អ្នកជំនាញអង្គការសហប្រជាជាតិ៖ការចាប់ខ្លួនអ្នកតវ៉ានៅក្រុមហ៊ុនណាហ្គាវើល បង្កការព្រួយបារម្ភដល់ការបោះឆ្នោត
ប្រតិកម្មពីមជ្ឈដ្ឋាននានា ទាំងជាតិ និងអន្តរជាតិ បានបន្តស្រោចទៅលើអាជ្ញាធរកម្ពុជាបន្ថែមទៀត ខណៈតុលាការសម្រេចឃុំខ្លួន កញ្ញា ឈឹម ស៊ីថរ មេដឹកនាំសហជីពប្រចាំក្រុមហ៊ុនណាហ្គាវើល និងការចាប់ឃុំខ្លួនសកម្មជនជាង២០នាក់ទៀត។ ហួសពីវិវាទការងារ ចំណាត់ការប្រឆាំងលើមេដឹកនាំសហជីពនៅពេលនេះ បង្កើតការព្រួយបារម្ភដល់អ្នកជំនាញសិទ្ធិមនុស្សនៃអង្គការសហប្រជាជាតិ ខណៈការបោះឆ្នោតនឹងខិតជិតដល់មក។
ចុះផ្សាយនៅថ្ងៃ៖
ស្តាប់ - ០២:១៥
ជាមួយនឹងការថ្កោលទោស នៃការចាប់ខ្លួនអ្នកតវ៉ាទាំងនោះ ក្រុមអ្នកជំនាញបានហៅចំណាត់ការប្រឆាំងនឹងក្រុមអ្នកតវ៉ាសិទ្ធិការងារនៅក្រុមហ៊ុនណាហ្គាវើល ថាបង្កឲ្យមានការព្រួយបារម្ភជាពិសេស នៅពេលដែលប្រទេសកម្ពុជាកំពុងត្រៀមរៀបចំការបោះឆ្នោតឃុំ-សង្កាត់នៅឆ្នាំ២០២២នេះ និងការបោះឆ្នោតជាតិនៅឆ្នាំក្រោយ។ នេះបើយោងទៅតាមសេចក្តីថ្លែងការណ៏របស់ក្រុមអ្នកជំនាញសិទ្ធិមនុស្សនៃអង្គការសហប្រជាជាតិដែលធ្លាក់ស្រោចមកបន្ថែមនៅថ្ងៃទី៥មករា។
ក្រុមអ្នកជំនាញសិទ្ធិមនុស្សបានហៅចំណាត់ការទៅលើមេដឹកនាំសហជីពនៅពេលថា ជាករណីរំលោភបំពានលើច្បាប់សិទ្ធិមនុស្ស ដែលបានធ្វើឡើងតាំងពីលើកដំបូងនៅយប់មុនឆ្លងចូលឆ្នាំថ្មី ឆ្នាំសាកល២០២២ និងនៅពេលមានព្រឹត្តិការណ៍ជាច្រើនផ្សេងទៀតដែលគេបានបង្វែរការចំណាប់អារម្មណ៍របស់សាធារណជន។ ករណីទាំងនេះត្រូវបានគេមើលឃើញថា ជាមធ្យោបាយមិនសមរម្យមួយក្នុងការរឹតត្បិតសិទ្ធិមនុស្ស។
សកម្មភាពភាពទាំងនេះ ត្រូវបានអ្នកជំនាញសិទ្ធិមនុស្សចាត់ទុកថា ជាការអនុវត្តផ្ទុយពីរដ្ឋធម្មនុញ្ញកម្ពុជា ដែលបានចែងច្បាស់អំពីសិទ្ធិធ្វើកូដកម្ម និងសិទ្ធិសេរីភាពក្នុងការបង្កើតសមាគម ការបញ្ចេញមតិ ការប្រមូលផ្តុំដោយសន្តិវិធី សេរីភាពសារព័ត៌មាន និងបោះពុម្ពផ្សាយ ព្រមទាំងផ្ទុយពីមាត្រា៣១៩ នៃច្បាប់ស្តីពីការងារកម្ពុជា ដែលបានធានានូវសិទ្ធិធ្វើកូដកម្មផងដែរ។
ជាការកត់សំគាល់ ប្រតិកម្មរបស់ក្រុមអ្នកជំនាញសិទ្ធិមនុស្សទាំងនេះបានកើតមានដូចគ្នានឹងប្រតិកម្មរបស់បណ្តាអង្គការសង្គមស៊ីវិលនៅក្នុងស្រុក និងបណ្តាស្ថានទូតធំៗនៅកម្ពុជាដូចជា ស្ថានទូតអាមេរិក អូស្ត្រាលី និងមន្ត្រីទូតកាណាដា។
សូមជម្រាបថា ប្រតិកម្មទាំងនេះក៏កើតចំពេលដែល តុលាការក្រុងភ្នំពេញ សម្រេចឃុំខ្លួន កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិបុគ្គលិកកម្មករខ្មែរនៃក្រុមហ៊ុនណាហ្គាវើល និងលោកសុខ ណារិទ្ធិ ខណៈលោកសុខ គង្គា ត្រូវបានដាក់ឲ្យនៅក្រោមការត្រួតពិនិត្យរបស់តុលាការ។
ចំណែកសមាជិកសហជីពចំនួន៦នាក់ដែលចាប់ខ្លួនបានមុនគេនៅយប់ថ្ងៃទី៣១ធ្នូនោះ ត្រូវបានតុលាការឃុំខ្លួនពីបទ«ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ដូចគ្នានឹងមេដឹកនាំសហជីព២នាក់ដែលតុលាការសម្រេចឃុំខ្លួននៅថ្ងៃទី៥មករានេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ