កិច្ចប្រជុំចង្អៀតរដ្ឋមន្ត្រីការបរទេសអាស៊ាន នៅកម្ពុជា ត្រូវបានធ្វើឡើងដោយមិនមានតំណាងភូមា
រដ្ឋមន្ត្រីការបរទេសអាស៊ាន បានចាប់ផ្តើមជួបប្រជុំគ្នាហើយនៅព្រឹកថ្ងៃព្រហស្បតិ៍នេះ នៅរាជធានីភ្នំពេញ ជាកិច្ចប្រជុំចង្អៀត(AMMR) លើកដំបូងបន្ទាប់ពីកម្ពុជាឡើងធ្វើជាប្រធានអាស៊ានឆ្នាំ២០២២នេះ។ កិច្ចប្រជុំនេះ មានការចូលរួមដោយផ្ទាល់ពីរដ្ឋមន្ត្រីការបរទេសចំនួន៦រូប ខណៈ ៣រូបទៀត រួមមានថៃ ប៊្រុយណេ និងវៀតណាម ចូលរួមតាមប្រព័ន្ធអនឡាញ។ ដោយឡែក រដ្ឋមន្ត្រីការបរទេសភូមា មិនត្រូវបានអញ្ជើញឲ្យចូលរួមឡើយ។
ចុះផ្សាយនៅថ្ងៃ៖
ស្តាប់ - ០២:១៨
វត្តមាននៅក្នុងសាលប្រជុំដោយផ្ទាល់នៃសណ្ឋាគារសូហ្វីតែលភូកេត្រាភ្នំពេញមានរដ្ឋមន្ត្រីការបរទេស ឥណ្ឌូនេស៊ី ម៉ាឡេស៊ី សិង្ហបុរី ហ្វីលីពីន ឡាវ និងរដ្ឋមន្ត្រីការបរទេសកម្ពុជា ជាម្ចាស់ផ្ទះ។ ដោយឡែក រដ្ឋមន្ត្រីការបរទេសថៃ និងប្រ៊ុយណេ ចូលរួមតាមអនឡាញ ខណៈរដ្ឋមន្ត្រីការបរទេសវៀតណាមមកដល់កម្ពុជាហើយក៏ចូលរួមប្រជុំតាមអនឡាញដែរ ក្រោយរកឃើញថាវិជ្ជមានកូវីដ-១៩។
ដោយឡែក រដ្ឋមន្ត្រីការបរទេសភូមា មិនត្រូវបានអញ្ជើញឲ្យចូលរួមក្នុងកិច្ចប្រជុំចង្អៀតរដ្ឋមន្ត្រីការបរទេសអាស៊ានពេលនេះទេ ដោយហេតុថាភូមានៅមិនទាន់អាចធ្វើឲ្យប្រសើរឡើងនូវលក្ខខណ្ឌជាឯកច្ឆន្ទទាំង៥ចំណុចរបស់អាស៊ាន។ ទោះយ៉ាងនេះក្តី ភូមាក៏មិនបានបញ្ជូនតំណាងមិននយោបាយមកចូលរួមដែរ។
របៀបវារៈសំខាន់ៗនៃកិច្ចប្រជុំចង្អៀត AMMR នៅកម្ពុជាពេលនេះ គឺផ្តោតទៅលើអទិភាព និងសមិទ្ធផលសំខាន់ៗ ដែលកម្ពុជារំពឹងទុក និងទទួលបាន នៅពេលដែលកម្ពុជាធ្វើជាប្រធានអាស៊ានឆ្នាំ២០២២នេះ។
នេះបើតាម លោក លុយ ដាវីដ រដ្ឋលេខាធិការ និងជាប្រធានលេខាធិការដ្ឋានគណៈកម្មការរៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធឆ្នាំ២០២២ ថ្លែងប្រាប់RFI នាពេលកន្លងទៅ។ លោកបញ្ជាក់ថា នៅក្នុងរបៀបវារៈនៃកិច្ចប្រជុំនេះដែរ រដ្ឋមន្ត្រីការបរទេសទាំងអស់មានការពិភាក្សាអំពីវឌ្ឍនភាពការងារ ដែលសម្រេចបានកាលពីកិច្ចប្រជុំកំពូលអាស៊ានលើកទី៣៨ និងទី៣៩ នៅប្រ៊ុយណេ រួមនឹងការងារទំនាក់ទំនងមួយចំនួនជាមួយដៃគូរខាងក្រៅ។
ក្រៅពីនេះ ក៏មានការលើកយកបញ្ហារសើបដែលកើតឡើងនៅក្នុងតំបន់ និងអន្តរជាតិយកមកពិភាក្សាដែរ ដោយបញ្ហាចំបងជាងគេគឺ ការគ្រប់គ្រងការរាត្បាតជំងឺកូវីដ-១៩ និងការស្តារសេដ្ឋកិច្ចឡើងវិញក្រោយកូវីដ-១៩។ បន្ថែមពីនេះ ក៏មានបញ្ហាផ្សេងៗដែរ ដែលត្រូវបានលើកឡើងដោយរដ្ឋមន្ត្រីការបរទេសអាស៊ាននានា។
សូមបញ្ជាក់ថាកិច្ចប្រជុំចង្អៀតរដ្ឋមន្ត្រីការបរទេសអាស៊ានពេលនេះ គឺជាជំហានមួយ ក្នុងការឈានទៅរកកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ នៅខែសីហាខាងមុខ និងឈានទៅរៀបចំកិច្ចប្រជុំកំពូលអាស៊ានលើកទី៤០ និង៤១ ដែលនឹងគ្រោងធ្វើនៅខែវិច្ឆិកា ចុងឆ្នាំ២០២២នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ