ក្រុមហ៊ុនណាហ្គាវើលដ៍ថា ការកាត់បន្ថយបុគ្គលិកជាង១៣០០នាក់ ដោយសារក្រុមហ៊ុនខាតបង់ចំណូលជាង៧៧លានដុល្លារពីវិបត្តិកូវី១៩
ក្រុមហ៊ុនកាស៊ីណូណាហ្គាវើលដ៍នៅថ្ងៃទី២៣ មករា ម្សិលមិញបានចេញសេចក្តីថ្លែងការណ៍មួយដោយអះអាងថា ការបង្ខំចិត្តអនុវត្តវិធានការកាត់បន្ថយចំនួនបុគ្គលិកជាង១៣០០នាក់នេះ ដោយសារតែក្រុមហ៊ុនរងការខាតបង់ទឹកប្រាក់ជាង៧៧លានដុល្លារពីវិបត្តិជំងឺកូវីដ១៩ ក៏ដូចជាដើម្បីការពារផលប្រយោជន៍របស់ក្រុមហ៊ុននិងភាគីពាក់ព័ន្ធ។ តែយ៉ាងណា ពីភាគីសហជីពវិញបានលើកឡើងថា ការចេញសេចក្តីថ្លែងការណ៍បែបនេះ គ្រាន់តែដើម្បីការពារនូវសិទ្ធិស្របច្បាប់របស់ក្រុមហ៊ុនប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:៤៦
ក្រោយសេចក្តីថ្លែងការណ៍ថ្កោលទោស ពីសំណាកសហជីព និងបណ្តាស្ថាប័នអង្គការអន្តរជាតិធំៗជាច្រើនបានធ្លាក់ចុះមកជាបន្តបន្ទាប់ កាលពីថ្ងៃទី២៣ មករា ម្សិលមិញ ក្រុមហ៊ុនកាស៊ីណូណាហ្គាវើលដ៍បានចេញសេចក្តីថ្លែងការណ៍ជាលើកដំបូងរបស់ខ្លួនដោយរៀបរាប់អំពីហេតុផលសំខាន់ៗចំនួនជុំវិញការបង្ខំចិត្តបញ្ឈប់បុគ្គលិកចំនួន១៣២៩នាក់។
បើតាមខ្លឹមសាររបស់សេចក្តីថ្លែងការណ៍ខាងដើម ការកាត់បន្ថយចំនួនបុគ្គលិកដោយបង្ខំចិត្តពីសំណាកភាគីម្ចាស់ថៅកែក្រុមហ៊ុន គឺដោយសារតែបញ្ហាកូវីដ១៩ ដែលបានជះឥទ្ធិពលយ៉ាងធ្ងន់ធរដល់ឧស្សហកម្មទេសចរណ៍ និងបង្កជាផលមិនល្អដល់បរិយាកាសសេដ្ឋកិច្ចជាតិ ខណៈក្រុមហ៊ុនបានរាយការណ៍អំពីទំហំខាតបង់ប្រាក់ចំណូលជាង៧៧លានដុល្លារ ក្នុងរយៈ៦ខែ ឆ្នាំ២០២១។ សេចក្តីថ្លែងការណ៍ដដែលបានបន្តថា ចំពោះការកាត់បន្ថយចំនួនបុគ្គលិកនេះ មែនកាត់បន្ថយទៅលើបុគ្គលិកសមាជិករបស់សហជីពតែមួយនោះទេ ពោលគឺធ្វើឡើងទៅលើផ្នែកណាដែលមានចំនួនបុគ្គលិកច្រើនលើសតម្រូវការ និងកម្លាំងបុគ្គលិកដែលគ្មានផលិតភាពប៉ុណ្ណោះ។
ក្នុងនោះ ក្រុមហ៊ុនណាហ្គាវើលដ៍ក៏បានអះអាងថែមទៀតថា ទោះបីក្រុមហ៊ុនបញ្ឈប់បុគ្គលិកមួយចំនួនយ៉ាងណាក្តី ដើម្បីប្រយោជន៍របស់បុគ្គលិករងផលប៉ះពាល់ ភាគីក្រុមហ៊ុនបានអនុវត្តនូវវិធានការទូទាត់ប្រាក់បញ្ចប់កិច្ចសន្យាដោយទឹកប្រាក់សំណងមានចំនួនលើសពីសំណងដែលតម្រូវដោយច្បាប់ការងារនៅកម្ពុជា ស្របពេលដែលបុគ្គលិករងផលប៉ះពាល់ជាង៧៣%ទទួលយកកិច្ចព្រមព្រៀងនេះ។
ដោយឡែក ជុំវិញការជ្រើសរើសបុគ្គលិកដែលរងផលប៉ះពាល់ចូលបម្រើការងារវិញ គឺអាស្រ័យទៅលើវិធានផ្ទៃក្នុងរបស់ក្រុមហ៊ុន និងតម្រូវការលើអាជីវកម្មផលិតភាពកន្លងមក ដោយភាគីក្រុមហ៊ុនមិនបានរើសអើងទៅលើសមាជិកភាពរបស់សហជីព ឬមិនមែនជាសមាជិកសហជីពណាមួយនោះឡើយ ដោយក្រុមហ៊ុនលើកហេតុផលថា ក្រុមហ៊ុនតែងតែលើកទឹកចិត្ត និងជំរុញឱ្យបុគ្គលិកបង្កើតសហជីព ចាប់តាំងពីឆ្នាំ១៩៩៥មកម្ល៉េះ។
ទាក់ទិននឹងសេចក្តីថ្លែងការណ៍របស់ក្រុមហ៊ុននាពេលនេះ លោក ឃុន ថារ៉ូ អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស របស់អង្គការសង់ត្រាល់បានបញ្ជាក់ប្រាប់វិទ្យុបារាំងអន្តរជាតិថា នេះគឺជាការបកស្រាយរបស់ក្រុមហ៊ុនដើម្បីការពារភាពស្របច្បាប់របស់ខ្លួនប៉ុណ្ណោះ។ ក៏ប៉ុន្តែពាក់ព័ន្ធនឹងការបញ្ឈប់បុគ្គលិកជាលក្ខណៈទ្រង់ទ្រាយធំបែបនេះ ជាគោលការណ៍ច្បាប់ គឺត្រូវមានការអនុញ្ញតពីអធិការកិច្ច និងអនុវត្តឱ្យស្របតាមផ្លូវច្បាប់ជាដើម។
ដោយឡែក ជុំវិញការអះអាងថាក្រុមហ៊ុនមិនបានរើសអើងសហជីពនោះ លោក ឃុន ថារ៉ូ សង្កត់ធ្ងន់ថា គឺផ្ទុយពីទិដ្ឋភាពជាក់ស្តែងទៅហើយ ដោយសារមេដឹកនាំសហជីព និងប្រតិភូសហជីពទាំងអស់ត្រូវបានបញ្ឈប់ចេញពីការងារ ហាក់បំបិតសម្លេងរបស់សហជីព។ សម្រាប់បញ្ហាខាតបង់ប្រាក់ចំណូលវិញ មន្ត្រីសិទ្ធិមនុស្សរូបនេះបានគូសបញ្ជាក់ថា ក្រុមហ៊ុនគួរណាពិចារណាឡើងវិញនៅទំនួលខុសត្រូវដល់បុគ្គលិក ដោយភាគីថៅកែអាចព្យួរកិច្ចសន្យាការងារជូនបុគ្គលិកដូចដែលវិស័យវាយភណ្ឌន៍ធ្លាប់ធ្វើកន្លងមក ពីព្រោះថាភាពរីកច្រើនរបស់ក្រុមហ៊ុនណាហ្គាវើលដ៍ជាការប្រឹងប្រែងរបស់បុគ្គលិកមួយផ្នែកធំផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ