កូដករណាហ្គាវើលដ៍ថានឹងយកសំណាកតាមការអំពាវនាវរបស់អាជ្ញាធរ
នៅថ្ងៃទី០៥ ខែកុម្ភៈនេះ កូដករណាហ្គាវើលដ៍នឹងទៅយកសំណាករកកូវីដ១៩ទាំងអស់គ្នា តាមការអំពាវនាវរបស់រដ្ឋបាលរាជធានីភ្នំពេញ និងក្រសួងសុខាភិបាល។ នេះបើតាមការបញ្ជាក់របស់កូដករណាហ្គាវើលដ៏ម្នាក់ ដោយលើកឡើងទៀតថាការធ្វើកូដកម្មនឹងនៅតែបន្ត ក្រោយការធ្វើសំណាករយៈពេល២ថ្ងៃរួចរាល់។
ចុះផ្សាយនៅថ្ងៃ៖
ស្តាប់ - ០២:១៧
តាមរយៈទំព័រហ្វេសប៊ុកកូដករណាហ្គាវើលដ៏បានអំពាវនាវសុំឲ្យក្រសួងសុខាភិបាលចុះមកយកសំណាករបស់ពួកគាត់នៅកន្លែងកូដកម្មនាថ្ងៃទី០៥ ខែកុម្ភៈ និងបានបញ្ជាក់ថានឹងមិនមានការធ្វើកូដកម្មនោះទេ តែនឹងនាំគ្នាទៅយកសំណាក តាមការអំពាវនាវរបស់អាជ្ញាធរ កាលពីថ្ងៃទី០៤ ខែកុម្ភៈ។
លោក ជួប ចាន់ណាត ជាកូដករណាហ្គាវើលដ៍ម្នាក់បានបញ្ជាក់ប្រាប់វិទ្យុបារាំងអន្តរជាតិនៅថ្ងៃទី០៥ ខែកុម្ភៈនេះថា បុគ្គលិកណាហ្កាវើលដ៏ ដែលចូលរួមធ្វើកូដកម្មមិនបានគេចវេះ ឬរឹងរូសមិនយកសំណាក តាមវិធានការរបស់អាជ្ញាធរនោះទេ។ ប៉ុន្តែកាលពីថ្ងៃទី០៤ ខែកុម្ភៈ ក្រុមកូដករមិនបានយកសំណាកដោយសារតែល្ងាចពេក ហើយកូដករក៏មានគ្នាច្រើនប្រមាណជាង៧០០នាក់ និងមិនមានការឃ្លាំមើលពីអង្គការសង្គមស៊ីវិល ដើម្បីឲ្យមានតម្លាភាព។
លោក ជួប ចាន់ណាត បន្តថាកូដករណាហ្គាវើលដ៍នឹងមិនធ្វើកូដកម្មទេ នៅថ្ងៃទី០៥ និងថ្ងៃទី០៦ ខែកុម្ភៈ ដោយមិនចង់ឲ្យលាយឡំការធ្វើកូដកម្មជាមួយគ្នានិងការយកសំណាក។ បើតាមកូដកររូបនេះ កូដករណាដែលវិជ្ជមាននឹងត្រូវព្យាបាល ហើយអ្នកដែលអវិជ្ជមាននឹងបន្តធ្វើកូដកកម្មទៀត។
វិទ្យុបារាំងអន្តរជាតិមិនអាចសុំការបញ្ជាក់ពីរដ្ឋបាលរាជធានីភ្នំពេញបានទេ នៅថ្ងៃទី០៥ ខែកុម្ភៈនេះ ប៉ុន្តែតាមរយៈសេចក្តីប្រកាសព័ត៌មាននៅយប់ថ្ងៃទី០៤ ខែកុម្ភៈ ក្រុមគ្រូពេទ្យបានផ្លាស់ប្តូរទីតាំងយកសំណាកមកនៅកន្លែងប្រមូលផ្តុំធ្វើកូដកម្មជាក់ស្តែងតបទៅតាមការសំណូមពរ។ ប៉ុន្តែកូដករភាគច្រើននៅតែរឹងរូស មានៈ មិនព្រមសហការឱ្យយកសំណាក។
រដ្ឋបាលរាជធានីភ្នំពេញបានតម្រូវឲ្យបញ្ឈប់ជាបន្ទាន់ការប្រមូលផ្តុំធ្វើកូដកម្មរបស់បុគ្គលិកក្រុមហ៊ុនណាហ្គា ហើយត្រូវបន្តអនុវត្តតាមវិធានការសុខាភិបាល រហូតដល់ធានាថាលែងមានការឆ្លងជំងឺកូវីដចូលទៅក្នុងចំណោមកូដករ និងក្រុមគ្រួសារ។
សូមជម្រាបជូនថាការចុះយកសំណាកកូដករណាហ្គាវើលដ៏នាពេលនេះ ធ្វើឡើងក្រោយពីក្រសួងសុខាភិបាល បានប្រកាសរកឃើញកូដករណាហ្គាវើលវិជ្ជមានកូវីដ១៩ ប្រភេទអូមីក្រុងនាដើមសប្តាហ៍នេះ។ ប៉ុន្តែក្រុមកូដករធ្លាប់បានអះអាងថា អ្នកដែលវិជ្ជមានកូវីដ១៩ប្រភេទអូមីក្រុងនោះ មិនបានចូលរួមធ្វើកូដកម្មជាង៣សប្តាហ៍មកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ