ធនាគារជាតិនៃកម្ពុជា សម្រេចដាក់ចេញនូវគោលដៅអាទិភាព១០ចំណុច ដើម្បីជំរុញកំណើនសេដ្ឋកិច្ចឆ្នាំ២០២២
ធនាគារជាតិនៃកម្ពុជា បានសម្រេចដាក់ចេញនូវគោលនយោបាយអាទិភាពចំនួន១០ចំណុច ដើម្បីពង្រឹងការរីកចម្រើននៃកំណើនសេដ្ឋកិច្ចឆ្នាំ២០២២ ក្រោយរងគ្រោះពីវិបត្តិជំងឺកូវីដ១៩យ៉ាងដំណំអស់រយៈពេលជិត២ឆ្នាំកន្លងមកនេះ។ ក្នុងនោះ សម្រាប់ឆ្នាំ២០២២ដដែល ធនាគារជាតិនៃកម្ពុជា ក៏បានដាក់ការព្យាករណ៍ថា អតិផរណារួមអាចស្ថិតក្នុងអត្រា២,៦%។
ចុះផ្សាយនៅថ្ងៃ៖
ស្តាប់ - ០២:៥៤
ក្នុងរបាយការណ៍លទ្ធផលការងារប្រចាំឆ្នាំ២០២១ និងទិសដៅការងារឆ្នាំ២០២២ ធនាគារជាតិនៃកម្ពុជាបានសម្រេចអនុវត្តនូវគោលនយោបាយអាទិភាពចម្បងទាំង១០ ដើម្បីគាំទ្រការស្ទុះងើបឡើងនៃសេដ្ឋកិច្ចកម្ពុជា។ គោលនយោបាយទាំង១០ចំណុចនោះរួមមានជាអាទិ៍៖ ការរក្សាអត្រាប្តូរប្រាក់ឱ្យមានស្ថិរភាពល្អ រវាងប្រាក់រៀលនិងប្រាក់ដុល្លារ និងរក្សាអំណាចទិញនៃប្រាក់រៀល ការលើកកម្ពស់ការប្រើប្រាស់ប្រាក់រៀល ដោយជំរុញឱ្យមានការវិនិយោគនិងប្រើប្រាស់ប្រាក់រៀលឱ្យបានច្រើនជាងមុន ការអនុវត្តវិធានគាំទ្រចំគោលដៅទៅលើវិស័យដែលជួយជំរុញកំណើនសេដ្ឋកិច្ចជាតិ ការលើកកម្ពស់បរិយាបន្ននិងចំណេះដឹងហិរញ្ញវត្ថុ ដូចជាការបង្កើតលទ្ធភាពទទួលបានសេវាហិរញ្ញវត្ថុដែលមានតម្លៃសមរម្យនិងរហ័សជាដើម។
បន្ថែមពីនេះ សាខាធនាគារជាតិនៃកម្ពុជាគ្រប់បណ្តារាជធានីខេត្ត ត្រូវបន្តគាំទ្រការរីកចម្រើនសេដ្ឋកិច្ចក្នុងតំបន់តាមរយៈការផ្តល់សេវាគ្រប់គ្រងសាច់ប្រាក់ ប្រកបដោយភាពសកម្ម និងប្រសិទ្ធភាព និងរួមចំណែកលើកកម្ពស់ចំណេះដឹងក្នុងតំបន់ ក៏ដូចជាកិច្ចការពារអតិថិជនតាមរយៈប្រព័ន្ធ Hotline និងការទាញយកអត្ថប្រយោជន៍ពីបច្ចេកវិទ្យាហិរញ្ញវត្ថុថ្មីៗ។
ដោយឡែក ការពង្រឹងផែនការនិរន្តភាពអាជីវកម្ម និងផែនការអនុវត្តជាយថាហេតុក្នុងអំឡុងវិបត្តិជំងឺកូវីដ១៩ ការពង្រឹងប្រសិទ្ធភាពនៃការប្រឆាំងការសម្អាតប្រាក់ និងហិរញ្ញប្បទានភារវកម្ម ការចូលរួមកាត់បន្ថយបញ្ហាប្រែប្រួលអាកាសធាតុ ក៏ត្រូវបូកបញ្ចូលក្នុងគោលនយោបាយជំរុញកំណើនសេដ្ឋកិច្ចជាតិឆ្នាំ២០២២របស់ធនាគារជាតិផងដែរ។
បើតាម ធនាគារជាតិនៃកម្ពុជា ក្នុងនាមកម្ពុជាធ្វើប្រធានអាស៊ានឆ្នាំ២០២២នេះ ធនាគារជាតិនឹងរួមចំណែកពង្រឹងសមាហរណកម្មហិរញ្ញវត្ថុ និងសំណាញ់សុវត្ថិភាពហិរញ្ញវត្ថុក្នុងតំបន់ តាមរយៈការធ្វើសេរីភាវូបនីយកម្មសេវាធនាគារ សមាហរណកម្មប្រព័ន្ធទូទាត់ និងយន្តការផ្តល់ហិរញ្ញប្បទានសម្រាប់បង្ការនិងដោះស្រាយវិបត្តិនានា។
ជាក់ស្តែង ក្នុងរបាយការណ៍ទិសដៅការងារឆ្នាំ២០២២ក្នុងកម្រាស១៦ទំព័រ ធនាគារជាតិនៃកម្ពុជាបានដាក់ក្តីរំពឹងថា អតិផរណារួមសម្រាប់ឆ្នាំ២០២២នេះ អាចនឹងមានអត្រា២,៦% ខណៈអតិផរណារួមក្នុងឆ្នាំ២០២១បានហក់ឡើងរហូតដល់៣% និងឆ្នាំ២០២០ស្ថិតក្នុងរង្វង់២,៩%។ ការព្យាករណ៍២,៦%នេះ ផ្អែកទៅលើកំណើនថ្លៃម្ហូបអាហារនឹងបន្តថយចុះមកវិញ ដោយសារការកើនឡើងនៃការផ្គត់ផ្គង់ ការបន្តងើបឡើងវិញនៃប្រាក់ចំណូលពលរដ្ឋ និងកំណើនថ្លៃក្រុមទំនិញនិងសេវាកម្មដែលពាក់ព័ន្ធនឹងប្រេងឥន្ទនៈនឹងថយចុះតម្លៃមកវិញ។
សូមជម្រាបថា ក្នុងឆ្នាំ២០២១កន្លងទៅ ទ្រព្យសកម្មរបស់ប្រព័ន្ធធនាគារមានកំណើន១៦% ឬស្មើនឹង ៦៨,២ពាន់លានដុល្លារ ស្របពេលឥណទានអតិថិជនកើន២១,២% កើនឡើង៤៥,៧ពាន់លានដុល្លារ និងប្រាក់បញ្ញើរអតិថិជនមានកំណើន១៥,៤% គិតជាទឹកប្រាក់មានប្រមាណ៣៨,៥ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ