ក្រសួងសុខាភិបាល ព្រមានចាត់វិធានការតាមផ្លូវច្បាប់លើកូដករក្រុមហ៊ុនណាហ្គាវើលដ៍ ប្រសិនបើមិនទៅធ្វើតេស្តរកអូមីក្រុង
ក្រសួងសុខាភិបាលនៅព្រឹកថ្ងៃទី ០៤ មករានេះបានប្រាប់ឲ្យអ្នកតវ៉ានៅក្រុមហ៊ុនណាហ្គាវើលដ៍ នាំគ្នាទៅធ្វើតេស្តរកជំងឺអូមីក្រុងហើយព្រមានថា ប្រសិនបើពួកគេមិនទៅធ្វើតេស្តទេ នោះនឹងប្រឈមការចាត់វិធានការតាមផ្លូវច្បាប់ ស្តីពីការទប់ស្កាត់ការឆ្លងរីករាលដាលជំងឺកូវីដ១៩។ ការព្រមានបែបនេះ ធ្វើឡើងបន្ទាប់ពី ក្រសួងសុខាភិបាល បានអះអាងពីការរកឃើញនូវករណីឆ្លងមេរោគកូវីដ១៩ប្រភេទថ្មី«អូមីក្រុង» ទៅលើកូដករម្នាក់ជាអតីតបុគ្គលិកក្រុមហ៊ុនកាស៊ីណូហ្គាវើលដ៍ដែលកំពុងតវ៉ា។
ចុះផ្សាយនៅថ្ងៃ៖
ស្តាប់ - ០២:២៨
ក្នុងសេចក្តីប្រកាសព័ត៌មាននៅថ្ងៃទី០៤ មករានេះ ក្រសួងសុខាភិបាល បានអះអាងថា ខ្លួនបានរកឃើញករណីវិជ្ជមានកូវីដ១៩ប្រភេទ«អូមីក្រុង» ទៅលើស្ត្រីមានផ្ទៃពោះម្នាក់ ដែលជាកូដកររបស់ក្រុមហ៊ុនកាស៊ីណូណាហ្គាវើលដ៍ ដែលទៅបានពិនិត្យសុខភាពនៅពីថ្ងៃទី២៨ មករាកន្លងមក។ បើតាម ក្រសួងសុខាភិបាល ស្ត្រីរូបនេះបានឆ្លងមេរោគកូវីដ១៩ ក្នុងអំឡុងពេលធ្វើបាតុកម្មនៅខាងមុខស្ថានទូតអូស្រ្តាលី។
ក្រសួងសុខាភិបាលបានប្រាប់ឲ្យអ្នកដែលកំពុងធ្វើការតវ៉ា ត្រូវទៅពិនិត្យ និងយកសំណាកដើម្បីធ្វើតេស្តរកវីរុសកូវីដ១៩នៅទីតាំងដែលបានកំណត់ ស្ថិតក្នុងតំបន់កោះពេជ្រ រយៈពេលបីថ្ងៃ ចាប់ពីថ្ងៃទី០៤ ដល់ថ្ងៃទី ៦មករា ឆ្នាំ២០២២។
បើតាមក្រសួងសុខាភិបាល ប្រសិនបើពួកគេមិនទៅធ្វើតេស្តទេ នោះនឹងប្រឈមការចាត់វិធានការតាមផ្លូវច្បាប់ ស្តីពីការទប់ស្កាត់ការឆ្លងរីករាលដាលជំងឺកូវីដ១៩។
លោកស្រី អ៊ូ ទេពផល្លីន ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា បានលើកឡើងថា ក្រសួងកំពុងមានចេតនារំសាយកូដកម្ម ដោយលើកយកបញ្ហាកូវីដ១៩មកដាក់ជាប្រធានបទចំពោះកូដករ។ ប៉ុន្តែការធ្វើបែបនេះ លោកស្រីយល់ថា ជាការគិតគូដល់សុខមាលភាពសាធារណៈ ខណៈកូដករក៏បានត្រៀមខ្លួនរួចរាល់ហើយ ដើម្បីចូលពិនិត្យយកសំណាកដែលក្រសួងបានតម្រូវ។ ប៉ុន្តែលោកស្រី ផល្លីនស្នើឱ្យក្រសួងត្រូវមានតម្លាភាព និងសុច្ចរិតភាព ក្នុងដំណើរការតេស្តរកជំងឺកូវីដ១៩ពីក្រុមកូដករទាំងអស់។
ចំណែកចេតនា និងរបៀបវារៈដើម្បីបញ្ចប់កូដកម្មតាមរយៈការយកបញ្ហាជំងឺកូវីដ១៩មកធ្វើការកម្មវត្ថុនោះ ប្រធានសហជីពរូបនេះ បាននិយាយថា មិនអាចធ្វើទៅរួចនោះទេ ដោយសារតែកូដករទាំងអស់ប្រកាន់ភ្ជាប់នូវវិធានសុខាភិបាលយ៉ាងខ្ជាប់ខ្ជួន និងថាប្រសិនបើមានការឆ្លងមែន កូដករតម្រូវធ្វើចត្តាឡីស័ក្តត្រឹមតែ៥ថ្ងៃប៉ុណ្ណោះ។ ដូច្នេះក្រោយរយៈពេល៥ថ្ងៃ កូដករអាចវិលមកធ្វើកូដកម្មបានជាធម្មតា។
ជាការកត់សម្គាល់ អ្នកស្រី ឈួន សំអាន ដែលជាអ្នកមានជំងឺផ្ទាល់បានចេញមកបកស្រាយនៅលើបណ្តាញសង្គមនាព្រឹកថ្ងៃទី០៤ មករានេះថា អ្នកស្រីពិតជាមានវិជ្ជមានជំងឺកូវីដ១៩ពិតមែន។ ក៏ប៉ុន្តែអ្នកស្រីអះអាងថា ចាប់តាំងពីពេលដែលអ្នកស្រីពិនិត្យឃើញថា ខ្លួនមានផ្ទៃពោះមក ការចូលរួមធ្វើកូដកម្មត្រូវបានផ្អាកចាប់តាំងពីថ្ងៃទី១៥ មករា មកម្ល៉េះ។ អ្នកស្រី ឈួន សំអាន បន្តថា ដើមហេតុនៃការឆ្លង មិនមែនដោយសារតែអ្នកស្រីធ្វើកូដកម្មនៅមុខស្ថានទូតអូស្ត្រាលី ដូចដែលភាគីរដ្ឋាភិបាលបញ្ជាក់ក្នុងសេចក្តីប្រកាសនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ