លោក ហ៊ុន សែន ថាមិនឈឺក្បាលនឹងបញ្ហាភូមាទេ នៅតែជាង១០ខែទៀតកម្ពុជាលែងជាប្រធានអាស៊ាន
ប្រមុខរដ្ឋាភិបាលកម្ពុជានៅថ្ងៃចន្ទនេះ បានប្រើពេលជាច្រើន ដើម្បីបកស្រាយពីមូលហេតុដែលមិនអាចរកដំណោះស្រាយជូនប្រទេសភូមាបាន នៅក្នុងខណៈពេលដែលកម្ពុជាធ្វើជាប្រធានអាស៊ានឆ្នាំនេះ។ បើតាមលោក ហ៊ុន សែន លោកនឹងមិនឈឺក្បាលចំពោះជម្លោះនយោបាយនៅភូមាតទៅទៀតឡើយ ដោយសារតែនៅសល់ពេលជាង១០ខែទៀត កម្ពុជាត្រូវផុតអាណត្តិជាប្រធានអាស៊ានហើយ។
ចុះផ្សាយនៅថ្ងៃ៖
ស្តាប់ - ០២:១៣
នៅក្នុងពិធីសម្ពោធផ្លូវជាតិលេខ៧ ពីខេត្តក្រចេះទៅខេត្តស្ទឹងត្រែង នៅព្រឹកថ្ងៃទៅ៧កុម្ភៈ លោកប្រមុខរដ្ឋាភិបាលកម្ពុជាដែលជាប្រធានអាស៊ាន បានអះអាងថា លោកបានព្យាយាមអស់លទ្ធភាពហើយ ដើម្បីដោះស្រាយពីវិបត្តិនៅភូមាដែលអូសបន្លាយរាប់សិបឆ្នាំមកនេះ តែថាលោកនៅតែបំពេញតួនាទីជាប្រធានអាស៊ានលើបញ្ហាភូមារហូតដល់ចប់ភារកិច្ច។
លោក ហ៊ុន សែន អះអាងថា កម្ពុជាក្នុងនាមប្រធានអាស៊ាន ដែលសម្របសម្រួលចំពោះបញ្ហាមីយ៉ាន់ម៉ា គឺទទួលបានការគាំទ្រ ច្រើនជាងការរិះគន់ ខណៈប្រកាសថា លោកនៅរង់ចាំមើលពីការដោះស្រាយបញ្ហាភូមាដោយប្រទេសដទៃ។
ប្រទេសចិនកាលពីថ្ងៃទី១០ខែមករា តាមរយៈអ្នកនាំពាក្យនៃក្រសួងការបរទេសបានឆ្លើយសំណួរពាក់ព័ន្ធនឹងដំណើរទស្សនកិច្ចរបស់លោក ហ៊ុន សែន ទៅកាន់ប្រទេសភូមាថា ចិនគាំទ្រយ៉ាងពេញទំហឹងដល់កម្ពុជាដែលជាប្រធានប្តូរវេនអាស៊ានក្នុងការដើរតួនាទីស្វែងរកដំណោះស្រាយបញ្ហាខ្វែងគំនិតគ្នាលើវិបត្តិនយោបាយភូមា តាមរយៈការសន្ទនា។
ជាមួយគ្នានេះដែរ ប្រទេសឥណ្ឌាដែលមានភូមិផងរបងជាមួយនឹងភូមា បានអះអាងថា ខ្លួនកំពុងយកចិត្តទុកដាក់ពីស្ថានការណ៍នៅភូមា ព្រមទាំងគាំទ្រតួនាទីកម្ពុជាក្នុងនាមជាប្រធានអាស៊ាននៅឆ្នាំនេះ ខណៈដែលកម្ពុជាកំពុងស្វែងរកដំណោះស្រាយឲ្យភូមា។
ជម្លោះនយោបាយនៅភូមាដែលកើតមានរាប់ទស្សវត្សមកនេះ បើតាមលោក ហ៊ុន សែន គឺមិនដោះស្រាយចប់ត្រឹមតែក្នុងរយៈខ្លី ឬក្នុងពេលដែលកម្ពុជាធ្វើជាប្រធានអាស៊ាននេះឡើយ។ ដោយចោទសួរពីលទ្ធភាពផ្តួលរលំពួកយោធានៅភូមាដោយក្រុមប្រឆាំង លោក ហ៊ុន សែន បានប្រតិកម្មថា ក្រុមប្រឆាំងនៅភូមាមានការយល់ច្រឡំចំពោះគោលបំណងរបស់លោកដែលទៅជួបមេដឹកនាំយោធា ទើបពលរដ្ឋភូមានាំគ្នាជេរប្រមាថរូបលោក។
បើតាម លោក ហ៊ុន សែន ដើម្បីមានប្រជាធិតេយ្យ និងសិទ្ធិមនុស្សទៅបានលុះត្រាតែសង្គ្រាមត្រូវបានបញ្ជប់ជាមុនសិន។ លោក ហ៊ុន សែន អះអាងថា ការដែលរបបសឹកយល់ព្រមដោះលែងសាស្ត្រាចារ្យម្នាក់សញ្ជាតិអូស្ត្រាលីដែលជាមនុស្សរបស់លោកស្រី អង់សាន ស៊ូជី គឺដោយសារតែមានអន្តរាគមន៍របស់ប្រធានអាស៊ានដែលបានលើកឡើងនៅចំពោះមុខ លោក មិនអ៊ុង ឡាំង នៅក្នុងដំណើរទស្សនកិច្ចនៅភូមាកាលពីដើមខែមករា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ