បុគ្គលិកណាហ្គាវើលដ៏ប្រកាសជួបជុំតវ៉ាឡើងវិញនៅថ្ងៃនេះ ទោះអាជ្ញាធរព្រមានក៏ដោយ
ក្រុមបុគ្គលិកដែលបំរើការងារនៅក្រុមហ៊ុនណាហ្គាវើលដ៏ នៅថ្ងៃចន្ទ ទី២១ ខែកុម្ភៈ នេះ បានប្រកាសថាពួកគេបានចេញធ្វើកូដកម្មឡើងវិញចាប់ពីថ្ងៃនេះតទៅ ដើម្បីទាមទារឲ្យមានដំណោះស្រាយសមស្រប ដែលអាចទទួលយកបាន។ ការចាប់ផ្តើមធ្វើកូដកម្មឡើងវិញរបស់ក្រុមបុគ្គលិកណាហ្គាវើលដ៏ ធ្វើឡើងបន្ទាប់ពីពួកគេផ្អាកការជួបជុំ និងគោរពតាមវិធានការរបស់ក្រសួងសុខាភិបាល កាលពីថ្ងៃទី០៥ ខែកុម្ភៈ ដើម្បីទប់ស្កាត់ការឆ្លងរាលដាលជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០១:៣៤
សហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៏ បានឲ្យដឹងថា ការដែលពួកគេប្រកាសចេញមកធ្វើកូដកម្មវិញនេះ គឺដោយសារតែពួកគេបានគោរព និងអនុវត្តនូវិធានការរបស់ក្រសួងសុខាភិបាលរួចហើយ ស្តីពីការទប់ស្កាត់ការរីករាលដាលជំងឺកូវីដ១៩ ខណៈដែលមានកូដករមកទល់ពេលនេះ ត្រូវបានរាយការណ៍ថាបានឆ្លងកូវីដប្រភេទអូមីក្រុងប្រហាក់ប្រហែល១០០នាក់។
យោងតាមសេចក្តីប្រកាសរបស់សហជីព ក្រុមបុគ្គលិក បានបញ្ជាក់ថាពួកគេបានផ្អាកធ្វើកូដកម្មចាប់តាំងពីថ្ងៃទី០៥ ខែកុម្ភៈ ហើយបាននាំគ្នាទៅធ្វើតេស្ត លើកទី១ និងលើកទី២ ព្រមទាំងបានធ្វើចត្តាឡីស័ករួចរាល់អស់ហើយ នៅតាមផ្ទះរៀងៗខ្លួន។
កាលពីថ្ងៃទី១៥ ខែកុម្ភៈ កន្លងទៅនេះ សាលារាជធានីភ្នំពេញបានព្រមានចាត់វិធានការ ទៅលើក្រុមបុគ្គលិក និងអតីតបុគ្គលិកក្រុមហ៊ុនណាហ្គាវើលដ៏ ដែលអាជ្ញាធរចាត់ទុកថាជាបាតុកម្មខុសច្បាប់នោះ ដោយមិនលើកលែងឡើយ ប្រសិនបើពួកគេបន្តធ្វើសកម្មភាពជួបជុំគ្នានៅក្បែទីតាំងសាធារណៈ ខុសពីទីលានប្រជាធិបតេយ្យនាសួនច្បារគីឡូម៉ែត្រលេខ៦ ដែលកំណត់ដោយច្បាប់។
ក៏ប៉ុន្តែសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៏ បានបញ្ជាក់ថាការដែលសាលារាជធានីឲ្យក្រុមកូដករទៅសម្តែងមតិនៅទីលានប្រជាធិបតេយ្យ គឺវាលើសពីអ្វី ដែលមានចែងនៅក្នុងវិវាទការងារ ដែលច្បាប់ស្តីពីការងារតម្រូវឲ្យកូដកម្មត្រូវតែធ្វើឡើងនៅខាងមុខ និងប្របរបងនៃក្រុមហ៊ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ