ប្រមុខមុខទូតកម្ពុជា៖ កិច្ចព្រមព្រៀង AUKUS អាចជាចំណុចចាប់ផ្តើមនៃបញ្ហាក្តៅក្នុងតំបន់
ប្រមុខទូតកម្ពុជា លោក ប្រាក់ សុខុន បានថ្លែងផ្តើមក្នុងវេទិកាថ្នាក់រដ្ឋមន្ត្រីសម្រាប់កិច្ចសហប្រតិបត្តិការនៅឥណ្ឌូ-ប៉ាស៊ីហ្វិក នៅទីក្រុងប៉ារីស ថាការបង្កើតឱ្យមានកិច្ចព្រមព្រៀងសន្តិសុខ AUKUS គឺជាចំណុចចាប់ផ្តើមនៃបញ្ហាដ៏ក្តៅនៅក្នុងតំបន់ ពិសេសតំបន់អាស៊ាន តាមរយៈការប្រណាំងប្រជែងសព្វាវុធ ការប្រឈមមុខប្រកួតប្រជែងដាក់គ្នា និងការបង្កើនភាពតានតឹង។ បន្ថែមពីនេះ ដើម្បីអាចកាត់បន្ថយហានិភ័យនៃជម្លោះ លោកប្រមុខទូតបែរជាជម្រុញឱ្យមានកិច្ចព្រមព្រៀងពាណិជ្ជកម្ម (RCEP) ដែលផ្តួចផ្តើមគំនិតដោយប្រទេសចិនទៅវិញ។
ចុះផ្សាយនៅថ្ងៃ៖
ស្តាប់ - ០២:៣៩
វេទិកាថ្នាក់រដ្ឋមន្រ្តីដើម្បីកិច្ចសហប្រតិបត្តិការនៅក្នុងតំបន់ឥណ្ឌូប៉ាស៊ីហ្វិក បានរៀបចំឡើងដោយប្រទេសបារាំង នៅថ្ងៃទី២២កុម្ភៈ ដែលមានការចូលរួមពីរដ្ឋមន្រ្តីការបរទេសទាំង ២៧រូបនៃប្រទេសសមាជិកសហភាពអឺរ៉ុប និងសមភាគីមកពីប្រមាណ ៣០ប្រទេសនៃតំបន់ឥណ្ឌូប៉ាស៊ីហ្វិក។ លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា ដែលមានវត្តមាននៅក្នុងវេទិកានោះ បានថ្លែងបារម្ភចំពោះកិច្ចព្រមព្រៀងសន្តិសុខត្រីភាគីទប់ទលឥទ្ធិពលចិន AUKUS ថា កំពុងតែនាំអោយប្រទេសនៅក្នុងតំបន់ឥណ្ឌូប៉ាស៊ីហ្វិក រួមមានទាំងកម្ពុជាផង ត្រូវប្រឈមនឹងការប្រណាំងប្រជែងផ្នែកសព្វាវុធ ការប្រឈមមុខដាក់គ្នា និងការបង្កើនភាពតានតឹងដាក់គ្នា។
ជាការរំព្ញកមួយដែរថា កិច្ចព្រមព្រៀង AUKUS គឺជាកិច្ចព្រមព្រៀងសន្តិសុខដ៏ធំសម្បើមមួយរវាងប្រទេសអូស្ត្រាលី សហរដ្ឋអាមេរិក និងចក្រភពអង់គ្លេស ក្នុងគោលដៅទប់ទល់ឥទ្ធិពលចិន នៅតំបន់អាស៊ីប៉ាស៊ីហ្វិក។ កិច្ចព្រមព្រៀងនេះដែរត្រូវបានធានាអះអាងម្តងហើយម្តងទៀតថា មិនគំរាមកំហែងដល់ស្ថិរភាពតំបន់ឥណ្ឌូប៉ាស៊ីហ្វិក ហើយមិនមានគោលដៅសំដៅប្រទេសណាមួយទេ ក្រៅតែតែពីប្រទេសចិន។
បន្ថែមពីក្តីបារម្ភពាក់ព័ន្ធនឹងកិច្ចព្រមព្រៀងសន្តិសុខទប់ទល់ឥទ្ធិពលចិននេះ លោក ប្រាក់ សុខុន បានបង្វែរឱ្យមានការខិតខំប្រឹងប្រែងបន្ថែមទៀតដើម្បីទាញយកប្រយោជន៍ជាធរមាននៃភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដែលផ្តួចផ្តើមគំនិតដោយប្រទេសចិន ជប៉ុន និងកូរ៉េខាងត្បូងទៅវិញ។ ប្រមុខទូតកម្ពុជា ថាការពឹងផ្អែកគ្នាទៅវិញទៅមកដោយផ្អែកលើសេដ្ឋកិច្ចកាន់តែច្រើននឹងអាចកាត់បន្ថយហានិភ័យនៃជម្លោះ ហើយប្រទេសទាំងនោះចាំបាច់ត្រូវពង្រឹងកិច្ចសហប្រតិបត្តិការសេដ្ឋកិច្ចក្នុងតំបន់និងអន្តរតំបន់បន្ថែមទៀត។
លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា បានគូសបញ្ជាក់ប្រាប់វិទ្យុបារាំងអន្តរជាតិនៅថ្ងៃទី២៣កុម្ភៈថា វត្តមានកិច្ចព្រមព្រៀងសន្តិសុខត្រីភាគី AUKUS គឺប្រៀបដូចជាការចាក់ស៊ាំងលើភ្លើងដែលកំពុងឆាប់ឆេះស្រាប់ ពោលគឺវានឹងកាន់តែធ្វើឱ្យកម្តៅភូមិសាស្ត្រនយោបាយ ក្នុងតំបន់ឥណ្ឌូប៉ាស៊ីហ្វិក ពិសេសអាស៊ីអាគ្នេយ៍ កាន់តែធ្ងន់ធ្ងរបន្ថែមទៀត។ លោកបណ្ឌិតយល់ថា ប្រទេសតូចៗនៅតំបន់អាស៊ីគ្នេយ៍កំពុងរងសម្ពាធនិងស្ថិតនៅក្នុងជម្រើសដ៏លំបាកនៅក្នុងការជ្រើសរើសប្រទេសមហាអំណាច នៅក្នុងតំបន់និងពិភពលោក។ និងថា អ្វីដែលកម្ពុជាប្រាថ្នាចង់ឃើញ គឺ យុទ្ធសាស្ត្រនិងគំនិតផ្តួចផ្តើមណាដែលមានលក្ខណៈបំពេញបន្ថែមឱ្យគ្នា និងដែលមិនមានលក្ខណៈប្រកួតប្រជែងគ្នាដែលនាំឱ្យបង្កើនភាពតានតឹងកាន់តែខ្លាំងនៅក្នុងតំបន់នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ