អភិបាលរងខេត្តបន្ទាយមានជ័យ៖ ការបើកច្រកព្រំដែនប៉ោយប៉ែតអាស្រ័យលើភាគីថៃ
ច្រកព្រំដែនសេដ្ឋកិច្ចប៉ោយប៉ែតស្ថិតនៅក្នុងខេត្តបន្ទាយមានជ័យនៃប្រទេសកម្ពុជា ឈមនឹងខេត្តស្រះកែវរបស់ថៃ នៅមិនទាន់អាចបើកដំណើរការឡើងវិញបាននៅឡើយមកទល់បច្ចុប្បន្ននេះ បន្ទាប់ពីច្រកទ្វារដ៏សំខាន់នេះត្រូវបានបិទកាលពីពាក់កណ្តាលឆ្នាំកន្លងទៅ។ លោក លី សុវណ្ណារិទ្ធ អភិបាលរងខេត្តបន្ទាយមានជ័យបានថ្លែងនៅក្នុងសន្និសីទកាសែត ដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាលនាព្រឹកថ្ងៃអង្គារនេះថា ការបើកច្រកប៉ោយប៉ែតឡើងវិញគឺអាស្រ័យទៅលើភាគីថៃ ខណៈដែលថៃកំពុងប្រឈមនឹងការឆ្លងរាតត្បាតជំងឺកូវីដ-១៩។ ដោយឡែកចំពោះពលករខ្មែរចំណាកស្រុកត្រលប់មកពីប្រទេសថៃវិញ គឺត្រូវបានកត់សម្គាល់ថាមានក្នុងរង្វង់ពី៣០០ ទៅ៥០០នាក់ក្នុង១ថ្ងៃ ដែលក្នុងនោះអាជ្ញាធរបានពិនិត្យសំណាករកកូវីដ-១៩ យ៉ាងយកចិត្តទុកដាក់។
ចុះផ្សាយនៅថ្ងៃ៖
សូមស្តាប់លោក លី សុវណ្ណារិទ្ធ៖
សូមរំលឹកថាដោយសារតែការឆ្លងរាលដាលនៃជំងឺកូវីដ-១៩ ច្រកទ្វារប៉ោយប៉ែត និងច្រកទ្វារផ្សេងៗទៀត ដែលជាច្រកសេដ្ឋកិច្ចដ៏សំខាន់នៃលំហូរទំនិញខ្មែរ-ថៃ ត្រូវបានអាជ្ញាធរខេត្តជាប់ព្រំដែនទាំងពីរប្រកាសបិទចាប់តាំងពីខែកក្កដា ឆ្នាំ២០២១។ អាជ្ញាធរខេត្តជាប់ព្រំដែន រួមមានខេត្តបាត់ដំបង ខេត្តបន្ទាយមានជ័យរបស់កម្ពុជា និងខេត្តស្រះកែវរបស់ថៃ កាលពីចុងឆ្នាំ ២០២១ បានជួបពិភាក្សាគ្នាម្តងហើយស្តីពីលទ្ធភាពបើកច្រកទ្វារព្រំដែនឡើងវិញ ដែលភាគីទាំង២ រំពឹងថានឹងអាចធ្វើឡើងនៅអំឡុងខែមករាឆ្នាំ២០២២នេះ។ ក៏ប៉ុន្តែស្ថានភាពជំងឺកូវីដ-១៩ មិនទាន់ស្ងប់ស្ងាត់នៅឡើយនៅប្រទេសថៃ ជាហេតុធ្វើឲ្យថៃបិទច្រកព្រំដែនបន្តទៀតដោយគ្មានកាលកំណត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ