សហជីពធំៗ ស្នើឲ្យដោះលែងមេដឹកនាំសហជីព៨រូប ស្របពេលលោក ស ខេង ស្នើឲ្យសមត្ថកិច្ចអត់ធ្មត់បន្ថែមទៀត
ក្រុមបុគ្គលិក ដែលបំរើការងារនៅក្រុមហ៊ុនកាស៊ីណូណាហ្គាវើលដ៍ នៅតែបន្តធ្វើការតវ៉ាសុំចូលធ្វើការវិញ និង ស្នើឲ្យមានការដោះលែងតំណាងរបស់ពួកគេ៨នាក់ដែលសមត្ថកិច្ចចាប់ខ្លួនអស់រយៈពេលជិត១ខែមកហើយ។ ជាមួយគ្នានេះ សហជីពធំៗចំនួន៣ ដែលជាសមាជិកសហជីពអន្តរជាតិ ITUC កាលពីថ្ងៃទី២៥ ខែមករា ក៏បានចេញសេចក្តីថ្លែងការណ៍ឲ្យមានការដោះលែងតំណាងសហជីពប្រចាំក្រុមហ៊ុនណាហ្គាវើលដ៍ ផងដែរ ស្របពេលដែលរដ្ឋមន្ត្រីក្រសួងមហាផ្ទៃលោក ស ខេង អំពាវនាវឲ្យសមត្ថកិច្ចមានការអត់ធ្មត់ករណីវិវាទនៃក្រុមហ៊ុនណាហ្គាវើលដ៏នេះ។
ចុះផ្សាយនៅថ្ងៃ៖
ស្តាប់ - ០១:៥៩
លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃនៅក្នុងពិធីចែករថយន្តដល់នគរបាលវរៈការពារព្រំដែនកាលពីថ្ងៃអង្គារម្សិលមិញ បានប្រាប់ទៅសមត្ថកិច្ច ដែលរួមមានក្រសួងការងារ អាជ្ញាធរក្រុងនិងនគរបាលផងដែរ បន្តប្រកាន់នូវជំហរអត់ធ្មត់សម្របសម្រួល ជុំវិញការតវ៉ារបស់បុគ្គលិកក្រុមហ៊ុនកាស៊ីណូណាហ្គាវើលដ៏។
លោក ស ខេង បានគូសបញ្ជាក់ថាភាគីទាំងពីរពោលគឺ ភាគីនិយោជកនៃក្រុមហ៊ុនណាហ្គាវើលដ៍ និងភាគីបុគ្គលិក ក្រោមការសម្របសម្រួលរបស់អាជ្ញាធរ គួរតែខិតខំរកវិធីបញ្ចប់ឲ្យបានឆាប់គឺជាការល្អ ដោយលោកស្នើកុំឲ្យភាគីទាំងពីរបែរខ្នងដាក់គ្នា ដែលជាហេតុមិនអាចរកដំណោះស្រាយរួមបាន។
ស្របពេលដែលលោក ស ខេង លើកឡើងដូច្នេះ មេដឹកនាំសហជីពធំៗ រួមមានសហភាពការងារកម្ពុជា (CLC) សហភាពសហជីពកម្ពុជា (CCU) និងសហភាពសហព័ន្ធសហជីពកម្ពុជា(CCTU) ក៏បានចេញសេចក្តីថ្លែងការបង្ហាញនូវការសោកស្តាយ និងព្រួយបារម្ភជាថ្មី ខណៈដែលដំណោះស្រាយជុំវិញបញ្ហាវិវាទការងាររវាងនិយោជក និងនិយោជិតនៃក្រុមហ៊ុនណាហ្គាវើលដ៏ នៅតែមានភាពជាប់គាំង។ ក្រៅពីនេះ សហជីពធំៗ ក៏បានស្នើសុំឲ្យមានការដោះលែងមេដឹកនាំសហជីពណាហ្គាវើលដ៏ចំនួន៨នាក់ ដែលសមត្ថកិច្ចចាប់ខ្លួនអស់រយៈពេលជិត១ខែមកនេះ ដោយចោទប្រកាន់ពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។
សូមបញ្ជាក់ថា អស់រយៈពេលជាង១ខែទៅហើយ ដែលបុគ្គលិកក្រុមហ៊ុនណាហ្គាវើលដ៍ជាង១៣០០នាក់ បាននាំគ្នាធ្វើកូដកម្មទាមទារឲ្យពួកគេបានចូលធ្វើការវិញ និងឲ្យក្រុមហ៊ុនទូទាត់ប្រាក់សំណងត្រឹមត្រូវក្នុងករណីមានការបញ្ឈប់ពួកគេពីការងារ។ ក៏ប៉ុន្តែក្រុមហ៊ុនបានប្រកាន់ជំហរតឹងរឹង ដោយសំអាងថាការបញ្ឈប់បុគ្គលិកជាង១៣០០នាក់នេះ គឺដោយហេតុផលនៃការខាតបង់ប្រាក់ចំណូលអំឡុងពេលនៃវិបត្តិកូវីដ-១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ