ក្រសួងដែនដី សម្រេចអនុវត្តការត្រួតពិនិត្យគម្រោង និងគុណភាពសំណង់ មុនផ្តល់លិខិតអនុញ្ញាតសាងសង់
ក្រសួងដែនដី នគរូបនីយកម្ម និងសំណង់នៅថ្ងៃទី០៤ មករាម្សិលមិញ បានសម្រេចឱ្យអនុវត្តនូវការត្រួតពិនិត្យ និងបញ្ជាក់សំណង់ មុននឹងចាប់ផ្តើមធ្វើការសាងសង់នៅទូទាំងប្រទេស។ ការដាក់ឱ្យអនុវត្តនេះ គឺធ្វើឡើង ដើម្បីធានាបាននូវគុណភាព សន្តិសុខ សុវត្ថិភាពសំណង់ ការពារទ្រព្យសម្បត្តិ និងសុខុមាលភាពរបស់ម្ចាស់សំណង់ជាដើម។
ចុះផ្សាយនៅថ្ងៃ៖
ស្តាប់ - ០២:២៤
ចាប់ពីដើមខែមករា ឆ្នាំ២០២២ ក្រសួងដែនដី នឹងចាប់ផ្តើមអនុវត្តការត្រួតពិនិត្យគុណភាពសំណង់ និងការបញ្ជាក់គម្រោងប្លង់ស្ថាបត្យកម្ម និងគម្រោងប្លង់គ្រឿងផ្តុំសំណង់ មុននឹងសម្រេចចេញលិខិតអនុញ្ញាតឲ្យមានការសាងសង់ណាមួយដល់ ម្ចាស់សំណង់ អ្នកអភិវឌ្ឍអចលនវត្ថុ និងអ្នកអភិវឌ្ឍលំនៅឋានទាំងអស់ក្នុងប្រទេសកម្ពុជា។
បើតាម ក្រសួងដែនដី នគរូបនីយកម្ម និងសំណង់ អ្នកអភិវឌ្ឍលំនៅឋាន និងម្ចាស់សំណង់ទាំងអស់ ត្រូវតែរកអ្នកមានជំនាញវិជ្ជាជីវៈ ឬក្រុមហ៊ុនត្រួតពិនិត្យនិងបញ្ជាក់សំណង់ណា ដែលមានអាជ្ញាបណ្ណផ្តល់ដោយក្រសួងផ្ទាល់ ដើម្បីធ្វើការត្រួតពិនិត្យ និងចេញលិខិតបញ្ជាក់អនុលោមភាពនៃគម្រោងប្លង់ ការងារសាងសង់ ឬរុះរើ តាមបទប្បញ្ញត្តិបច្ចេកទេសសំណង់ និងបទប្បញ្ញត្តិជាធរមានដទៃទៀត មុននឹងធ្វើការដាក់ពាក្យស្នើសុំលិខិតអនុញ្ញាតសាងសង់ឬរុះរើ ក៏ដូចជាលិខិតអនុញ្ញាតជួសជុល លិខិតអនុញ្ញាតបើកការដ្ឋានសំណង់ និងវិញ្ញាបនបត្រប្រើប្រាស់សំណង់ជាដើម។
បន្ថែមពីនេះ ក្រសួងដែនដីកំណត់ថា គ្រប់គម្រោងសំណង់ដែលជាកម្មសិទ្ធរបស់រដ្ឋ គឺត្រូវតែទទួលបានការត្រួតពិនិត្យពីក្រុមការងារជំនាញរបស់ក្រសួងផ្ទាល់មុននឹងទទួលបានលិខិតអនុញ្ញាតសាងសង់។
ជុំវិញការដាក់ឱ្យអនុវត្តការត្រួតពិនិត្យនិងបញ្ជាក់សំណង់នេះ លោក សេង ឡូត អ្នកនាំពាក្យក្រសួងដែនដី នគរូបនីយកម្ម និងសំណង់បានបញ្ជាក់ប្រាប់វិទ្យុបារាំងអន្តរជាតិនៅព្រឹកថ្ងៃទី០៥ មករាថា វិស័យសំណង់ អចលនទ្រព្យនៅក្នុងប្រទេសកម្ពុជា កំពុងរីកដុះដាលខ្លាំង ទាំងគម្រោងសាងសង់ធំៗ និងតូចៗ ដែលទិដ្ឋភាពបែបនេះត្រូវ តម្រូវឱ្យផ្សារភ្ជាប់គ្នាជាមួយនឹងការពង្រឹងលើផ្នែកអនុវត្តបទដ្ឋានគតិយុត្ត និងបទដ្ឋានបច្ចេកទេសឱ្យបានម៉ត់ច្មត់ និងច្បាស់លាស់។
លោក សេង ឡូត បន្តថា ការបញ្ជាក់សំណង់នេះ គឺអនុវត្តទៅលើគ្រប់ប្រភេទសំណង់ទាំងអស់។ ប៉ុន្តែជាកាតព្វកិច្ចដែលត្រូវឆ្លងកាត់ការត្រួតពិនិត្យសំណង់ គឺរាល់ប្រភេទសំណង់ណាដែលមានផ្ទៃក្រឡាចាប់ពី៥០០ម៉ែត្រការ៉េឡើងទៅ។ និងគម្រោងសំណង់ដែលមានផ្ទៃក្រឡាក្រោម៥០០ម៉ែត្រការ៉េ នឹងមិនតម្រូវឱ្យឆ្លងកាត់ការត្រួតពិនិត្យបច្ចេកទេស និងបញ្ជាក់សំណង់នោះទេ។
បើតាម អ្នកនាំពាក្យរូបនេះ ការអនុវត្តរបស់ក្រសួងដែនដី គឺមានគោលដៅពង្រឹងការអនុវត្ត និងគិតគូរឱ្យបានកាន់តែប្រសើរឡើងនូវលក្ខណៈបច្ចេកទេសសំណង់ ជាពិសេសធានាបាននូវសុវត្ថិភាព សោភណ្ឌ័ភាព និងសណ្តាប់ធ្នាប់សាធារណៈ រួមទាំងគិតគូរអំពីបញ្ហាបរិស្ថានផងដែរ។
តែយ៉ាងណា លោក សេង ឡូត លើកឡើងថា ក្នុងករណីម្ចាស់សំណង់មិនបានអនុវត្តតាមបទបញ្ជានោះទេ អាជ្ញាធរនឹងចាត់វិធានការតាមច្បាប់ និងមិនចេញលិខិតអនុញ្ញាតសាងសង់ឱ្យនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ