ៍ទទួចឲ្យដោះលែងដោយឥតលក្ខខណ្ឌលើមេដឹកនាំសហជីព និងសកម្មជនដែលត្រូវបានចាប់ខ្លួននោះ គឺក៏មានដែរគណបក្សនយោបាយនៅក្រៅរដ្ឋាភិបាល។
គណបក្សប្រជាធិបតេយ្យមូលដ្ឋាន បានថ្កោលទោសចំពោះការចាប់ខ្លួននេះ និងសំដែងការខកចិត្តចំពោះរដ្ឋាភិបាលដែលខកខានមិនបានបង្កលក្ខណៈឲ្យបុគ្គលិកក្រុមហ៊ុនណាហ្គាវើលធ្វើកូដកម្មទៅតាមច្បាប់។
គណបក្សនេះបានចាត់ទុកការចាប់ខ្លួនអ្នកតវ៉ាថាជាការអនុវត្តន៍យុទ្ធសាស្ត្រផ្លូវច្បាប់ពីសំណាក់រដ្ឋាភិបាលប្រឆាំងនឹងថ្នាក់ដឹកនាំសហជីព និងសកម្មជនសហជីព ហើយជំរុញឲ្យរដ្ឋាភិបាលទម្លាក់ចោលយុទ្ធសាស្ត្របែបនេះ ដោយដោះលែងអ្នកតវ៉ា។
ក្នុងន័យប្រហាក់ប្រហែលគ្នានេះដែរ អតីតគណបក្សសង្គ្រោះជាតិ ក្រៅពីថ្កោលទោសចំពោះការចាប់ខ្លួនបុគ្គលិកក្រុមហ៊ុនណាហ្គាវើល ដែលត្រូវបានបញ្ឈប់ពីការងារនោះ បក្សប្រឆាំងមួយនេះ អំពាវនាវឲ្យសហគមន៍អន្តរជាតិចូលរួមតាមដាន និងធ្វើអន្តរាគមន៍ ដាក់សម្ពាធលើរដ្ឋាភិបាលកម្ពុជា ដើម្បីងាកមកស្តារការអនុវត្តន៍សិទ្ធិមនុស្ស និងសិទ្ធិសំដែងតមិឲ្យបានពេញលេញស្របតាមរដ្ឋធម្មនុញ្ញ។
ប្រតិកម្មពីភាគីអន្តរជាតិវិញ ស្ថានទូតសហរដ្ឋអាមេរិកប្រចាំកម្ពុជាបានអះអាងថាខ្លួនបានតាមដានករណីណាហ្គាវើលយ៉ាងយកចិត្តទុកដាក់ ហើយជំរុញឲ្យអាជ្ញាធរកម្ពុជាត្រូវបានស្តាប់សំឡេងរបស់អ្នកតវ៉ា ដោយមិនត្រូវបំបិទសំឡេងក្នុងការប្រមូលផ្តុំគ្នា បញ្ចេញមតិនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ