អូឡាំពិករដូវរងានៅប៉េកាំង៖ កម្ពុជាគាំទ្រចិន ប្រឆាំងនឹងនយោបាយនីយកម្មកីឡា
កម្ពុជាគាំទ្រចិន ដែលជាម្ចាស់ផ្ទះរៀបចំព្រឹត្តិការណ៍កីឡាអូឡាំពិករដូវរងា នៅខែកុម្ភៈខាងមុខ។ នេះគឺជាការគូសបញ្ជាក់របស់លោក ប៊ិន ឈិន ឧបនាយករដ្ឋមន្ដ្រីប្រចាំការ និងជារដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រីកម្ពុជា។ បើតាមលោក ប៊ិន ឈិន កម្ពុជានឹងបន្តការពារស្មារតីអូឡាំពិក រក្សាភាពបរិសុទ្ធនៃចលនាអូឡាំពិក គាំទ្រការរួបរួមនិងមិត្តភាព ហើយប្រឆាំងនឹងចលនាបំបែកបំបាក់ ក៏ដូចជានិន្នាការប្រឆាំងស្មារតីអូឡាំពិក។
ចុះផ្សាយនៅថ្ងៃ៖
ស្តាប់ - ០២:៣៧
ជំហររបស់កម្ពុជា គាំទ្រព្រឹត្តិការណ៍កីឡាអូឡាំពិករដូវរងា ដែលនឹងរៀបចំធ្វើនៅទីក្រុងប៉េកាំង ប្រទេសចិន ក្នុងខែកុម្ភៈ ត្រូវលោក ប៊ិន ឈិន បញ្ជាក់នៅក្នុងកិច្ចសន្ទនាលើកទី២ ស្ដីពីការផ្លាស់ប្ដូរនិងការស្វែងយល់ពីអារ្យធម៌រវាងកម្ពុជានិងចិន។ កិច្ចសន្ទនាដែលរៀបចំធ្វើកាលពីពេលថ្មីៗនេះ មានការចូលរួមពីសំណាក់អនុប្រធានាធិបតីចិន អនុប្រធានសភាតំណាងប្រជាជនចិន និងមន្ដ្រីជាន់ខ្ពស់ចិនដទៃទៀត។
នាឱកាសនោះ លោក ប៊ិន ឈិន តំណាងភាគីកម្ពុជា បានសង្កត់ធ្ងន់ថា កម្ពុជានឹងបន្តការពារស្មារតីកីឡាអូឡាំពិក ហើយប្រឆាំងនឹងរាល់ទម្រង់នៃនយោបាយនីយកម្មអូឡាំពិក និងនយោបាយនីយកម្មកីឡា។ និងថា កម្ពុជាទន្ទឹងរង់ចាំជោគជ័យទាំងស្រុង នៃកីឡាអូឡាំពិករដូវរងា នៅទីក្រុងប៉េកាំង ដែលប្រទេសចិនជាម្ចាស់ផ្ទះ។
គួរកត់សម្គាល់ថា ព្រឹត្តិការណ៍កីឡាអូឡាំពិករដូវរងានៅទីក្រុងប៉េកាំង ត្រូវប្រទេសមួយចំនួន ដូចជា អាមេរិក អង់គ្លេស អូស្ត្រាលី និងជប៉ុនជាដើម ធ្វើពហិកាមិនបញ្ជូនមន្ដ្រីរបស់ខ្លួនទៅចូលរួមឡើយ។ ជាពហិកាដើម្បីបង្ហាញពីការប្រឆាំងនឹងការរំលោភសិទ្ធិមនុស្សធ្ងន់ធ្ងរ ធ្វើឡើងដោយរដ្ឋាភិបាលកុម្មុយនីស្តចិន ទៅលើជនជាតិអ៊ុយហ្គួរ នៅតំបន់ស៊ីនជាំង។
យ៉ាងណាក៏ដោយ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានថ្លែងប្រាប់សារព័ត៌មានចិនស៊ីនហួរ នៅថ្ងៃទី២១ខែមករាថា កម្ពុជាបែងចែកដាច់ពីគ្នារវាងបញ្ហានយោបាយ សិទ្ធិមនុស្ស និងកីឡា។ សម្រាប់ព្រឹត្តិការណ៍កីឡាអូឡាំពិករដូវរងា កម្ពុជាគិតអំពីស្មារតីកីឡា ហើយស្មារតីកីឡាមានលក្ខណៈសកល និងគ្មានការរើសអើងឡើយ។ នេះបើតាមលោក វ៉ាត់ ចំរើន។
អគ្គលេខាធិការគណៈកម្មាធិការអូឡាំពិកកម្ពុជា ក៏បានបញ្ជាក់បន្ថែមដែរថា កម្ពុជាចូលរួមរាល់ព្រឹត្តិការណ៍កីឡាទាំងអស់ នៅទូទាំងពិភពលោក។ ប៉ុន្តែសម្រាប់កីឡាអូឡាំពិករដូវរងា នៅទីក្រុងប៉េកាំង ក្នុងខែកុម្ភៈខាងមុខ កម្ពុជាមិនមានការបញ្ជូនអត្តពលិកទៅចូលរួមប្រកួតឡើយ ព្រោះអត្តពលិកខ្មែរពុំមានលក្ខណៈសម្បត្តិគ្រប់គ្រាន់។ បើទោះបីជាមិនបានចូលរួមក៏ដោយ លោក វ៉ាត់ ចំរើន សង្កត់ធ្ងន់ថា កម្ពុជានៅតែរក្សាជំហរគាំទ្រការប្រកួតកីឡាអូឡាំពិករដូវរងានៅទីក្រុងប៉េកាំងដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ