បុគ្គលិកក្រុមហ៊ុនណាហ្គា បដិសេធការលើកឡើងរបស់ភាគីក្រុមហ៊ុនថា មិនចុះបញ្ចាំងពីរូបភាពពិតទៅកាន់សាធារណជន
បុគ្គលិកក្រុមហ៊ុនណាហ្គាវើលដ៍នៅព្រឹកថ្ងៃទី២៨ មករានេះបានរៀបចំសន្និសីទកាសែតមួយ ដើម្បីឆ្លើយតបទៅនឹងការលើកឡើងរបស់ភាគីក្រុមហ៊ុន។ ភាគីក្រុមហ៊ុនដែលធ្លាប់បានអះអាងថា ការបញ្ឈប់បុគ្គលិកជាង១៣០០នាក់ ដោយសារក្រុមហ៊ុនរងការខាតបង់ចំណូល និងមិនមានហេតុផលណាត្រូវរើងអើងសហជីព និងរំលោភបំពានសិទ្ធិការងារដល់បុគ្គលិកនោះទេ។ តែជាការឆ្លើយតប បុគ្គលិកណាហ្គាបានបដិសេធថា វាមិនបានឆ្លុះបញ្ចាំងអំពីរូបភាពពិត និងជាក់ស្តែងនោះទេ។ ប៉ុន្តែនេះ ក្រុមហ៊ុនគ្រាន់តែធ្វើឡើងដើម្បីតែបំភាន្តភ្នែកសាធារណជនប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:៥៥
ក្នុងសន្និសីទសារព័ត៌មាននាព្រឹកនេះ តំណាងបុគ្គលិកក្រុមហ៊ុនណាហ្គាវើលដ៍បានចេញសេចក្តីបំភ្លឺឆ្លើយតបទៅនឹងសេចក្តីថ្លែងការណ៍ចំនួន៨ចំណុច ដែលភាគីក្រុមហ៊ុនបានលើកឡើងអំពីហេតុផលសំខាន់ៗមួយចំនួនរហូតឈានដល់ការបញ្ឈប់បុគ្គលិកជាង១៣០០នាក់ និងការផ្តល់ប្រាក់បញ្ចប់កិច្ចសន្យាស្របតាមច្បាប់។
ក្នុងសេចក្តីបំភ្លឺដែលចេញពីខាងតំណាងកូដករបានឱ្យដឹងថា ក្រុមហ៊ុនក្នុងរយៈ៣ឆ្នាំដោយគិតចាប់តាំងពីឆ្នាំ២០១៨ ដល់ឆ្នាំ២០២០ ចំណូលសរុបរបស់ក្រុមហ៊ុនមានចំនួនជាង១ពាន់លានដុល្លារ ដែលផ្ទុយពីការលើកឡើងរបស់ភាគីក្រុមហ៊ុនថា ប្រាក់ចំណូលក្នុងឆ្នាំ២០២០បានរងការខាតបង់ជាង៧៧លានដុល្លារ។
បន្ថែមពីនេះតំណាងកូដករបានបញ្ជាក់ទៀតថា ក្រុមហ៊ុនបានបញ្ឈប់សមាជិកសហជីពស្ទើតែ៨០%នៃបុគ្គលិកដែលថៅកែបានបញ្ឈប់ជាង១៣០០នាក់ ជាពិសេសថ្នាក់ដឹកនាំសហជីព សកម្មជនសហជីព និងប្រតិភូបុគ្គលិកទាំងអស់ដែលមានអតីតភាពការងារច្រើន។ ការបញ្ឈប់ស្ទើតែទាំងស្រុងនេះ ភាគីបុគ្គលិកយល់ឃើញថា ជាហេតុផលដើម្បីបំផ្លាញសហជីព និងព្រមទាំងរំលោភបំពានច្បាប់ជាតិ និងអន្តរជាតិយ៉ាងធ្ងន់ធ្ងរ ដែលផ្ទុយនឹងខ្លឹមសារនៃមាត្រា ៩៥ នៃច្បាប់ស្តីពីការងារ និងអនុសញ្ញាអន្តរជាតិលេខ ៨៧និង៩៤ជាដើម។
ដោយឡែក ទាក់ទិននឹងការទូទាត់ប្រាក់បញ្ចប់កិច្ចសន្យាកាងារវិញ ភាគីនិយោជិកបានសង្កត់ធ្ងន់ថា ភាគីនយោជកបានគម្រាមកំហែង និងបង្ខំឱ្យកម្មករទទួលយកប្រាក់សំណងដែលមានចំនួនតិចជាងការលើកឡើងរបស់ក្រុមហ៊ុន និងថា ថៅកែបានព្រមានពីការបញ្ឈប់ដោយឯកតោភាគីថែមទៀតផង ស្របពេល ការគណនាប្រាក់សំណងប្រាក់បញ្ចប់កិចសន្យា គឺកម្មករទទួលបានផលប្រយោជន៍ទាបជាងច្បាប់ទៅវិញ។ និងចុងក្រោយនោះ បុគ្គលិកថា ក្រុមហ៊ុនមិនបានលើកទឹកចិត្តឱ្យកម្មករនិយោជិកបង្កើតសហជីពនោះទេ ដោយរាល់ពេលសហជីពដាក់ពាក្យសុំចរចាតម្លើងប្រាក់ឈ្នូល ត្រូវបានថៅកែធ្វើទុក្ខបុកម្នេញ និងបញ្ឈប់ថ្នាក់ដឹកនាំសហជីពចាប់ពីឆ្នាំ២០១៣ ២០១៩ និងឆ្នាំ២០២១ជាដើម។
ជុំវិញសេចក្តីបំភ្លឺនេះ តំណាងកម្មករក្រុមហ៊ុនណាហ្គាវើលដ៍ នៅតែបន្តទទូចឱ្យអាជ្ញាធរដោះលែងតំណាងទាំង៨រូបរបស់ពួកគេឱ្យមានសេរីភាពឡើងវិញ ដើម្បីចូលតុចរចារស្វែងរកដំណោះស្រាយជូនកូដករកំពុងធ្វើកូដកម្មទាំងអស់ឱ្យស្របតាមច្បាប់ដែលមានចែង។ ក្នុងនោះ បុគ្គលិកក្រុមហ៊ុនណាហ្គាបានលើកឡើងថា ពួកគេនៅតែរក្សាជំហរដដែលចំពោះការទាមទារដោះលែងតំណាងសហជីពទាំង៨រូប និងថាមិនរើសតំណាងថ្មីដើម្បីជំនួសតួនាទីរបស់តំណាងចាស់ដែលកំពុងជាប់ឃុំនោះឡើយ។ មិនរើសតំណាងថ្មីដោយសារតែតំណាងទាំង៨រូបនេះ ត្រូវបានជ្រើសតាំងដោយស្នាមមេដៃ និងចុងប៊ិចរាប់ពាន់នាក់ពីបុគ្គលិកក្រុមហ៊ុនផ្ទាល់។
បើតាមបុគ្គលិកក្រុមហ៊ុនណាហ្គាវើលដ៍ ពួកគេនឹងនៅតែបន្តតវ៉ាដដែល ទោះបីជាមានការរំខានមកលើសុវត្ថិភាពធានាពីសំណាកអាជ្ញាធរក៏ដោយ។ ក្នុងនោះ បុគ្គលិកណាហ្គាវើលដ៍វបានបន្តថា ដើម្បីបិទបញ្ចប់ការធ្វើកូដកម្មនេះ គឺត្រូវឱ្យថៅកែ និងអ្នកគ្រប់គ្រងចេញមកដោះស្រាយជាមួយបុគ្គលិក ដោយផ្ទាល់ និងត្រូវគោរពសិទ្ធិសហជីព និងគោរពសិទ្ធិការងារជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ