អង្គការសង្គមស៊ីវិល នៅបន្តព្រួយបារម្ភអំពីសិទ្ធិបញ្ចេញមតិ និងទទួលបានព័ត៌មាន ក្រោយអនុក្រឹត្យស្តីពី«ច្រកទ្វារអុីនធឺណិតជាតិ»បានអនុម័ត
អង្គការសង្គមស៊ីវិលនិងស្ថាប័នសិទ្ធិមនុស្សមួយចំនួននាព្រឹកថ្ងៃទី២៦ មករានេះ នៅតែបន្តបង្ហាញពីក្តីព្រួយបារម្ភជាខ្លាំង ជុំវិញអនុក្រឹត្យស្តីពី «ច្រកទ្វារអុីនធឺណិតជាតិ»ដែលរដ្ឋាភិបាលកម្ពុជាបានអនុម័តនាពេលកន្លងមក។ ការព្រួយបារម្ភរបស់អង្គការសង្គមស៊ីវិលគឺដោយផ្អែកថា អនុក្រឹត្យនេះអាចប៉ះពាល់ដល់សិទ្ធិរស់នៅជាមូលដ្ឋានរបស់ប្រជាពលរដ្ឋ និងសេរីភាពសារព័ត៌មានក្នុងប្រទេសគោរពលទ្ធិប្រជាធិបតេយ្យ។ បើតាម នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) រដ្ឋាភិបាលគួរពិចារណាឱ្យបានល្អិតល្អន់ចំពោះបញ្ហានេះ និងគួរទទួលយកធាតុចូលពីអង្គការសង្គមស៊ីវិលផងដែរ។
ចុះផ្សាយនៅថ្ងៃ៖
ស្តាប់ - ០២:៣៩
ក្នុងសន្និសីទថ្នាក់ជាតិស្តីពីសិទ្ធិឌីជីថល និងសេរីភាពអីុនធឺណិតនៅកម្ពុជាលោក ណុប វី នាយកប្រតិបត្តិសម្ព័ន្ធអ្នកសារព័ត៌មានកម្ពុជាហៅកាត់ថា ខេមបូចា បានលើកឡើងថា ការបង្កើតច្រកទ្វារអីុនធឺណិតជាតិ តាមរយៈសេចក្តីព្រាងអនុក្រឹត្យថ្មីរបស់រដ្ឋាភិបាល នឹងរឹតតែផ្តល់អំណាចកាន់តែទូលំទូលាយ និងគ្មានដែនកំណត់ឲ្យរដ្ឋាភិបាល អាចរាំងខ្ទប់និងរឹតត្បិតទៅលើសិទិ្ធសេរីភាពជាមូលដ្ឋានរបស់ប្រជាពលរដ្ឋ សិទិ្ធសេរីភាពក្នុងការបញ្ចេញមតិ ការទទួលបានព័ត៌មាន សិទ្ធសេរីភាពរបស់អ្នកសារព័ត៌មាន សិទិ្ធលើឯកជនភាព សិទ្ធិលើការប្រើប្រាស់ប្រព័ន្ធផ្សព្វផ្សាយ ការប្រើប្រាស់អីុនធឺណិត និងភាពប្រកួតប្រជែងនៃក្រុមហ៊ុនផ្តល់សេវាអីុនធឺណិតជាពិសេស អាចបណ្តាលឱ្យអ្នកវិនិយោគទុនចាកចេញពីទីផ្សារបច្ចេកវិទ្យានៅកម្ពុជាទៀតផង។
បន្ថែមពីនេះ លោក ណុប វី ថា មិនត្រឹមតែប៉ះពាល់ដល់សិទ្ធិសេរីភាពជាមូលដ្ឋានរបស់ពលរដ្ឋនោះទេ អនុក្រឹត្យនេះ ក៏នឹងជះឥទ្ធិពលយ៉ាងខ្លាំងដល់ការរីកចម្រើននៃសេដ្ឋកិច្ចជាតិផងដែរ ទោះបីរដ្ឋាភិបាលធ្លាប់បានអះអាងថា ការបង្កើតអនុក្រឹត្យស្តីពី«ច្រកទ្វារអីុនធឺណិតជាតិ»នេះធ្វើឡើងដើម្បីកៀរគរ ប្រាក់ចំណូលចូលជាតិយ៉ាងណាក្តី។ ប៉ុន្តែសម្រាប់លោក ណុប វី យល់ផ្ទុយថា អនុក្រឹត្យថ្មីនេះ នឹងគ្រប់គ្រងនិងតាមដានយ៉ាងម៉ឺងម៉ាត់ទៅសកម្មភាពរបស់អ្នកប្រើប្រាស់អីុនធឺណិតក្នុងប្រទេសកម្ពុជាពីសំណាកស្ថាប័នជាក់លាក់ណាមួយដែលបង្កើតឡើងដោយភាគីរដ្ឋាភិបាល។
ក្នុងន័យនេះ នាយកប្រតិបត្តិសម្ព័ន្ធអ្នកសារព័ត៌មានកម្ពុជាចង់សំដៅថា ទិន្ន័យរបស់អ្នកប្រើប្រាស់នឹងត្រូវបានស្ថិតក្រោមក្រសែភ្នែក និងកណ្តាប់ដៃរបស់រដ្ឋាភិបាល។ ជាក់ស្តែង ការបង្កើតអនុក្រឹត្យនេះ រដ្ឋាភិបាលមិនបានទទួលយកយោបល់ និងការពិភាក្សា រឺធាតុចូលណាមួយពីបណ្តាអង្គការសង្គមស៊ីវិលនិងសិទ្ធិមនុស្សនានានោះទេ ក៏ព្រោះថា ភាគច្រើននៃដំណើរការតាក់តែងច្បាប់ គឺគ្មានសម្លេងប្រឆាំង និងការចូលរួមចម្រុះពណ៌របស់សមាសធាតុគណបក្សនយោបាយណាមួយឡើយ។ នេះការលើកឡើងរបស់លោក ណុប វី។
យ៉ាងណា ផ្អែកតាមសេចក្តីព្រាងអនុក្រឹត្យចុងក្រោយ ចុះថ្ងៃទី០៨ កក្កដា ស្តីពីការបង្កើតច្រកទ្វារអីុនធឺណិតជាតិ ឬហៅជាភាសាអង់គ្លេសថា «National Internet Gateway» រដ្ឋាភិបាលមានគោលបំណងគ្រប់គ្រងរាល់ការតភ្ជាប់បណ្តាញអីុនធឺណិតទាំងអស់នៅក្នុងប្រទេស ក្រោមហេតុផលថា ដើម្បីការពារសន្តិសុខជាតិ និងថែរក្សារបៀបរៀបរយសណ្តាប់ធ្នាប់សង្គម។
ក្រោយរដ្ឋាភិបាលបានបង្កើតអនុក្រឹត្យនេះមក កាលពីថ្ងៃទី ១៩ កុម្ភៈឆ្នាំ២០២១កន្លងទៅ បណ្តាអង្គការសង្គមស៊ីវិលចំនួន៦២ស្ថាប័ន បានចេញសេចក្តីថ្លែងការណ៍រួមមួយ ដោយស្នើឱ្យរដ្ឋាភិបាលកម្ពុជានិរាករណ៍អនុក្រឹត្យនេះវិញ ដោយពួកគេលើកអំពីក្តីកង្វល់ថា វាបានជះឥទ្ធិពលខ្លាំងដល់សិទ្ធិសេរីភាព និងផ្ទុយពីអ្វីដែលរដ្ឋាភិបាលបានបង្ហាញឆន្ទៈថានឹងគោរពតាមរយៈសេចក្តីព្រោងច្បាប់ស្តីពីការទទួលបានព័ត៌មាន និងនៅក្នុងវេទិកានានា។ សូមជម្រាបថា បើតាមរបាយការណ៍របស់BBC Media Action ក្នុងឆ្នាំ២០២១ កម្ពុជាមានអ្នកប្រើប្រាស់ប្រព័ន្ធអីុនធឺណិត ចំនួន ១០លាននាក់ រឺស្មើនឹង៨៧%នៃប្រជាជនសរុបដែលចន្លោះអាយុចាប់ពី១៥ ដល់៣០ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ