លោក ហ៊ុន សែន៖ ដំណោះស្រាយរឿងភូមា រឹងពេកក៏មិនបាន ទន់ពេកក៏មិនបាន ត្រូវរកចន្លោះកណ្តាល
ដោយសំដៅទៅលើបញ្ហាស្វែងរកដំណោះស្រាយជម្លោះនយោបាយនៅប្រទេសភូមា លោក ហ៊ុន សែន បានថ្លែងពីពិធីសម្ពោធផ្លូវនៅខេត្តក្រចេះនាព្រឹកថ្ងៃពុធនេះថា បទពិសោធន៍របស់លោកក្នុងការស្វែងរកដំណោះស្រាយ គឺត្រូវមានផ្លូវកណ្តាលមួយ មិនអាចរឹងពេក ឬក៏ទន់ពេកបានទេ។ ការលើកឡើងរបស់លោកនាយករដ្ឋមន្ត្រី ហ៊ុន សែន ដូច្នេះ គឺជាការឆ្លើយតបទៅលើការរិះគន់កន្លងមកថាលោក បានធ្វើការទូតបែបប្រថុយប្រថាន(Cowboy diplomacy)។
ចុះផ្សាយនៅថ្ងៃ៖
ស្តាប់ - ០២:១០
នៅចំពោះមុខឯកអគ្គរដ្ឋទូតជប៉ុនប្រចាំកម្ពុជា និងមន្ត្រីរាជការនានា លោកនាយករដ្ឋមន្ត្រី ហ៊ុន សែន ហាក់បង្ហាញអារម្មណ៍ចង់ព្រលែងចោល ការជួយស្វែងរកដំណោះស្រាយបញ្ហាវិវាទនយោបាយនៅប្រទេសភូមា ដោយលោកលើកឡើងថា នៅសល់តែ១០ខែ ១៤ថ្ងៃទៀតទេ ចប់ភារកិច្ចប្រធានអាស៊ានហើយ ហើយរុញឲ្យប្រធានអាស៊ានក្រោយធ្វើទៅបើពិបាកពេក។ ទោះយ៉ាងណាលោកបញ្ជាក់ថា លោកមិនបោះបង់ចោលការខិតខំទេ ដោយពេលណាមួយអ្នករិះគន់អាចនឹងយល់ពីដំណោះស្រាយរបស់លោក។
លោក ហ៊ុន សែន ថាក្នុងការស្វែងរកដំណោះស្រាយបញ្ហាភូមានេះ គេមិនអាចយកគោទៅដាក់នៅមុខនឹមរទេះបានទេ ដោយលោកបង្ហាញនូវបទពិសោធន៍របស់លោកថាបើរឹងពេកក៏មិនបាន ហើយទន់ពេកក៏មិនបាន ត្រូវរកចន្លោះកណ្តាលមួយ។
ឆ្លើយតបទៅនឹងការរិះគន់ខ្លះថា ជាការទូតប្រថុយប្រថាន ឬ(Cowboy Diplomacy) លោកនាយករដ្ឋមន្ត្រីថាលោកមានការសន្ទនាជាបន្តបន្ទាប់បើទោះណាសភាពការណ៍ភូមាមិនមានការប្រែប្រួលទាំងពេលមុន និងក្រោយដំណើរទស្សនកិច្ចរបស់លោកទៅកាន់ទីក្រុងនៃពីដោរ កាលពីថ្ងៃទី៧ខែមករាកន្លងទៅ។
តាមលោក ហ៊ុន សែន គេមិនអាចដោះស្រាយបញ្ហាភូមា ដោយផាត់ចោលភាគីកងទ័ព និងរដ្ឋាភិបាលយោធាបានទេ ដោយរំលឹកប្រដូចទៅនឹងស្ថានភាពប្រទេសកម្ពុជាអំឡុងពេលចរចាស្វែងរកដំណោះស្រាយនយោបាយពីអតីតកាល ដែលចាំបាច់ត្រូវតែមានការជជែកជាមួយលោក ខណៈដែលក្រោយមកដំណោះស្រាយនយោបាយមួយបានចេញរួច។
សូមរំលឹកថាដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅកាន់ប្រទេសភូមាកាលពីថ្ងៃទី៧ មករា កន្លងទៅ គឺធ្វើឡើងបន្ទាប់ពីកម្ពុជាក្លាយជាប្រធានអាស៊ានប្តូរវេនឆ្នាំ២០២២នេះ។ ដំណើរទស្សនកិច្ចនេះ បានរងការគាំទ្រផង និងរិះគន់ផង ថាជារបៀបរបបការទូតបែបប្រថុយប្រថាន រួមនិងការជំទាស់ពីពលរដ្ឋភូមាផងដែរ។ ជាការជំទាស់មិនចង់ឲ្យមានការទទួលស្គាល់របបសិកភូមា ដែលកើតឡើងដោយការធ្វើរដ្ឋប្រហារផ្តួលរំលំ លោកស្រី អ៊ុងសាន ស៊ូជី មេដឹកនាំស៊ីវិលដែលជាប់ឆ្នោតកាលពីឆ្នាំទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ