ពេញមួយឆ្នាំ៖ កម្ពុជាប្រមូលទិន្នផលស្រូវបានសរុបជាង១២លានតោន កើន១១,៦%
ក្នុងរយៈពេញមួយឆ្នាំ ការប្រមូលផលស្រូវនៅកម្ពុជា ទទួលបានទិន្នផលសរុបចំនួនជាង១២លានតោន ពោលគឺ កើនឡើង១១,៦% បើធៀបនឹងឆ្នាំ២០២០។ នេះបើតាម របាយការណ៍ចេញផ្សាយដោយក្រសួងកសិកម្ម រុក្ខាប្រមាញ់ និងនេសាទ។ ក្នុងនោះ បរិមាណនាំចេញស្រូវទៅកាន់ប្រទេសជិតខាង បានបន្តកើនឡើងចំនួន៦១,១៦% ខណៈទំហំនាំចេញអង្ករវិញថយចុះប្រមាណ១០,៦៨% ដោយសារតែការបង្អាក់ពីវិបត្តិជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:៣៨
យោងតាមរបាយការណ៍ពីក្រសួងកសិកម្មបានបង្ហាញថា គិតត្រឹមឆ្នាំ២០២១ ដល់ដើមឆ្នាំ២០២២ ការប្រមូលទិន្នផលស្រូវសរុបនៅទូទាំងប្រទេសបានចំនួនជាង ១២,២១លានតោន ដោយចំនួននេះបន្តកើនឡើងប្រមាណ១១,៦%បើធៀបទៅនឹងឆ្នាំ២០២០កន្លងទៅ។ ក្នុងនោះ ទំហំការនាំចេញស្រូវទៅកាន់បណ្តាប្រទេសជិតខាង កម្ពុជាសម្រេចបានរហូតដល់ចំនួន ៣,៥៣លានតោន គឺបន្តកើនឡើងចំនួន៦១,១៦%។ ដោយឡែក បរិមាណការនាំចេញអង្ករផ្លូវការទៅកាន់ទីផ្សារអន្តរជាតិវិញ កម្ពុជាសម្រេចបានត្រឹមតែ៦១,៧០០ពាន់តោនប៉ុណ្ណោះ ដោយគិតជាភាគរយថយចុះប្រមាណ១០ ៦៨%។
របាយការណ៍ដដែលបានបន្តថា ក្នុងឆ្នាំ២០២១ តម្លៃស្រូវមានការធ្លាក់បន្តិចបន្តូច បើធៀបនឹងឆ្នាំ២០២០ ដោយស្ថិតក្នុងរង្វង់ប្រមាណ៥% បើប្រៀបធៀបជាមួយគម្លាតនៃឆ្នាំ២០១៨ និង២០១៩។ ការធ្លាក់ចុះតម្លៃស្រូវក្នុងឆ្នាំ២០២១ ជាពិសេសស្រូវវស្សានេះ គឺបានបង្កឡើងពីវិបត្តិជំងឺកូវីដ១៩ ដែលនាំឱ្យតម្លៃអង្ករលើទីផ្សារអន្តរជាតិធ្លាក់ចុះយ៉ាងគំហុក ជាពិសេសអង្ករក្រអូបបានធ្លាក់ចុះពីចំនួន២០%ដល់២៥%។ និងថា បណ្តាលមកពីការកាត់បន្ថយបរិមាណទិញស្រូវពីបណ្តារោងម៉ាស៊ីនកិនស្រូវមួយចំនួន ដែលរងគ្រោះពីការខាតបង់ដោយសារតម្លៃស្រូវអង្ករក្រអូបនៅលើទីផ្សារអន្តរជាតិធ្លាក់ចុះ។ នេះបើតាមការបញ្ជាក់បន្ថែមពីក្រសួងកសិកម្ម។
ជាការកត់សម្គាល់ ការប្រមូលផលស្រូវរដូងប្រាំងនៅប្រទេសកម្ពុជា នឹងចាប់ផ្តើមនៅដើមខែកុម្ភៈខាងមុខនេះ។ ប៉ុន្តែប្រជាកសិករជាច្រើន មានការព្រួយបារម្ភទាក់ទិនទៅនឹងតម្លៃស្រូវប្រាំងដែលអាចប្រឈមនឹងការធ្លាក់ចុះតម្លៃ ខណៈតម្លៃផលិតកម្ម និងធាតុចូលកសិកម្មមានការកើនឡើងខ្ពស់ទ្វេដងដូចជា៖ ប្រេងឥន្ទនៈ ជីគីមី និងថ្នាំកសិកម្ម។ បើតាម ក្រសួងកសិកម្ម ការកើនឡើងតម្លៃនេះ ដោយសារតែរោងចក្រកាត់បន្ថយផលិតកម្ម និងតម្លៃដឹកជញ្ចូនកើនឡើងខ្ពស់។
ដើម្បីធានាបាននូវបរិមាណតម្លៃស្របតាមស្តង់ដារ ក្រសួងកសិកម្មបានអះអាងថា មន្ទីរកសិកម្មខេត្តទាំងអស់ ត្រូវផ្តល់បច្ចេកទេសផលិតកម្មដំណាំស្រូវឱ្យទទួលបានទិន្នផលខ្ពស់ កាត់បន្ថយការចំណាយក្នុងផលិតកម្ម និងប្រើប្រាស់ធាតុចូលកសិកម្មឱ្យបានត្រឹមត្រូវ។ និងថា ត្រូវធានាបាននូវតម្លៃស្រូវរបស់កសិករពីម្ចាស់រោងម៉ាស៊ីនកិនស្រូវ និងលក់ឱ្យឈ្មួញជាលក្ខណៈផ្តាច់មុខជាដើម។
សូមរំឭកថា ការប្រមូលផលស្រូវរដូវប្រាំងកាលពីឆ្នាំ២០២១ កម្ពុជាទទួលបានទិន្នផលសរុបចំនួនជាង២លានតោនក្នុងទំហំផ្ទៃដីជាង ៦៥ម៉ឺនហិចតា ឬស្មើនឹង ១៤២,១៦% ដោយក្នុងមួយហិចតា កើនឡើង៤តោនកន្លះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ