កម្ពុជា ប្តេជ្ញាបង្ក្រាបបទល្មើសតាមព្រំដែនគ្រប់ប្រភេទ ជាមួយវៀតណាមនិងឡាវ ដើម្បីរក្សាសន្តិសុខក្នុងតំបន់
កម្ពុជានៅថ្ងៃទី០៥ មករាបានអះអាងថា នឹងបន្តប្តេជ្ញាបង្រ្កាបបទល្មើសគ្រប់ប្រភេទនៅតាមបន្ទាត់ព្រំដែន ជាពិសេសបទល្មើសពាក់ព័ន្ធនឹងគ្រឿងញៀន ការជួញដូរមនុស្ស និងបញ្ហាសំខាន់ៗមួយចំនួនទៀតជាមួយប្រទេសឡាវ និងប្រទេសវៀតណាម។ ការប្តេជ្ញានេះ ធ្វើឡើងក្នុងជំនួបកិច្ចប្រជុំថ្នាក់រដ្ឋមន្ត្រី កម្ពុជា ឡាវ និងវៀតណាមលើកទី៣ កាលពីម្សិលមិញ។
ចុះផ្សាយនៅថ្ងៃ៖
ស្តាប់ - ០២:០៩
យោងតាមសេចក្តីប្រកាសព័ត៌មានរបស់ក្រសួងមហាផ្ទៃកម្ពុជា ភាគីទាំងបី នឹងត្រូវផ្តោតលើការងារសំខាន់ៗមួយចំនួន រួមមានជាអាទិ៍៖ ការបន្តពង្រឹងកិច្ចសហប្រតិបត្តិការសន្តិសុខទ្វេភាគី និងត្រីភាគី ក៏ដូចជា បង្រា្កបនូវបទល្មើសគ្រប់ប្រភេទឆ្លងកាត់ព្រំដែន ជាពិសេសបទល្មើសពាក់ព័ន្ធគ្រឿងញៀន ការជួញដូរមនុស្ស ការរត់ពន្ធមនុស្ស អំពើភេរវកម្ម និងបទល្មើសបច្ចេកវិទ្យា ដើម្បីធានាបាននូវសណ្តាប់ធ្នាប់ និងសុវត្ថិភាពសង្គម។
បន្ថែមពីនេះ ប្រទេសទាំងបី នឹងបន្តដោះស្រាយបញ្ហាជំងឺកូវីដ១៩ និងបញ្ហាគ្រោះធម្មជាតិនៅតាមបណ្តាខេត្តជាប់ព្រំដែន និងធានានូវសុវត្ថិភាព និងទ្រព្យសម្បត្តិរបស់ពលរដ្ឋស្ថិតក្នុងតំបន់រងផលប៉ះពាល់។ ក្នុងនោះ ការពង្រឹងកិច្ចសហប្រតិបត្តិការទាំងក្នុងវេទិកាថ្នាក់តំបន់ និងអន្តរជាតិ រួមទាំងកម្ពុជាធ្វើជាប្រធានអាស៊ានឆ្នាំ២០២២ និងព្រឹត្តិការណ៍ជាតិ-អន្តរជាតិធំៗដែលប្រទេសក្នុងតំបន់ត្រូវរៀបចំ និងធ្វើជាម្ចាស់ផ្ទះ ក៏ត្រូវអនុវត្តផងដែរ។
ជាក់ស្តែង កម្ពុជានិងដៃគូសហប្រតិបត្តិការពីរប្រទេសខាងដើម ក៏នឹងជំរុញឱ្យអាជ្ញាធរខេត្តជាប់ព្រំដែន ត្រូវបន្តរក្សាការជួបប្រជុំគ្នាជាទៀងទាត់ ដើម្បីផ្លាស់ប្តូរព័ត៌មាន និងដោះស្រាយនូវឧប្បត្តិហេតុនានាដែលកើតមានឡើងនៅតាមព្រំដែន ក៏ដូចជា ជំរុញឱ្យមានការធ្វើទស្សនកិច្ចផ្សេងៗ ក្នុងចំណោមអាជ្ញាធរមូលនៅតាមតំបន់ព្រំដែនរវាងប្រទេសទាំងបី។
ជុំវិញការពង្រឹងកិច្ចសហប្រតិបត្តិការលើការបង្ក្រាបបទល្មើសគ្រឿងញៀនរវាងភាគីទាំងបី បើតាមរបាយការណ៍ពីអគ្គស្នងការនគរបាលជាតិនៃក្រសួងមហាផ្ទៃកម្ពុជា ក្នុងឆ្នាំ២០២១ សមត្ថកិច្ចបានបង្ក្រាបគ្រឿងញៀនក្នុងប្រទេសបានសរុបជាង៦ពាន់ករណី ដោយឃាត់ខ្លួនមនុស្សបានចំនួនជាង១៣៧០០នាក់ និងរឹបអូសគ្រឿងញៀនបានជាង ៤,៥តោន។
របាយការណ៍ដដែលបានបន្តថា ចំនួនករណី និងជនល្មើសពាក់ព័ន្ធនឹងគ្រឿងញៀនមានការថយចុះ ក្នុងឆ្នាំ២០២១ តែបរិមាណគ្រឿងញៀនដែលរឹបអូសបាន មានការកើនឡើងធៀបទៅនឹងឆ្នាំមុន ពោលគឺនៅឆ្នាំ២០២០ ករណីបង្ក្រាបមានចំនួនជាង១ម៉ឺនករណី និងចំនួនជនល្មើសដែលសមត្ថកិច្ចចាប់ឃាត់ខ្លួនមានជាង ២ម៉ឺននាក់ ខណៈបរិមាណគ្រឿងញៀនមានត្រឹមជាង៣លតោនប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ