ក្រសួងការងារបើកការចរចាជាថ្មីករណីបុគ្គលិកកាស៊ីណូណាហ្គាវើលដ៍ តែសហជីពគ្មានរំពឹងលទ្ធផលផ្លែផ្កា
ក្រសួងការងារអំពាវនាវឱ្យបុគ្គលិកក្រុមហ៊ុនកាស៊ីណូណាហ្គាវើលដ៍ដែលកំពុងធ្វើកូដកម្ម ចូលតុចរចាសារជាថ្មី ចាប់ពីថ្ងៃទី៧មករាដើម្បីពិនិត្យផ្ទៀងផ្ទាត់លើប្រាក់បំណាច់កិច្ចសន្យា ដើម្បីឈានទៅបិទបញ្ចប់ករណីវិវាទការងារ ដែលឈានដល់ការចាប់ខ្លួនមេដឹកនាំសហជីពដែលធ្វើការតវ៉ាកន្លងមកនេះ។ ប៉ុន្តែពីខាងភាគីសហជីពវិញ អះអាងថា ការចរចារនេះនឹងមិនមានលទ្ធផលជាផ្លែផ្កានោះទេ ពីព្រោះ មេដឹកនាំសហជីពជាច្រើននាក់ត្រូវបានចាប់ខ្លួនទៅហើយ។
ចុះផ្សាយនៅថ្ងៃ៖
ស្តាប់ - ០២:២៥
នេះគឺជាការអំពាវនាវលើកទី៧របស់ក្រសួងការងារ ដែលស្នើឱ្យបុគ្គលិកក្រុមហ៊ុនកាស៊ីណូណាហ្គាវើលដ៍ ចូលតុចរចារដើម្បីពិភាក្សាគ្នា ស្វែងរកដោះស្រាយជុំវិញបញ្ហាវិវាទការងារ។ វិវាទការងារដែលអូសបន្លាយជាង៨ខែមកនេះបានញាំងឲ្យមានការតវ៉ាពីសំណាក់បុគ្គលិករាប់រយនាក់ ហើយបានឈានទៅដល់ការចាប់ឃុំខ្លួនមេដឹកនាំ និងសកម្មជនសហជីពចំនួន៨នាក់ នៅក្នុងចំណោមអ្នកតវ៉ាជាង២០នាក់ដែលត្រូវបានចាប់ខ្លួនជាបន្តបន្ទាប់ តាំងពីថ្ងៃទី៣១ធ្នូ។
បើតាមក្រសួងការងារ ការចរចាជាថ្មីនេះ គឺពិនិត្យលើប្រាក់ឈ្នូលខែចុងក្រោយដែលមិនទាន់បានបើក ស្របតាមមាត្រា១១៦នៃច្បាប់ការងារ ការពិនិត្យលើប្រាក់បំណាច់ទូទាត់ជួសការឱ្យដំណឹងមុន ក្នុងករណីដែលនិយោជកមិនបានជូនដំណឹងមុនតាមច្បាប់កំណត់ ស្របតាមមាត្រា៧៥ និង៧៧ ផ្ទៀងផ្ទាត់ទៅលើប្រាក់បំណាច់ជួសការឈប់សម្រាកប្រចាំឆ្នាំដែលនៅសល់ អនុលោមតាមមាត្រា១៦៦ និងមាត្រា១៦៧ និងពិនិត្យលើប្រាក់រំលឹកប្រាក់បំណាច់អតីតភាពការងារ និងប្រាក់បំណាច់អតីតភាពការងារថ្មីក្នុងឆ្នាំ ដែលមិនទាន់បានទូទាត់ស្របតាមមាត្រា៨៩ថ្មី។
តែយ៉ាងណា ប្រធានសម្ព័ន្ធសហជីពកម្ពុជា លោកស្រី យ៉ាង សោភ័ណ្ឌ បានថ្លែងថា ដើម្បីឱ្យដំណើរការចរចារមានប្រសិទ្ធភាពនិងមានផ្លែផ្កា លុះត្រាតែអាជ្ញាធរដោះលែងថ្នាក់ដឹកនាំសហជីពទាំងអស់មកវិញ។
បើតាម លោកស្រី យ៉ាងសោភ័ណ្ឌ ការប្រកាសធ្វើការចរចា ក្រោយពីការចាប់ខ្លួនមេដឹកនាំសហជីពបែបនេះ គឺគ្រាន់តែបង្ហាញពីរូបភាពថាក្រសួងបានយកចិត្តទុកដាក់ដោះស្រាយដែរ តែលោកស្រីមិនរំពឹងថាមានលទ្ធផលជាផ្លែផ្កានោះឡើយ។
ជាការកត់សម្គាល់ កាលពីថ្ងៃទី០៦ មករា អតីតបុគ្គលិកក្រុមហ៊ុនកាស៊ីណូណាហ្គាវើលដ៍មួយរូប គឺលោក សុខ គង្គា ដែលទើបតែតុលាការអនុញ្ញាតឱ្យនៅក្រៅឃុំបណ្តោះអាសន្ន បានចេញមកអំពាវនាវតាមប្រព័ន្ធផ្សព្វផ្សាយសង្គម ដោយស្នើឱ្យអតីតបុគ្គលិក ដែលកំពុងធ្វើកូដកម្ម ងាកមកចូលតុចរចារជាមួយក្រុមហ៊ុន តាមរយៈក្រសួងការងារ ដើម្បីរកចំណុចឈ្នះរួម និងបិទបញ្ចប់ករណីវិវាទនេះ និងដើម្បីទទួលបានផលប្រយោជន៍ស្របច្បាប់ទាំងអស់គ្នា។
សូមជម្រាបថា រហូតមកទល់ពេលនេះ តុលាការបានសម្រេចឃុំខ្លួនមេដឹកនាំសហជីព និងបុគ្គលិកក្រុមហ៊ុនកាស៊ីណូហ្គាវើលដ៍ចំនួន៨នាក់ ដែលសកម្មជនចេញតវ៉ាវិវាទការងារមួយនេះ ដោយចោទប្រកាន់ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម បន្ទាប់ពីបុគ្គលិកណាហ្គាវើលដ៍រាប់រយនាក់បានប្រមូលផ្តុំតវ៉ានៅខាងមុខក្រុមហ៊ុនអស់រយៈពេលជាង២សប្តាហ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ