កម្មករនិយោជិតណាហ្គាវើលដ៍ថាគ្រោងធ្វើកូដកម្មឡើងវិញក្រោយផុតវិធានការចត្តាឡីស័ក
កម្មករនិយោជិតណាហ្គាវើលដ៍រក្សាគោលជំហរបន្តធ្វើកូដកម្ម នៅពេលដែលពួកគាត់រួចផុតពីវិធានការចត្តាឡីស័ក។ នេះជាការលើកឡើងរបស់កូដករណាហ្គាវើលដ៍ម្នាក់នៅថ្ងៃទី១៣ ខែកុម្ភៈនេះ ដោយអះអាងទៀតថាពួកគាត់នឹងធ្វើកូដកម្មរហូតមានដំណោះស្រាយ។ ប៉ុន្តែអភិបាលក្រុងភ្នំពេញថាអ្វីដែលពួកគាត់ធ្វើមិនមែនជាកូដកម្មទេ តែជាបាតុកម្ម ដូច្នេះត្រូវស្នើសុំការអនុញ្ញាតពីសាលាក្រុង។
ចុះផ្សាយនៅថ្ងៃ៖
និយោជិតណាហ្គាវើលដ៍ម្នាក់ ដែលសុំមិនបញ្ចេញឈ្មោះ បានបញ្ជាក់ប្រាប់វិទ្យុបារាំងអន្តរជាតិ នៅថ្ងៃទី១៣ ខែកុម្ភៈនេះថា ពួកគាត់មិនបានកំណត់ថ្ងៃច្បាស់នៅឡើយថានឹងធ្វើកូដកម្មនាពេលណានោះ ដោយសារតែការយកសំណាកបានធ្វើឡើង កាលពីថ្ងៃទី៥ រហូតដល់ថ្ងៃទី០៧ ខែកុម្ភៈ កន្លងទៅ។ ដូច្នេះ ពួកគាត់ត្រូវបន្តរងចាំលទ្ធផលតេស្តកូវីដ១៩ រហូតដល់ថ្ងៃទី១៦ ខែកុម្ភៈ ទើបរួចផុតវិធានការចត្តាឡីស័ករបស់ក្រសួងសុខាភិបាល។
និយោជិតរូបនេះ បញ្ជាក់ថាពួកគាត់នឹងបន្តធ្វើកូដកម្មរហូតដល់មានដំណោះស្រាយ។ ដំណោះស្រាយដែលលោកស្រីលើកឡើងរួមមានការដោះលែងថ្នាក់ដឹកនាំសហជីព និងសកម្មជនសហជីព ដែលត្រូវបានអាជ្ញាធរចាប់ខ្លួន និងចរចាបញ្ចប់វិវាទការងារ ដែលបន្តអូសបន្លាយរាប់ខែមកហើយនោះ។ លោកស្រីបានលើកឡើងពីក្តីបារម្ភចំពោះការចោទប្រកាន់ និងចាប់ខ្លួនកូដករ ៣នាក់ កាលពីថ្ងៃទី០៥ ខែកុម្ភៈ ហើយបើទោះជាមានការចាប់ខ្លួន ៤នាក់ថែមទៀត នោះក្រុមកម្មករនិយោជិតណាហ្គាវើលដ៍នៅបន្តធ្វើការតវ៉ាដដែល។
អភិបាលរាជធានីភ្នំពេញ លោក ឃួង ស្រេង បានថ្លែងប្រាប់វិទ្យុបារាំងអន្តរជាតិ នៅថ្ងៃទី១៣ ខែកុម្ភៈ ថា រដ្ឋបាលរាជធានីភ្នំពេញមិនហាមឃាត់ទេ ការធ្វើកូដកម្ម ប៉ុន្តែការធ្វើបាតុកម្មវិញ គឺតម្រូវឲ្យមានការស្នើសុំមកអាជ្ញាធរជាមុនសិន។ បើតាមលោក ឃួង ស្រេង ការធ្វើសកម្មភាពតវ៉ានៅទីសាធារណៈគឺជាសកម្មភាពបាតុកម្ម។
បើតាមអភិបាលរាជធានីភ្នំពេញរូបនេះ ទីក្រុងធំៗនៃប្រទេសប្រជាធិបតេយ្យ អាជ្ញាធរបានរៀបចំទីកន្លែងសម្រាប់ឲ្យប្រជាពលរដ្ឋសម្តែងមតិ ជាក់ស្តែងរាជធានីភ្នំពេញមានទីតាំងមួយសម្រាប់សម្តែងមតិ ដូច្នេះពួកគាត់មិនអាចនឹកឃើញធ្វើនៅទីតាំងណាក៏បាននោះទេ។ លោកបន្តថា ទោះបីពួកគាត់រួចផុតពីចត្តាឡីស័ក ក៏ពួកគាត់មិនអាចធ្វើសកម្មភាពនៅតាមដងផ្លូវ ឬសួនសាធារណៈបានទៀតដែរ ពោលគឺពួកគាត់ត្រូវដាក់លិខិតមកសាលារាជធានី ទើបមានការចង្អុលបង្ហាញទីតាំងឲ្យពួកគាត់ ហើយម្យ៉ាងទៀតមិនអាចមានការធ្វើសកម្មភាព មួយខែទល់មួយខែ ឬមួយឆ្នាំទល់មួយឆ្នាំទេ ត្រូវមានរយៈពេលទៅតាមច្បាប់សម្តែងមតិ។
កាលពីថ្ងៃទី៥ ដល់ថ្ងៃទី០៧ ខែកុម្ភៈ កន្លងទៅ ក្រុមកម្មករនិយោជិតនៃក្រុមហ៊ុនកាស៊ីណូណាហ្គាវើលដ៍បានយកសំណាកតាមសេចក្តីប្រកាសរបស់អាជ្ញាធរសុខាភិបាល។ ក្នុងថ្ងៃដដែលនោះកម្មករនិយោជិត៣នាក់ត្រូវបានអាជ្ញាធរឃាត់ខ្លួននឹងបញ្ជូនទៅតុលាការ ពាក់ព័ន្ធនឹងការប្រឆាំងវិធានការទប់ស្កាត់កូវីដ១៩របស់អាជ្ញាធរ។ ក្រោយពេលយកសំណាក រដ្ឋបាលរាជធានីភ្នំពេញ បានតម្រូវឲ្យបញ្ឈប់ជាបន្ទាន់ការប្រមូលផ្តុំធ្វើកូដកម្មរបស់បុគ្គលិកក្រុមហ៊ុនណាហ្គា ហើយត្រូវបន្តអនុវត្តតាមវិធានការសុខាភិបាល រហូតដល់ធានាថាលែងមានការឆ្លងជំងឺកូវីដចូលទៅក្នុងចំណោមកូដករ និងក្រុមគ្រួសារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ