កម្ពុជាកោះប្រជុំចង្អៀតរដ្ឋមន្ត្រីការបរទេសអាស៊ានជាថ្មី ក្រោយខកខានដ៏ចម្រូងចម្រាសកាលពីខែមករា
ក្រសួងការបរទេស និងសហប្រតិបត្តិការអន្តរជាតិនៃកម្ពុជា នៅថ្ងៃទី១០ ខែកុម្ភៈនេះ បានចេញសេចក្តីប្រកាសផ្លូវការ អំពីការរៀបចំកិច្ចប្រជុំចង្អៀតរដ្ឋមន្រ្តីការបរទេសអាស៊ាន(AMMR) ពីថ្ងៃទី១៥-១៧ ខែកុម្ភៈ ឆ្នាំ២០២២ ខាងមុខ នៅរាជធានីភ្នំពេញ តាមរយៈការចូលរួមដោយផ្ទាល់ និងតាមអនឡាញ។ ការប្រកាសរៀបចំកិច្ចប្រជុំចង្អៀតរដ្ឋមន្ត្រីការបរទេសអាស៊ានរបស់កម្ពុជានៅពេលនេះ គឺធ្វើឡើងបន្ទាប់ពីកិច្ចប្រជុំដែលបានគ្រោងឡើងនៅខែមករា កន្លងទៅនៅខេត្តសៀមរាបត្រូវបានលើកពេល។
ចុះផ្សាយនៅថ្ងៃ៖
ស្តាប់ - ០២:៤៣
ជាថ្មីម្តងទៀតក្រសួងការបរទេសកម្ពុជាបានសម្រេចយកថ្ងៃទី១៥ដល់១៧ ខែកុម្ភៈសប្តាហ៍ក្រោយបើកកិច្ចប្រជុំចង្អៀតរដ្ឋមន្រ្តីការបរទេសអាស៊ាន ដែលនឹងត្រូវដឹកនាំដោយលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា។
យោងតាមសេចក្តីប្រកាសព័ត៌មានរបស់ក្រសួងការបរទេស កិច្ចប្រជុំចង្អៀតនេះ នឹងពិនិត្យមើលឡើងវិញនូវការសម្រេចនានារបស់ថ្នាក់ដឹកនាំនៅក្នុងកិច្ចប្រជុំកំពូលអាស៊ានលើកទី៣៨ និងលើកទី៣៩ ធ្វើការផ្លាស់ប្តូរទស្សនៈគ្នាលើមធ្យោបាយដើម្បីពង្រឹងបន្ថែមទៀតទំនាក់ទំនងខាងក្រៅជាមួយដៃគូសន្ទនានានា ខណៈពេលថែរក្សា និងលើកកម្ពស់មជ្ឈភាព សាមគ្គីភាព និងឯកភាពអាស៊ាន ព្រមទាំងពិភាក្សាគ្នាអំពីរបៀប និងវិធីសាស្រ្ត ដើម្បីកៀរគរកិច្ចខិតខំប្រឹងប្រែងរួមគ្នាក្នុងការកសាងសហគមន៍អាស៊ានមួយដែលកាន់ តែធន់រឹងមាំឡើង ប្រកបដោយថាមពល ពោរពេញដោយសន្តិភាព និងវិបុលភាព។
សេចក្តីប្រកាសរបស់ក្រសួងការបរទេសបន្តថា លោក ប្រាក់ សុខុន នឹងជម្រាបជូនអង្គប្រជុំអំពីសមិទ្ធផលសំខាន់ៗ ដែលនឹងត្រូវសម្រេចបានក្នុងអំឡុងពេលភាពជាប្រធានអាស៊ានរបស់កម្ពុជា ក្រោមមូលបទ «អាស៊ាន រួមគ្នាធ្វើ៖ ដោះស្រាយបញ្ហាប្រឈមទាំងអស់គ្នា» ដើម្បីឆ្លើយតបទៅនឹងបញ្ហាប្រឈមជាយុទ្ធសាស្រ្ត ដែលកំពុងកើតឡើងនៅក្នុងតំបន់ រួមមាន ការគ្រប់គ្រងជំងឺរាតត្បាតកូវីដ-១៩ ប្រកបដោយប្រសិទ្ធភាព និងដំណើរការស្តារឡើងវិញប្រកបដោយបរិយាប័ន្ន ការប្រកួតប្រជែងភូមិសាស្រ្ត-នយោបាយ បញ្ហាជាប្រពៃណី និងមិនប្រពៃណីដែលមានស្រាប់ និងការពង្រឹងភាពស្អិតរមួត មជ្ឈភាព និងភាពធន់រឹងមាំ របស់អាស៊ាន។
សូមរំលឹកថាកម្ពុជាបានប្រកាសលើកពេលម្តងហើយកិច្ចប្រជុំចង្អៀតរដ្ឋមន្ត្រីការបរទេសអាស៊ាននេះ ដែលគ្រោងរៀបចំធ្វើនៅថ្ងៃទី ១៨-១៩ ខែមករា ឆ្នាំ២០២២ នៅក្នុងខេត្តសៀមរាប ដោយមូលហេតុ រដ្ឋមន្ត្រីការបរទេសអាស៊ានជាច្រើនរូប មានការលំបាកក្នុងការធ្វើដំណើរមកចូលរួម។
ក៏ប៉ុន្តែអ្នកវិភាគនយោបាយតំបន់ និងប្រព័ន្ធផ្សព្វផ្សាយបរទេសមួយចំនួនបានលើកឡើងថា ការមិនមកចូលរួមរបស់រដ្ឋមន្ត្រីការបរទេសខ្លះកាលពីខែមករា គឺជាលេស ដែលចង់គេចវេស ខណៈមានការសង្ស័យថាកម្ពុជា ដែលជាប្រធានអាស៊ាន អាចអនុញ្ញាតឲ្យប្រទេសភូមាចូលរួមកិច្ចប្រជុំដ៏សំខាន់នេះ។ជាមួយគ្នានោះ ប្រធានាធិបតីឥណ្ឌូនេស៊ី បានសរសេរនៅលើទំព័រ Twitter របស់លោកថា ប្រសិនបើមិនមានវឌ្ឍនភាពគួរឲ្យកត់សម្គាល់ទៅលើ៥ចំណុច ដែលអាស៊ានបានឯកភាពគ្នាទេ តំណាងរបស់ប្រទេសភូមា អាចចូលរួមប្រជុំអាស៊ានបាន ត្រឹមកម្រិតមិនមែននយោបាយប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ