ក្រសួងសេដ្ឋកិច្ចដាក់យន្តការ៨ចំណុច ដើម្បីពង្រឹងការប្រមូលពន្ធគយក្នុងឆ្នាំ២០២២ឱ្យមានប្រសិទ្ធភាព
ក្រសួងសេដ្ឋកិច្ចនិងហិរញ្ញវត្ថុ បានសម្រេចដាក់ចេញនូវទិសដៅការងារសំខាន់ៗចំនួន៨ចំនុច ដើម្បីបង្កើតសមត្ថភាពការងារប្រមូលគយរបស់អគ្គនាយកដ្ឋានគយនិងរដ្ឋករកម្ពុជា ឱ្យកាន់តែមានប្រសិទ្ធភាពខ្ពស់ក្នុងឆ្នាំ២០២២នេះ។ ទិសដៅទាំង៨ចំណុចនេះ ធ្វើឡើងក្រោយការប្រមូលគយនាឆ្នាំ២០២១កន្លងទៅ សម្រេចបានត្រឹមតែ៩៧,១ %នៃផែនការដែលកំណត់តែប៉ុណ្ណោះ ដោយថយចុះចំនួន៥,១%។
ចុះផ្សាយនៅថ្ងៃ៖
ស្តាប់ - ០២:៤៦
ទិសដៅសំខាន់ទាំង៨ចំនុចដែលក្រសួងសេដ្ឋកិច្ច និងហិរញ្ញវត្ថុបានកំណត់ឱ្យអគ្គនាយកដ្ឋានគយនិងរដ្ឋាករសម្រាប់អនុវត្តក្នុងឆ្នាំ២០២២នេះរួមមាន៖ បន្តពង្រឹងការងារបច្ចេកទេសគយ និងការប្រើប្រាស់ប្រព័ន្ធបច្ចេកវិទ្យាដើម្បីលើកកម្ពស់ប្រសិទ្ធភាពនិងផលិតភាពការងារ, បន្តជំរុញអនុវត្តឱ្យម៉ឹងម៉ាត់ និងមានប្រសិទ្ធភាពការងារប្រមូលពន្ធអាកររថយន្តគ្មានពន្ធមានស្រាប់ក្នុងស្រុក, បន្តសម្របសម្រួលជាមួយស្ថាប័នមានសមត្ថកិច្ចពាក់ព័ន្ធនឹងការទប់ស្កាត់អំពើរត់គេចពន្ធ និងបន្តកិច្ចសហការល្អជាមួយផ្នែកឯកជន។
បន្ថែមពីនេះអគ្គនាយកដ្ឋានគយនិងរដ្ឋករ ត្រូវយកចិត្តទុកដាក់អនុវត្តយុទ្ធសាស្ត្របច្ចេកវិទ្យាគមនាគមន៍និងព័ត៌មានរបស់អគ្គនាយកគយនិងរដ្ឋាករកម្ពុជាពិសេសការអនុវត្តប្រព័ន្ធបញ្ជរតែមួយជាតិ បន្តធ្វើសាមញ្ញកម្មនីតិវិធី ស្របតាមជំនួយបច្ចេកទេស លើកកម្ពស់ប្រសិទ្ធភាពការងារបង្ការនិងបង្ក្រាបបទល្មើសឱ្យបានសកម្មដូចភ្លៀងរលឹមទាំងនៅដើមទី កណ្តាលទី និងចុងទី ដោយរាប់បញ្ចូលទាំងការ បង្ក្រាបទំនិញ ក្លែងក្លាយ, ទំនិញល្មើសសិទ្ធិចែកចាយផ្ដាច់មុខ, ទំនិញដែលអាចត្រូវបានប្រើប្រាស់ជាវត្ថុធាតុដើមសម្រាប់ផលិតគ្រឿងញៀន, និងការសហការ ជាមួយ អង្គភាព ពាក់ព័ន្ធ ក្នុងការកំណត់មុខសញ្ញាករណីសង្ស័យបទល្មើស សម្អាតប្រាក់ជ្រកក្រោមរូបភាពពាណិជ្ជកម្ម។
ជាក់ស្តែង ការដាក់ចេញនូវទិសដៅខាងដើមរបស់ក្រសួងសេដ្ឋកិច្ច និងហិរញ្ញវត្ថុនេះ ធ្វើឡើងបន្ទាប់ពីអគ្គនាយកដ្ឋានគយនិងរដ្ឋករ ក្នុងឆ្នាំ២០២១កន្លងទៅ ប្រមូលចំណូលគយបានចំនួនជិត២ពាន់៣រយលានដុល្លារប៉ុណ្ណោះ (២,២៩៥.២ លានដុល្លារអាមេរិក) ដោយចំនួននេះថយចុះប្រមាណ ៥.១% បើធៀបនឹងចំណូលប្រមូលបានក្នុងឆ្នាំ២០២០។ លទ្ធផលនេះ គឺសម្រេចបានចំនួន ៩៧.១% នៃផែនការដែលកំណត់ដោយច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២១ ខណៈគោលដៅទាំងមូលគឺធ្វើយ៉ាងណាឱ្យបាន២.៣៦៣លានដុល្លារ។
ទោះបីការប្រមូលគយមិនសម្រេចដល់គោលដៅយ៉ាងណាក្តី ក៏ប៉ុន្តែការប្រមូលចំណូលពន្ធ-អាកររបស់អគ្គនាយកដ្ឋានពន្ធដារវិញ សរុបបានចំនួនប្រមាណជាង២,៧ពាន់លានដុល្លារ ស្មើនឹង១២៤, ០២% ដោយកើនលើសផែនការច្បាប់ហិរញ្ញវត្ថុឆ្នាំ២០២១ចំនួន២៤ ០២%។
សម្រាប់ទិសដៅផែនការគ្រប់គ្រងនិងការប្រមូលចំណូលពន្ធក្នុងឆ្នាំ២០២២នេះវិញ អគ្គនាយកដ្ឋានពន្ធដារក៏បានដាក់ចេញនូវគោលការណ៍យុទ្ធសាស្ត្រសំខាន់ៗមួយចំនួនថែមទៀតផងដែររួមមានជាអាទិ៍៖ បន្តរៀបចំយន្តការគ្រប់គ្រងចំណូលពន្ធក្នុងវិស័យធំៗ ដែលមានសក្តានុពលសម្រាប់ចំណូលពន្ធ ការបន្តរៀបចំសេចក្តីព្រាងច្បាប់ថ្មីស្តីពីសារពើពន្ធថ្មី បន្តអនុវត្តវិធានការទារបំណុលពន្ធរុំាំរ៉ៃ ដែលសហគ្រាសរឹងរូសពុំព្រមចូលមកទូទាត់បំណុលពន្ធ ការបន្តធ្វើទំនើបកម្មប្រព័ន្ធបច្ចេកវិទ្យាព័ត៌មាន និងជំរុញសហគ្រាសក្នុងវិស័យល្បែងពាណិជ្ជកម្ម(កាស៊ីណូ) ចូលខ្លួនមកចុះបញ្ជីពន្ធដារជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ