ករណីណាហ្គាវើលដ៍៖ តំណាងរដ្ឋាភិបាលទាត់ចោលការលើកឡើងរបស់ក្រុមសិទ្ធិមនុស្សអន្តរជាតិ
ស្ថានបេសកម្មអចិន្ត្រៃកម្ពុជា នៅទីក្រុងហ្សឺណែវ បានចេញមុខទាត់ចោល នូវការលើកឡើងរបស់ក្រុមអ្នកជំនាញនៃអង្គការសហប្រជាជាតិទទួលបន្ទុកសិទ្ធិមនុស្សនៅថ្ងៃទី១៦កុម្ភៈ។ ក្រុមសិទ្ធិមនុស្សដែលបានរិះគន់ចំពោះចំណាត់ការរបស់អាជ្ញាធរក្រុងភ្នំពេញថា បង្កើតរបៀបវារៈបញ្ចប់កូដកម្មរបស់បុគ្គលិកកាស៊ីណូណាហ្គាវើលដ៍ តាមរយៈការតម្រូវឲ្យអ្នកតវ៉ាបន្តធ្វើចត្តាឡីស័កការពារជំងឺកូវីដ១៩។ ប៉ុន្តែតំណាងរដ្ឋាភិបាលកម្ពុជា បានចាត់ទុកការលើកឡើងនេះថា បង្កឲ្យមានការយល់ច្រឡំ និងគ្មានការទទួលខុសត្រូវ។
ចុះផ្សាយនៅថ្ងៃ៖
ស្តាប់ - ០២:០០
មួយថ្ងៃបន្ទាប់ពីការបរិហារ្តិ៍ពីក្រុមអ្នករាយការណ៍ពិសេសសិទ្ធិមនុស្សនៅកម្ពុជា ស្ថានបេសកម្មអចិន្ត្រៃកម្ពុជា បានទទួច«ឲ្យអ្នករាយការណ៍ពិសេស ត្រូវបំពេញការងារផ្អែកលើមូលដ្ឋាននៃអង្គហេតុពិត និងគណនេយ្យភាព និងមិនត្រូវឲ្យធ្វើនយោបាយូបនីយកម្មឡើយ»។ នេះបើតាមសេចក្តីថ្លែងការណ៍នៅថ្ងៃទី១៧កុម្ភៈរបស់ស្ថានបេសកម្មអចិន្ត្រៃកម្ពុជា នៅទីក្រុងហ្សឺណែវ។
ប្រតិកម្មឆ្លើយឆ្លងយ៉ាងដូច្នេះគឺដោយសារតែអាជ្ញាធរទីក្រុងភ្នំពេញបានតម្រូវឲ្យអ្នកតវ៉ានៅក្រុមហ៊ុនណាហ្គាវើលដ៍បន្តធ្វើចត្តាឡីស័កការពារជំងឺកូវីដ១៩ បន្ទាប់ពីរកឃើញមានការឆ្លងទៅលើក្រុមអ្នកតវ៉ាជាច្រើននាក់។
ប៉ុន្តែបើតាមក្រុមអ្នកជំនាញសិទ្ធិមនុស្សរបស់UN អាជ្ញាធរមិនត្រូវយកវិធានការសុខភាពសាធារណៈ មកដាក់កំហិតក្នុងការបង្ក្រាបលើសកម្មភាពតវ៉ាស្របច្បាប់ និងដោយសន្តិវិធីរបស់ក្រុមកូដករនោះទេ។
ក្រុមអ្នកជំនាញរបស់អង្គការសហប្រជាជាតិទទួលបន្ទុកសិទ្ធិមនុស្សបានបង្ហាញក្តីព្រួយបារម្ភ និងរិះគន់កាន់តែខ្លាំងចំពោះការអនុវត្តវិធានការសុខាភិបាល ដូចជាការធ្វើចត្តាឡីស័កមកលើក្រុមកូដករពីសំណាកអាជ្ញាធរក្រុងភ្នំពេញ ។ ការរិះគន់បែបនេះធ្វើឡើងដោយសារតែ ការអនុវត្តវិធានការសុខាភិបាលរបស់អាជ្ញាធរមានភាពមិនស៊ីសង្វាក់គ្នា និងកង្វះតម្លាភាពនៃការគ្រប់គ្រងជំងឺកូវីដ១៩។
ទោះជាយ៉ាងណា ស្ថានបេសកម្មអចិន្ត្រៃកម្ពុជា បានការពារចំពោះចំណាត់ការរបស់អាជ្ញាធរកម្ពុជាថាធ្វើឡើងស្របតាមច្បាប់ជាតិ និងអន្តរជាតិ ដើម្បីសុវត្ថិភាព និងសណ្តាប់ធ្នាប់សាធារណៈ ក៏ដូចជាសិទ្ធិសេរីភាពអ្នកដទៃ។
ឆ្លើយតបចំពោះក្រុមអ្នកជំនាញសិទ្ធិមនុស្សដែលថា ជាងមួយសប្តាហ៍បន្ទាប់ពីអាជ្ញាធរបង្ខំឱ្យក្រុមកូដកររាប់រយនាក់ធ្វើតេស្តរកមេរោគកូវីដ១៩ ពួកគេនៅមិនទាន់ទទួលបានលទ្ធផលតេស្តនៅឡើយ គឺតំណាងរដ្ឋាភិបាលកម្ពុជាអះអាងថានេះជាការលើកឡើងធ្វើឲ្យមានការយល់ច្រឡំ។ បើតាមស្ថានបេសកម្មអចិន្ត្រៃកម្ពុជា មានបាតុករយ៉ាងហោចណាស់ ៥៨នាក់ បានរកឃើញវិជ្ជមានកូវីដ១៩ តាំងពីថ្ងៃទី២៨មករាមកម្ល៉េះ។
គិតចាប់ពីថ្ងៃទី០៦ ដល់ថ្ងៃទី១៧ កុម្ភនេះ បុគ្គលិកក្រុមហ៊ុនណាហ្គាវើលដ៍ចំនួន៥៣នាក់បានតេស្តវិជ្ជមានកូវីដ១៩ ក្រោយអាជ្ញាធរបានប្រកាសថាមានកូដករម្នាក់ត្រូវបានរកឃើញវិជ្ជមានកូវីដ១៩ កាលពីថ្ងៃទី១៨ ធ្នូ ឆ្នាំ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ