វិស័យទេសចរណ៍កម្ពុជា អាចប្រឈមហានិភ័យម្តងទៀត ក្រោយករណីមេរោគ«អូមីក្រុង»កំពុងផ្ទុះក្នុងសហគមន៍
សមាគមទីភ្នាក់ងារទេសចរណ៍កម្ពុជានៅព្រឹកថ្ងៃទី១១ មករានេះ បានបង្ហាញក្តីកង្វល់ថា វិស័យទេសចរណ៍កម្ពុជានឹងអាចរងគ្រោះពីជំងឺកូវីដ១៩សារជាថ្មីម្តងទៀត ក្នុងកម្រិតប្រហាក់ប្រហែលដូចលើកមុន។ បើតាម លោកស្រីឆាយស៊ីវលីន អាជីវកម្មទេសចរណ៍ទាំងអស់ក្នុងប្រទេសកម្ពុជា នឹងត្រៀមខាត់បង់ប្រាក់ចំណូលនិងដើមទុនម្តងទៀត។
ចុះផ្សាយនៅថ្ងៃ៖
ស្តាប់ - ០២:៣៤
ប្រឈមមុខនឹងករណីផ្ទុះក្នុងសហគមន៍នៃមេរោគកូវីដ១៩បំប្លែងខ្លួនថ្មី«អូមីក្រុង» លោកស្រីឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានថ្លែងបញ្ជាក់ប្រាប់វិទ្យុបារាំងអន្តរជាតិRFI ថា ក្តីព្រួយបារម្ភបានកើតឡើងសារជាថ្មីចំពោះវិស័យទេសចរណ៍កម្ពុជា។ ក្តីព្រួយបារម្ភ គឺថា វិស័យទេសចរណ៍របស់កម្ពុជាទើបតែលាស់ត្រួយថ្មីឡើងវិញ ហើយអាជីវកម្មក្នុងទេសចរណ៍ជាច្រើនក៏បានវិលត្រឡប់មកធ្វើប្រតិបត្តិការ ដើម្បីទទួលភ្ញៀវទេសចរដែលធ្លាប់បានបាត់បង់អស់រយៈពេលជិត២ឆ្នាំកន្លងមក។
បើតាមលោកស្រី ឆាយស៊ីវលីន ប្រតិបត្តិករ និងសេវាករទេសចរណ៍ នឹងប្រឈមការដួលម្តងទៀត ប្រសិនបើករណីមេរោគបំប្លែងខ្លួនថ្មី«អូមីក្រុង»ផ្ទុះក្នុងសហគមន៍កាន់តែខ្លាំងឡើង។ និងថា បញ្ហានេះចង់មិនចង់ នឹងទាញឱ្យអាជីវកម្មទេសចរណ៍នានាត្រូវរកការខាតបង់ដើមទុន និងប្រាក់ចំណូលក្នុងកម្រិតមួយខ្ពស់បន្ថែមទៀត។
ជាការបញ្ជាក់បន្ថែម ប្រធានសមាគមទីភ្នាក់ងារទេសចរណ៍រូបនេះបានឱ្យដឹងថា ប្រតិបត្តិការតាមផ្លូវអាកាសក៏ត្រូវបានចាត់ចូលជាចំណុចព្រួយបារម្ភមួយសំខាន់ផងដែរ ខណៈភ្ញៀវទេសចរបរទេសមួយចំនួនធំ គ្រោងធ្វើដំណើរចូលមកប្រទេសកម្ពុជានាចុងខែមករានេះ។ ហើយ សម្រាប់ក្រុមហ៊ុនអាកាសចរណ៍ជាច្រើនវិញ នៅមិនទាន់អាចធ្វើប្រតិបត្តិការហោះហើរបានពេញលេញនៅឡើយ ស្របពេលក្រុមហ៊ុនអាកាសចរណ៍មួយភាគធំនៅតម្រង់ជួរចាំការអនុញ្ញាតឱ្យតភ្ជាប់ជើងហើរហោះជាថ្មី។
បញ្ហាផ្ទុះក្នុងសហគមន៍លើកនេះ លោកស្រីឆាយ ស៊ីវលីនបញ្ជាក់ថា វិស័យកសិកម្ម ឧស្សហកម្ម និងពាណិជ្ជកម្មក៏អាចប៉ះពាល់មួយចំនួនផងដែរ ពីព្រោះថា វិស័យទាំងនេះបានជាប់ពាក់ព័ន្ធនឹងការផ្គត់ផ្គង់មកលើវិស័យទេសចរណ៍។
តែយ៉ាងណា លោកស្រី ឆាយ ស៊ីវលីនបានលើកឡើងថា បញ្ហាឆ្លងចូលក្នុងសហគមន៍នៃមេរោគកូវីដ១៩បំប្លែងខ្លួនថ្មីនេះ គឺមិនទាន់ចាត់ទុកថា ជារឿងហួសពេលសម្រាប់ដាក់ចេញវិធានការទប់ស្កាត់នោះទេ។ និងថា ផលប៉ះពាល់ក្នុងកម្រិតទ្រង់ទ្រាយធំប៉ុណ្ណានោះ លោកស្រីអះអាងថា អាស្រ័យទៅលើការគ្រប់គ្រងរបស់រដ្ឋាភិបាល និងការចូលរួមរបស់ប្រជាពលរដ្ឋតែម្តង។ ដោយឡែកសម្រាប់ការព្យាករណ៍ថា វិស័យទេសចរណ៍អាចនឹងវិលទៅរកស្ថានភាពដើមវិញនៅពេលណានោះ លោកស្រី គ្មានក្តីរំពឹងខ្ពស់នោះទេ។
សូមរំឭកថា វិស័យទេសចរណ៍កម្ពុជាបានរងការបង្អាក់ឱ្យជាប់គាំងរាំងស្ទះស្ទើរជិត២ឆ្នាំ បន្ទាប់ពីវិបត្តិជំងឺកូវីដ១៩បានផ្ទុះរីកសាយភាយពាសពេញពិភពលោក។ តែយ៉ាងណា ក្រោយរដ្ឋាភិបាលកម្ពុជាបានប្រកាសបើកដំណើរការប្រទេសឡើងវិញ វិស័យទេសចរណ៍ទាំងផ្លូវគោក និងអាកាសបានកម្រើកចលនាឡើងវិញជាបណ្តើរៗ។
ក្នុងនោះ គិតត្រឹមរយៈពេល៣ថ្ងៃ នៃពិធីបុណ្យឆ្លងឆ្នាំសកល ភ្ញៀវទេសចរផ្ទៃក្នុង បានចេញដើរលេងកម្សាន្តមានចំនួនជាង២លាន១សែននាក់ ខណៈបន្ទប់សណ្ឋាគារ និងផ្ទះសំណាក់គ្រប់គោលដៅទេសចរណ៍ទូទាំងប្រទេសត្រូវបានទទួលការកក់ពេញៗស្ទើគ្មានកន្លែងចន្លោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ