ប្រតិបត្តិករទេសចរណ៍ថា ការផ្អាកប្រមូលពន្ធ៦ខែលើអាជីវកម្មទេសចរណ៍ គឺបានរួមចំណែកដល់ការរស់ឡើងវិញនៃវិស័យមួយនេះ
ប្រតិបត្តិករវិស័យទេសចរណ៍នៅថ្ងៃទី០៦មករានេះបានបញ្ជាក់ថា អាជីវកម្មទេសចរណ៍នឹងបន្តមានទឹកមាត់លេប និងអាចរឹងដៃរឹងជើងជាងមុន បន្ទាប់ពីរដ្ឋសម្រេចផ្អាកការប្រមូលពន្ធចំនួន៦ខែបន្ថែមទៀត។ ការផ្អាកប្រមូល៦ខែនេះ គឺអនុវត្តទៅលើសកម្មភាពអាជីវកម្មមួយចំនួនដូចជា សណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ជាដើម។ តែយ៉ាងណា ប្រតិបត្តិករទេសចរណ៍ ចង់ឃើញរដ្ឋពន្យាពេលប្រមូលពន្ធឱ្យកាន់តែយូរជាងនេះ ដើម្បីផ្តល់ពេលវេលាឱ្យប្រតិបត្តិករទេសចរណ៍អាចពង្រឹងខ្លួនឱ្យបានរឹងមាំជាមុនបន្តិច។
ចុះផ្សាយនៅថ្ងៃ៖
ស្តាប់ - ០២:៣២
យោងតាមសេចក្តីប្រកាសព័ត៌មានរបស់អគ្គនាយកពន្ធដារ ចាប់ពីខែ មករាដល់ខែ មិថុនា ឆ្នាំ២០២២ អាជីវកម្មទេសចរណ៍មួយចំនួនដូចជា ផ្ទះសំណាក់ សណ្ឋាគារ ភោជនីយដ្ឋាន និងក្រុមហ៊ុន រឺភ្នាក់ងារទេសចរណ៍ នឹងរួចការបង់ពន្ធចំនួន៦ខែ ដើម្បីជំរុញឱ្យអាជីវកម្មទេសចរណ៍ទាំងអស់អាចងើបឡើងវិញ និងដើម្បីចូលរួមពង្រឹងវិស័យទេសចរណ៍ដែលបានធ្លាក់ចូលក្នុងរណ្តៅអស់មួយរយៈពេលជិត២ឆ្នាំ។
ជុំវិញការផ្អាកប្រមូលពន្ធនេះ លោកស្រី ឆាយស៊ីវ លីន ប្រធានសមាគមទីភ្នាក់ងារទេសចរណ៍កម្ពុជាយល់ឃើញថា រដ្ឋបានចូលរួមចំណែកក្នុងការកាត់បន្ថយ និងការចំណាយផ្នែកហិរញ្ញវត្ថុរបស់អាជីវករទេសចរណ៍បានមួយកម្រិតទៀត ខណៈការស្តារអាជីវកម្មរបស់អាជីករនៅមិនទាន់មានភាពល្អប្រសើរនៅឡើយ ជាពិសេសក្នុងខេត្តសៀមរាប។ ខេត្តសៀមរាប ដែលលោកស្រីចង់សំដៅថា បានរងផលប៉ះពាល់ធ្ងន់ធ្ងរជាងគេលើវិស័យមួយនេះ។
តែយ៉ាងណា លោកស្រី ឆាយ ស៊ីវលីនអះអាងថា ការពន្យាពេលប្រមូលពន្ធចំនួន៦ខែនេះ គឺនៅមិនទាន់អាចបំពេញគ្រប់តម្រូវការដែលវិស័យទេសចរណ៍ធ្លាប់រងគ្រោះពីពេលកន្លងមកនោះទេ។ ដោយលោកស្រីលើកឡើងថា រដ្ឋគួរពិចារណាចំពោះការពន្យាពេលប្រមូលពន្ធនេះឱ្យកាន់តែយូរបន្ថែមទៀត ដើម្បីផ្តល់ឱកាសឱ្យប្រតិបត្តិករ សេវាករទេសចរណ៍ទាំងអស់មានពេលវេលាគ្រប់គ្រាន់ក្នុងស្តារអាជីវកម្មឱ្យរឹងដៃរឹងជើងជាមុនសិន។ មិនទាន់រឹងដៃរឹងជើង ក៏ព្រោះថា បញ្ហាកូវីដ១៩ និងវត្តមានភ្ញៀវទេសចរបរទេសនៅមិនទាន់មានភាពប្រាដកប្រជានៅឡើយ។
ដោយឡែកលោកស្រី ក្លេស ចិន្តា អនុប្រធានសមាគមសណ្ឋាគារកម្ពុជាវិញ ក៏បានបញ្ជាក់ប្រាប់វិទ្យុបារាំងអន្តរជាតិដែរថា បច្ចុប្បន្ននេះ អាជីវកម្មសណ្ឋាគារ និងភោជនីយដ្ឋានបានវិលត្រឡប់មកធ្វើប្រតិបត្តិការឡើងវិញច្រើនហើយ។ ក៏ប៉ុន្តែអាជីវកម្មមួយនេះ នៅបន្តប្រឈមខ្លាំងជាងបណ្តាអាជីវកម្មទេសចរណ៍ផ្សេងៗទៅវិញ។ បើតាម លោកស្រី ចិន្តា ផលប្រឈមខ្លាំងគឺដោយសារ អាជីវកម្មសណ្ឋាគារនេះអាចរីកធំធាត់បានដោយសារតែវត្តមានភ្ញៀវទេសចរចេញដើរលេងកម្សាន្តនាឱកាសពិធីបុណ្យធំៗតែប៉ុណ្ណោះ។ ដោយឡែក ប្រសិនបើគ្មានពិធីបុណ្យនោះទេ ម្ចាស់សណ្ឋាគារនឹងត្រូវបានបិទទ្វារទៅវិញ។
សូមជម្រាបថា ក្នុងរយៈពេលមួយខែដើមឆ្នាំ២០២២ បរិមាណភ្ញៀវទេសចរចេញដើរលេងកម្សាន្តនៅតាមទិសដៅទេសចរណ៍នានានៅទូទាំងប្រទេសមានចំនួនប្រមាណ ៣,១៥៨,៥៣៧នាក់។ នេះបើតាមរបាយការណ៍ពីក្រសួងទេសចរណ៍។ ក្រសួងទេសចរណ៍បន្តថា កំណើនគួរឱ្យកត់សម្គាល់នេះអាចចាត់ទុកថា ជាសញ្ញាវិជ្ជមាននៃការងើបឡើងវិញដ៏ឆាប់រហ័សនៃវិស័យទេសចរណ៍ផ្ទៃក្នុងសម្រាប់ឆ្នាំ២០២២នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ