ជនបរទេសមួយគ្រួសារដែលសកម្មក្នុងការងារបរិស្ថានទទួលបានសញ្ជាតិខ្មែរ
លោក ដាវិស បេន យ៉ូសែប គឺជាជនបរទេសដែលធ្វើការងារយ៉ាងសកម្មក្នុងកិច្ចការពារបរិស្ថាននៅកម្ពុជា ត្រូវបានទទួលសញ្ជាតិខ្មែរជាចង្កោមគ្រួសារ តាមរយៈព្រះរាជក្រឹត្យរបស់ព្រះមហាក្សត្រនៅថ្ងៃទី២៦ខែមករា២០២២។ ក្រសួងបរិស្ថានចាត់ទុកការផ្តល់សញ្ជាតិនេះ គឺជាការទទួលស្គាល់នូវការលះបង់កម្លាំងកាយ កម្លាំងចិត្តរបស់បុរសជាជនជាតិអាមេរិកាំងរូបនេះ និងក្រុមគ្រួសារសរុបចំនួន៤នាក់ ដើម្បីបុព្វហេតុការពារ និងអភិរក្សធនធានព្រៃឈើ និងសត្វព្រៃ នៅក្នុងដែនជម្រកសត្វព្រៃភ្នំត្នោត-ភ្នំពក នៅក្នុងខេត្តព្រះវិហារ។
ចុះផ្សាយនៅថ្ងៃ៖
ស្តាប់ - ០១:៤៨
លោក ដាវិស បេន យ៉ូសែបគឺជាជនជាតិអាមេរិកាំង និងភរិយាគាត់ជាជនជាតិអូស្ត្រាលី។ ពួកគេបាននាំកូនស្រីទាំង២នាក់មករស់នៅ និងចូលរួមការពារ និងអភិរក្សព្រៃឈើសត្វព្រៃជាមួយរដ្ឋាភិបាលកម្ពុជា អស់រយៈពេលជាង ២០ឆ្នាំហើយ រហូតបានបង្កើតជាតំបន់អភិរក្សសត្វ និងព្រៃឈើនៅភ្នំត្នោត-ភ្នំពកនៅខេត្តព្រះវិហារ។
ជាការកត់សំគាល់ ក្រុមគ្រួសារជាជនបរទេសស្បែកសនេះ បានស្ម័គ្រចិត្តមករស់នៅក្នុងព្រៃក្នុងខេត្តព្រះវិហារ ដើម្បីការពារ អភិរក្សសត្វ និងព្រៃឈើនៅកម្ពុជា ដោយបោះបង់ចោលការងារ និងកូនៗមិនបានចូលរៀនសូត្រតាមសាលារៀនឡើយ។
ដោយសារតែលះបង់បែបនេះហើយ ទើបនៅថ្ងៃទី២៦ខែមករាឆ្នាំ២០២២ ព្រះមហាក្សត្រកម្ពុជាបានប្រទានសញ្ជាតិជាចង្កោមគ្រួសារដល់ លោក ដាវិស បេន យ៉ូសែប ជាជនជាតិអាមេរិក កើតនៅទីក្រុង Verdun ប្រទេសបារាំង និង ភរិយា គឺលោកស្រី ជាវិស សារិន ប៉ាទ្រីសា ជាជនជាតិអូស្ត្រាលី កើតនៅទីក្រុង Hornsby។ ចំណែកកូនស្រីទាំងពីរនាក់ ដែលកើតនៅទីក្រុង Wahroonga ប្រទេសអូស្ត្រាលី ក៏ទទួលបានសញ្ជាតិខ្មែរដូចគ្នា។
ក្រសួងបរិស្ថានកម្ពុជា បានចូលរួមអបអរសាទរចំពោះ លោក បេន និងក្រុមគ្រួសារដែលទទួលបានសញ្ជាតិខ្មែរ ដោយចាត់ទុកថា នេះគឺជាការទទួលស្គាល់នូវការលះបង់កម្លាំងកាយ កម្លាំងចិត្តរបស់លោក បេន និងក្រុមគ្រួសារសរុបចំនួន៤នាក់ ដើម្បីបុព្វហេតុការពារ និងអភិរក្សធនធានព្រៃឈើ និងសត្វព្រៃ នៅក្នុងដែនជម្រកសត្វព្រៃភ្នំត្នោត-ភ្នំពក នៅក្នុងខេត្តព្រះវិហារ។ ក្រសួងដដែលនេះ អះអាងថាការចូលរួមការពារនិងអភិរក្សធនធានធម្មជាតិរបស់លោក បេន និងក្រុមគ្រួសារជាមួយក្រសួងបរិស្ថាន គឺប្រកប ដោយភាពស្មោះត្រង់ ការទទួលខុសត្រូវខ្ពស់ និងតម្កល់ផលប្រយោជន៍ធនធានធម្មជាតិជាធំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ