ពលរដ្ឋខ្មែរនៅក្រៅប្រទេសគ្រោងបាតុកម្មប្រឆាំង លោក ហ៊ុន សែន ពេលទៅប្រជុំកំពូលអាស៊ាន-អាមេរិក
ពលរដ្ឋខ្មែរមួយចំនួននៅសហរដ្ឋអាមេរិក អះអាងថា ពួកគេបានត្រៀមខ្លួនរួចជាស្រេច ដើម្បីធ្វើបាតុកម្មប្រឆាំងនឹងលោកនាយករដ្ឋមន្ត្រី ហ៊ុន សែន នៅពេលប្រធានអាស៊ានប្តូរអាស៊ានទៅចូលរួមកិច្ចប្រជុំកំពូលអាស៊ាន-អាមេរិកនៅពេលខាងមុខ។ ប៉ុន្តែអ្នកនាំពាក្យគណបក្សកាន់អំណាច ចាត់ទុកថា ប្រសិនបើពលរដ្ឋខ្មែរមួយចំនួនធ្វើបាតុកម្មប្រឆាំងនឹងវត្តមានប្រមុខរដ្ឋាភិបាលខ្មែរ គឺស្មើនឹងធ្វើបាតុកម្មប្រឆាំងនឹងប្រធានាធិបតីអាមេរិកអញ្ចឹងដែរ។
ចុះផ្សាយនៅថ្ងៃ៖
ស្តាប់ - ០១:៥៥
ពលរដ្ឋខ្មែរមួយចំនួនរស់នៅសហរដ្ឋអាមេរិក អះអាងថា គម្រោងធ្វើបាតុកម្មប្រឆាំងនឹងវត្តមានរបស់លោកនាយករដ្ឋមន្ត្រី ហ៊ុន សែន នៅពេលខាងមុខ ដោយសារតែពួកគេ យល់ថា រដ្ឋាភិបាលកម្ពុជាបានបំផ្លាញប្រជាធិបតេយ្យ និងផ្អៀងទៅចិន ដើម្បីផលប្រយោជន៍គ្រួសារអ្នកមានអំណាច ដោយមិនគិតគួរពីផលប្រយោជន៍របស់ពលរដ្ឋខ្មែរ។ ការរំលាយបក្សប្រឆាំង ការចាប់ខ្លួនសកម្មជននយោបាយ និងសកម្មជនសង្គម រួមទាំងករណីចាប់ខ្លួនបុគ្គលិកក្រុមហ៊ុនណាហ្គាវើលដ៍ គឺជាកម្មវត្ថុដែលធ្វើឲ្យពលរដ្ឋខ្មែរមួយចំនួននៅក្រៅស្រុកមានការខឹងសម្បារ ហើយលើកទឹកចិត្តឲ្យពួកគេត្រៀមធ្វើបាតុកម្មនេះ។
ការប្រកាសត្រៀមបាតុកម្មជាថ្មីប្រឆាំងនឹងវត្តមាន លោក ហ៊ុន សែន នៅពេលនេះធ្វើឡើង បន្ទាប់ពីលោកប្រមុខរដ្ឋាភិបាលកម្ពុជា ដែលជាប្រធានអាស៊ានបានបញ្ជាក់ជំហរថា លោកបានសរសេរលិខិតឆ្លើយតបនឹងប្រធានាធិបតីសហរដ្ឋអាមេរិក លោក ចូ ប៉ៃឌិន ដែលបានអញ្ជើញលោកទៅចូលរួមកិច្ចកំពូលអាស៊ាន-អាមេរិកដែលនឹងធ្វើនៅពេលខាងមុខនេះ។
ជាការកត់សំគាល់ បាតុកម្មប្រឆាំងនឹងវត្តមាន លោក ហ៊ុន សែន នៅក្រៅប្រទេស គឺមិនមែនជារឿងថ្មីទេ។ កាលពីខែកញ្ញាឆ្នាំ២០១៨ ពលរដ្ឋខ្មែរនៅអាមេរិក និងនៅអឺរ៉ុប ដែលជាអ្នកគាំទ្រគណបក្សប្រឆាំង ក៏បានធ្វើបាតុកម្មប្រឆាំង លោក ហ៊ុន សែន នៅពេលដែលលោកទៅចូលរួមកិច្ចប្រជុំមហាសន្និបាតលើកទី៧៣របស់អង្គការសហប្រជាជាតិ។
ប៉ុន្តែតាមរយៈបណ្តាញសង្គមតេឡេក្រាម នៅថ្ងៃ៧ កុម្ភៈ លោក សុខ ឥសាន បានចាត់ទុកគម្រោងបាតុកម្មជាថ្មីប្រឆាំងនឹងវត្តមានប្រធានអាស៊ាននៅពេលនេះថា ប្រៀបដូចជាបាតុកម្មប្រឆាំងនឹង លោក ចូ បៃដិន អញ្ចឹងដែរ ដោយសារតែប្រធានាធិបតីអាមេរិករូបនេះជាអ្នកអញ្ជើញប្រធានអាស៊ានទៅចូលរួមកិច្ចប្រជុំនេះ។ បើតាមអ្នកនាំពាក្យគណបក្សប្រជាជនកម្ពុជា ដំណើរទៅអាមេរិក ក្នុងរយៈពេលដ៏ខ្លីខាងមុខនេះ របស់ប្រមុខរដ្ឋាភិបាលកម្ពុជា គឺជាកិត្តិយសទៅវិញទេ ដែលត្រូវបានលោកប្រធានាធិបតីអាមេរិកអញ្ជើញជាផ្លូវការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ