កូដករណាហ្កាវើលដ៍រងការឃាត់ខ្លួន ក្រោមការចោទប្រកាន់ថារារាំងវិធានការទប់ស្កាត់កូវីដ១៩
អាជ្ញាធរបានឃាត់ខ្លួនកូដករណាហ្កវើលដ៍៣នាក់ពីកន្លែងយកសំណាកកូវីដ១៩ កាលពីថ្ងៃទី០៥ ខែកុម្ភៈ ម្សិលមិញ តាមដីការបញ្ជាឱ្យចូលខ្លួនរបស់ព្រះរាជអាជ្ញាពាក់ព័ន្ធករណីរារាំងដល់ការអនុវត្តវិធានការទប់ស្កាត់ជំងឺកូវីដ។ នេះបើតាមការអះអាងរបស់អាជ្ញាធរ ខណៈក្រុមកូដករបញ្ជាក់ថាពួកគេមិនបានរារាំងវិធានការរបស់អាជ្ញាធរនោះទេ។
ចុះផ្សាយនៅថ្ងៃ៖
ស្តាប់ - ០២:០៨
កាលពីយប់ថ្ងៃទី០៥ ខែកុម្ភៈ មានកូដករណាហ្គាវើលដ៍យ៉ាងតិចចំនួន៦នាក់ ត្រូវបានឃាត់ខ្លួន ប៉ុន្តែត្រូវបានដោះលែងវិញភ្លាមៗចំនួន៣នាក់ ខណៈ៣នាក់ទៀតត្រូវបន្តឃាត់ខ្លួន។ អ្នកទាំង៣ ត្រូវបានឃាត់ខ្លួនតាមដីការបញ្ជាឱ្យចូលខ្លួនរបស់ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ។ នេះបើតាមស្នងការដ្ឋាននគរបាលរាជធានីភ្នំពេញ ដោយបានបន្ថែមថាអ្នកដែលត្រូវបានឃាត់ខ្លួន មាន៣នាក់ ដែលមានឈ្មោះ ជួប ចាន់ណាត ឈ្មោះ សេង វណ្ណរិទ្ធ និងឈ្មោះ សៅ សម្បត្ត គឺពាក់ព័ន្ធករណី រារាំងដល់ការអនុវត្តវិធានការទប់ស្កាត់ជំងឺកូវីដ-១៩ ដោយយោងលើមាត្រា១១ នៃច្បាប់ប្រយុទ្ធប្រឆាំងកូវីដ។
លោកសាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញបានបញ្ជាក់ប្រាប់វិទ្យុបារាំងអន្តរជាតិនៅថ្ងៃទី០៦ ខែកុម្ភៈ ថាកូដករ២នាក់ ដែលត្រូវបានឃាត់ខ្លួនតាមដីការបញ្ជា កំពុងស្ថិតនៅក្នុងដំណាក់កាលសួរនាំ និងអាចបញ្ជូនឲ្យតុលាការអនុវត្តបន្ត។ លោក សាន សុខសីហា បញ្ជាក់ទៀតថា បើមិនមានការរារាំងគឺមិនមានការឃាត់ខ្លួននោះទេ។
កូដករណាហ្គាវើលដ៍ម្នាក់សុំមិនបញ្ចេញឈ្មោះ បានបញ្ជាក់ប្រាប់វិទ្យុបារាំងអន្តរជាតិ នាថ្ងៃទី០៦ ខែកុម្ភៈនេះថា កូដករដែលឃាត់ខ្លួន គឺរងការចោទប្រកាន់ថាបានរាំរាំងវិធានការទប់ស្កាត់ជំងឺកូវីដ-១៩របស់អាជ្ញាធរ ប៉ុន្តែពួកគាត់ទាំងនោះសុទ្ធតែបានយកសំណាករកកូវីដ១៩អស់។ កូដករណាហ្គាវើលដ៍ បញ្ជាក់ថាពួកគេមិនបានរារាំងវិធានការទប់ស្កាត់កូវីដ១៩នោះទេ។
កូដករណាហ្គាវើលដ៍រូបនេះក៏បានអះអាងថា នៅថ្ងៃទី០៦ ខែកុម្ភៈ ពួកគាត់នៅតែបន្តទៅយកសំណាករកកូវីដ១៩ដដែល និងស្នើសុំឲ្យធ្វើកូដកម្មតទៅទៀត សម្រាប់អ្នកដែលអវិជ្ជមានកូវីដ១៩ ហើយអ្នកវិជ្ជមានកូវីដ១៩គឺសម្រាកព្យាបាល ដែលជាការអនុវត្តការរៀនរស់នៅក្នុងបរិបទថ្មីតាមការលើកឡើងរបស់នាយករដ្ឋមន្ត្រី។
រដ្ឋបាលរាជធានីភ្នំពេញនៅថ្ងៃទី០៥ ខែកុម្ភៈនេះ បានតម្រូវឲ្យបញ្ឈប់ជាបន្ទាន់ការប្រមូលផ្តុំធ្វើកូដកម្មរបស់បុគ្គលិកក្រុមហ៊ុនណាហ្គា ហើយត្រូវបន្តអនុវត្តតាមវិធានការសុខាភិបាល រហូតដល់ធានាថាលែងមានការឆ្លងជំងឺកូវីដចូលទៅក្នុងចំណោមកូដករ និងក្រុមគ្រួសារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ