ក្រសួងទេសចរណ៍៖ កំណើនទេសចរដើមឆ្នាំ ជាសញ្ញាវិជ្ជមាននៃការងើបឡើងវិញទេសចរណ៍ផ្ទៃក្នុង
ពេញមួយខែដើមឆ្នាំ២០២២នេះ មានភ្ញៀវទេសចរប្រមាណជាង ៣លាននាក់បានដើរកម្សាន្ត នៅតាមគោលដៅទេសចរណ៍នានាទូទាំងប្រទេស។ នេះបើតាមក្រសួងទេសចរណ៍ កាលពីថ្ងៃទី៣១ ខែមករា ដោយបានចាត់ទុកកំណើននេះថាជាសញ្ញាវិជ្ជមាននៃការងើបឡើងវិញនៃវិស័យនេះ។ តែប្រតិបត្តិករទេសចរណ៍ នៅតែមើលឃើញផលប៉ះពាល់ពីការរីករាលដាលកូវីដ១៩ប្រភេទអូមីក្រុង ដែលត្រូវបានរកឃើញឆ្លងនៅក្នុងសហគមន៍ជាបន្តបន្ទាប់។
ចុះផ្សាយនៅថ្ងៃ៖
ស្តាប់ - ០២:០១
បើតាមក្រសួងទេសចរណ៍ ក្នុងរយៈពេល១ខែដើមឆ្នាំ២០២២នេះ មានភ្ញៀវទេសចរប្រមាណ៣លាន១៥ម៉ឺននាក់ ដែលបានដើរកម្សាន្ត នៅទូទាំងប្រទេស ដែលអាចចាត់ទុកថាជាសញ្ញាវិជ្ជមាននៃការងើបឡើងវិញដ៏ឆាប់រហ័សនៃវិស័យទេសចរណ៍ផ្ទៃ ក្នុងសម្រាប់ឆ្នាំ២០២២នេះ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានបញ្ជាក់ប្រាប់វិទ្យុបារាំងអន្តរជាតិនៅថ្ងៃទី០១ ខែកុម្ភៈ នេះថា នៅដើមឆ្នាំ២០២២ ទេសចរផ្ទៃក្នុងមានការកើនឡើងរាប់ចាប់តាំងពីថ្ងៃឆ្លងឆ្នាំសកលមក ហើយកំណើននេះ មានការកើនឡើងកាន់តែច្រើនទៅៗ។ ការណ៍នេះ ធ្វើឲ្យអាជីវកម្មទេសចរណ៍ចាប់ផ្តើមងើបឡើងវិញខ្លះៗដែរ។
ប្រធានសមាគមទីភ្នាក់ងារទេសចរណ៍កម្ពុជាបន្តថា ទោះបីជាវិស័យទេសចរណ៍បង្ហាញសញ្ញាវិជ្ជមាននាដើមឆ្នាំ ប៉ុន្តែការឆ្លងរាលដាលកូវីដ១៩ប្រភេទបំប្លែងថ្មីអូមីក្រុង គឺប៉ះពាល់ខ្លះលើវិស័យនេះ ដែលធ្វើឲ្យប្រទេសមួយចំនួនមានការប្រយ័ត្នប្រយែងរឹតត្បិតសកម្មភាពនានា ហើយក៏ធ្វើឲ្យទេសចរក្នុងស្រុកមានការប្រុងប្រយ័ត្នដែរ ប៉ុន្តែអ្នកដើរកម្សាន្តនៅតែដើរកម្សាន្ត ដោយអនុវត្តវិធានការការពាររបស់ក្រសួងសុខាភិបាល។
លោក ខៀវ ធី ប្រធានសមាគមមគ្គុទេសក៍ទេសចរណ៍ ដែលមានមូលដ្ឋាននៅក្រុងសៀមរាប បានប្រាប់វិទ្យុបារាំងអន្តរជាតិនៅថ្ងៃទី០១ ខែកុម្ភៈថាជាង២ឆ្នាំកន្លងទៅ នេះគឺជាលើកទី១ហើយ ដែលលោកចាប់ផ្តើមដំណើការសេវាកម្មមគ្គុទេសក៍ទេសចរណ៍ឡើងវិញ ប៉ុន្តែលោកថាលោកទើបតែទទួលបានទេសចរមួយក្រុមប៉ុណ្ណោះ។ បើតាមលោក ខៀវ ធី នៅក្នុងតំបន់អង្គរមានទេសចរបរទេសប្រមាណ៥០នាក់ជាមធ្យមនៅក្នុងមួយថ្ងៃ។
ចំពោះការធ្វើដំណើរកម្សាន្តទៅក្រៅប្រទេសរបស់ប្រជាជនខ្មែរវិញ គឺមានមួយចំនួនដែរ ប៉ុន្តែមាននៅក្នុងកម្រិតមិនច្រើននោះទេ ពោលគឺជាលក្ខណៈគ្រួសារ ឬជាដំណើរកម្សាន្តក្រេបទឹកឃ្មុំ ដែលមិនមែនជាដំណើរកម្សាន្តជាក្រុមធំឡើយ។ នេះបើតាមការបញ្ជាក់របស់លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ