លោក ហ៊ុន សែន នឹងបង្ហាញពីការស្វែងរកសន្តិភាពរបស់លោក ខណៈលោកចូលរួមកិច្ចប្រជុំកំពូលសន្តិភាពពិភពលោកនៅកូរ៉េ
លោកនាយករដ្ឋមន្ត្រី ហ៊ុន សែន នៅព្រឹកថ្ងៃព្រហស្បតិ៍នេះ បានធ្វើដំណើរចាកចេញពីប្រទេសកម្ពុជាទៅដល់ប្រទេសកូរ៉េខាងត្បូងហើយ ដើម្បីបំពេញទស្សនកិច្ចជាផ្លូវការចាប់ពីថ្ងៃទី១០ ដល់ថ្ងៃ១៣ ខែកុម្ភៈ និងធ្វើជាសហប្រធានកិច្ចប្រជុំកំពូលសន្តិភាពពិភពលោកឆ្នាំ ២០២២នេះ។ ក្រៅពីកម្មវិធីធំៗទាំងនេះ លោកនាយករដ្ឋមន្ត្រី ក៏មានជំនួបទ្វេភាគីជាមួយប្រធានាធិបតីកូរ៉េបច្ចុប្បន្ន និងអតីតអគ្គលេខាធិការអង្គការសហប្រជាជាតិ ខណៈដែលលោកក៏ត្រូវទទួលពានរង្វាន់សន្តិភាពស៊ុនហាក់ លើកទី៥ ផងដែរ។
ចុះផ្សាយនៅថ្ងៃ៖
ស្តាប់ - ០២:០២
អមដំណើរដោយលោក សួស យ៉ារ៉ា ប្រធានគណៈកម្មាធិការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី ព្រមទាំងមន្ត្រីជាន់ខ្ពស់រដ្ឋាភិបាល និងរដ្ឋសភាមួយចំនួនទៀត លោកនាយករដ្ឋមន្ត្រី ហ៊ុន សែន បានទៅដល់សាធារណរដ្ឋកូរ៉េហើយនៅថ្ងៃនេះ បន្ទាប់ពីចាកចេញពីកម្ពុជាកាលពីព្រឹកមិញនេះ។
វត្តមានរបស់លោក ហ៊ុន សែន រយៈពេល៣ថ្ងៃ ត្រូវបានរំលេចតាមរយៈក្រសួងការបរទេសកម្ពុជាថា លោកនឹងមានជំនួបពិភាក្សាស្តីពីកិច្ចសហប្រតិបត្តិការទ្វេភាគីជាមួយលោក មូន ចេអ៊ីន ប្រធានាធិបតីកូរ៉េខាងត្បូងផ្តោតទៅលើវិស័យនយោបាយ សេដ្ឋកិច្ច និងសង្គម វប្បធម៌ និងមានការផ្លាស់ប្តូរទស្សនៈគ្នាលើបញ្ហាតំបន់ និងអន្តរជាតិ ដែលជាកង្វល់ និងចំណាប់អារម្មណ៍រួម។
ក្រៅពីនេះ លោកនាយករដ្ឋមន្ត្រី ក៏មានជំនួបជាមួយលោក បាន គីមូន អតីតអគ្គលេខាធិការអង្គការសហប្រជាជាតិផងដែរ មុននឹងឈានដល់កិច្ចប្រជុំកំពូលសន្តិភាពពិភពលោកឆ្នាំ ២០២២ ក្រោមមូលបទ«ឆ្ពោះទៅកាន់សន្តិភាពនៅឧបទ្វីបកូរ៉េ» និងមានការប្រកាសជូនរង្វាន់ស៊ុនហាក់ លើកទី៥ដល់លោក ហ៊ុន សែនជាមួយគ្នានោះ។ ហ្វេសប៊ុករបស់លោក ហ៊ុន សែន ក៏បានសរសេរដែរថា នៅក្នុងកិច្ចប្រជុំកំពូលសន្តិភាពពិភពលោកឆ្នាំ២០២២នេះ នឹងមានការចូលរួមពីបណ្តាវាគ្មិនសំខាន់ៗ និងអ្នកចូលរួមមកពី១៥៧ប្រទេស ដើម្បីស្វែងរកក្តីសង្ឃឹមក្នុងការបង្រួបបង្រួមឧបទ្វីបកូរ៉េប្រកបដោយសន្តិវិធី។
លោក ស្រ៊ី ថាមរ៉ុង រដ្ឋមន្ត្រីប្រតិភូអមនាយករដ្ឋមន្ត្រី បានថ្លែងប្រាក់អ្នកកាសែតនៅព្រលានយន្តហោះអន្តរជាតិភ្នំពេញយ៉ាងខ្លីថា លោកនាយករដ្ឋមន្ត្រី ហ៊ុន សែន នឹងថ្លែងសុន្ទរកថាត្រួសៗ អំពីការតស៊ូរបស់លោក ក្នុងការស្វែងរកសន្តិភាពនៅកម្ពុជា អំឡុងពេលទទួលមេដាយពានរង្វាន់កិត្តិយសរបស់ស្ថាបនិក នៃពានរង្វាន់សន្តិភាពស៊ុនហាក់ ឆ្នាំ២០២២ នៅប្រទេសកូរ៉េ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ