កិច្ចប្រជុំពិសេសអាស៊ាន-អាមេរិក៖ លោកហ៊ុន សែន សង្ឃឹមថាទំនាក់ទំនងទាំងសងខាង កាន់តែរីកចម្រើន
លោកនាយករដ្ឋមន្ត្រី ហ៊ុន សែន ក្នុងនាមជាប្រធានអាស៊ាននៅឆ្នាំនេះ បានដាក់ក្តីសង្ឃឹមខ្លួនថា ទំនាក់ទំនងភាពជាដៃគូរវាងអាស៊ាន និងអាមេរិក កាន់តែមានភាពរីកចម្រើនបន្ថែមទៀត បន្ទាប់ពីកិច្ចប្រជុំកំពូលពិសេសអាស៊ាន-អាមេរិក ធ្វើឡើងរួចរាល់។ នេះគឺជាការបញ្ជាក់របស់លោក ហ៊ុន សែន នៅថ្ងៃ០១កុម្ភៈ ឆ្លើយតបទៅនឹងលិខិតរបស់លោក ចូ បៃដិន ប្រធានាធិបតីសហរដ្ឋអាមេរិក ដែលបានប្រកាសទន្ទឹងរង់ចាំធ្វើការជាមួយកម្ពុជានៅឆ្នាំនេះ។
ចុះផ្សាយនៅថ្ងៃ៖
ស្តាប់ - ០១:៥៥
«ក្នុងនាមកម្ពុជា ជាប្រធានអាស៊ានឆ្នាំ២០២២ ខ្ញុំសូមបញ្ជាក់សារជាថ្មី អំពីការប្តេជ្ញា និងការគាំទ្រយ៉ាងពេញទំហឹងចំពោះសហរដ្ឋអាមេរិក ក្នុងការរៀបចំកិច្ចប្រជុំកំពូលពិសេសអាស៊ាន-អាមេរិក នៅរដ្ឋធានីវ៉ាស៊ីនតោន»។ នេះគឺជាការអះអាងរបស់លោកនាយករដ្ឋមន្ត្រី ហ៊ុន សែន ឆ្លើយតបទៅនឹងការហៅទៅចូលរួមប្រជុំអាស៊ាន-អាមេរិក នៅទីក្រុងវ៉ាស៊ីនតោន ពីសំណាក់លោកប្រធានាធិបតី ចូ បៃឌិន។ ទោះយ៉ាងណាកិច្ចប្រជុំអាស៊ាន-អាមេរិក ដែលរៀបធ្វើឡើងនេះ នៅមិនទាន់កំណត់ពេលវេលាជាក់លាក់នៅឡើយនោះទេ។
សម្រាប់លោក ហ៊ុន សែន កិច្ចប្រជុំកំពូលពិសេសនេះ នឹងផ្តល់ប្រយោជន៍ដល់ភាគីទាំងសងខាងក្នុងការផ្លាស់ប្តូរយោបល់គ្នា ដើម្បីពង្រឹងកិច្ចទំនាក់ទំនងភាពជាដៃគូឲ្យកាន់តែរីកចម្រើន។ ក្នុងនាមជាប្រធានអាស៊ាននៅឆ្នាំនេះ លោកហ៊ុនសែន បានប្រកាសថា លោករង់ចាំធ្វើការជាមួយរដ្ឋបាលរបស់លោក ចូ បៃឌិន យ៉ាងជិតសិ្នទ្ធបំផុត។
ពីសេតវិមាន ថ្ងៃទី១៤មករា លោក ចូ បៃឌិន បានផ្ញើលិខិតមួយច្បាប់ដល់ប្រមុខរដ្ឋាភិបាលកម្ពុជា ដោយប្រកាសពីការទន្ទឹងរង់ចាំពេលវេលាធ្វើការជាមួយកម្ពុជាក្នុងរបត់ជាប្រធានអាស៊ានឆ្នាំនេះ។ លោក ចូ បៃឌិន បញ្ជាក់ជំហររបស់អាមេរិកថា ខ្លួនសង្ឃឹមថាទំនាក់ទំនងអាស៊ាន-អាមេរិកកាន់តែរីកចម្រើន និងសម្រេចបានគោលដៅរួមនៅក្នុងតំបន់។ ម៉្លោះហើយ សហរដ្ឋអាមេរិកនឹងរៀបចំកិច្ចប្រជុំកំពូលពិសេសអាស៊ាន-អាមេរិក នៅប៉ុន្មានខែខាងមុខ។ នេះបើតាមការបញ្ជាក់បន្ថែមរបស់លោក ចូ បៃឌិន។
ជាការកត់សម្គាល់ កិច្ចប្រជុំអាស៊ាន-អាមេរិក អាចនឹងត្រូវធ្វើឡើងក្រោយកិច្ចប្រជុំរដ្ឋមន្ត្រីការបរទេសអាស៊ាន។ បើតាមការបញ្ជាក់របស់លោក ហ៊ុន សែន ថ្លែងក្នុងពេលចុះពិនិត្យការដ្ឋានសាងសង់អាកាសយានដ្ឋានអន្តរជាតិតេជោក្រុងតាខ្មៅថ្មី កិច្ចប្រជុំអាស៊ាន-អាមេរិក នឹងធ្វើឡើងនៅអំឡុងខែកុម្ភៈនេះ។ កិច្ចប្រជុំនៅឆ្នាំនេះ ដែលអាចមានប្រធានបទជាច្រើនត្រូវពិភាក្សា មានដូចជា វិបត្តិនយោបាយភូមា បញ្ហាសមុទ្រចិនខាងត្បូង និងការស្តារឡើងវិញនូវសេដ្ឋកិច្ចក្រោយវិបត្តិកូវីដ១៩ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ