របាយការណ៍៖ ពលរដ្ឋក្រីក្ររស់នៅទីក្រុងភាគច្រើននៅបន្តប្រឈមបញ្ហាជាច្រើន ទោះបីទទួលបានសេវាសាធារណៈគ្រប់គ្រាន់ក៏ដោយ
អង្គការសមាគមធាងត្នោតនៅថ្ងៃទី២៣ កុម្ភៈ បានបង្ហាញរបាយការណ៍សិក្សាថ្មីមួយថា សហគមន៍ក្រីក្រដែលរស់នៅក្នុងទីក្រុងភ្នំពេញស្ទើតែទាំងអស់ទទួលបានសេវាទឹកស្អាត អគ្គិសនី ប្រើប្រាស់ក្នុងជីវភាពប្រចាំថ្ងៃ ការអប់រំ និងការថែទាំសុខភាពបានល្អប្រសើរ ។ បើតាមរបាយការណ៍ សហគមន៍ក្រីក្ររស់នៅរាជធានីភ្នំពេញចំនួន ៧៥%មានលំនៅឋានរស់នៅផ្ទាល់ខ្លួន។ ទោះជាយ៉ាងនេះក្តី អង្គការសមាគមធាងត្នោតនៅតែបន្តបង្ហាញអំពីក្តីព្រួយបារម្ភមួយចំនួន ពាក់ព័ន្ធនឹងបញ្ហានៃការបណ្តេញចេញដោយបង្ខំមកលើប្រជាជនក្រីក្រ ភាពអយុត្តិធម៌លើការអភិវឌ្ឍ និងបញ្ហាប្រាក់ចំណូលជាដើម។
ចុះផ្សាយនៅថ្ងៃ៖
ស្តាប់ - ០២:៤៤
យោងតាមរបាយការណ៍វាយតម្លៃភាពក្រីក្រសម្រាប់សហគមន៍ក្រីក្រនៅក្នុងរាជធានីភ្នំពេញ របស់អង្គការសមាគមធាងត្នោតកម្ពុជា បានបង្ហាញឱ្យឃើញថា សហគមន៍ក្រីក្ររស់នៅក្នុងរាជធានីភ្នំពេញ ចំនួន៩៨% មានអគ្គិសនីរដ្ឋប្រើប្រាស់ និងចំនួន៨៧% បានតភ្ជាប់ប្រព័ន្ធទឹកស្អាតរបស់រដ្ឋ។ ក្នុងនោះ សហគមន៍ក៏មានលទ្ធភាពទទួលបានសេវាថែទាំសុខភាព និងការអប់រំផងដែរ។ បើតាមរបាយការណ៍ កុមារក្រោមអាយុ១២ ខែ ប្រមាណជា៨២ %បានទទួលការវ៉ាក់សាំងពេញលេញ ខណៈដែល៨២% នៃស្ត្រីមានផ្ទៃពោះទទួលបានការពិនិត្យសុខភាពទៀងទាត់។
ដោយឡែក សម្រាប់លទ្ធភាពដែលទទួលបានការអប់រំវិញ របាយការណ៍ដដែលបានបង្ហាញថា កុមារគ្រប់អាយុស្ទើរតែទាំងអស់ទទួលបានការអប់រំនៅសាលារៀន ដោយកុមារអាយុចន្លោះពី៦ ដល់១២ឆ្នាំ មានចំនួន៩០% និងកុមារអាយុពី១២ ដល់១៤ឆ្នាំ មានចំនួន៩៣%។ បន្ថែមពីនេះ សហគមន៍ក្រីក្រនៅរាជធានីភ្នំពេញចំនួន៧៥% មានលំនៅឋានស្នាក់នៅផ្ទាល់ខ្លួនប្រកបដោយសុវត្ថិភាព និងការសាងសង់បានល្អ។
ទោះបីសហគមន៍ក្រីក្ររស់នៅទីក្រុងភ្នំពេញមានការរីកចម្រើនគួរឱ្យកត់សម្គាល់ ក៏ប៉ុន្តែបើផ្អែកតាមរបាយការណ៍របស់អង្គការសមាគមធាងត្នោត ពួកគេនៅតែបន្តជួបប្រទះនូវបញ្ហាជាច្រើនដូចជា ការបណ្តេញចេញពីទីតាំងរស់នៅបច្ចុប្បន្នដោយបង្ខំ និងបំភិតបំភ័យ។ ភាគច្រើននៃការបណ្តេញចេញ គឺធ្វើឡើងទៅលើតំបន់ដែលគ្មានការអនុញ្ញាតពីច្បាប់ ដូចជាតាមបណ្តោយផ្លូវ ប្រឡាយទឹកស្អុយ ផ្លូវរថភ្លើង មាត់ទន្លេ និងបឹងជាដើម។
របាយការណ៍ខាងលើបន្តថា បញ្ហាទឹកជំនន់ ក៏ត្រូវបានបូកបញ្ចូនទៅជាបញ្ហាប្រឈមដ៏ធ្ងន់ធរ ចំពោះសហគមន៍ដែលរស់នៅក្នុងតំបន់ដែលមានហេដ្ឋារចនាសម្ព័ន្ធមិនគ្រប់គ្រាន់ផងដែរ។ ខណៈប្រជាពលរដ្ឋរស់នៅលើដីសើម និងបឹង កំពុងតែប្រឈមពីការចាក់បំពេញ រឺលុបពីអាជ្ញាធរ និងក្រុមហ៊ុនឯកជន។
ចំណែក ភាពអយុត្តិធម៌នៃការអភិវឌ្ឍ គ្រួសារជាច្រើននៅបន្តរស់នៅយ៉ាងលំបាកជាមួយនឹងប្រាក់ចំណូលទាប និងការជំពាក់បំណុល ខណៈដែលតម្លៃអគ្គិសនី និងប្រេងសាំងនៅតែមានតម្លៃថ្លៃ និងបន្តកើនឡើងដដែល។ បន្ថែមពីនេះ សហគមន៍ក៏បន្តត្អូញត្អែរពីការមិនទទួលបានប័ណ្ណសមធម៌ និងកម្ចីប្រាក់ដើម្បីចំណាយលើថ្លៃថ្នាំពេទ្យថែមទៀត។
ទាក់ទិននឹងបញ្ហាទាំងអស់នេះ អង្គការសមាគមន៍ធាងត្នោតបាន ស្នើឱ្យរដ្ឋាភិបាល និងសាលាក្រុងភ្នំពេញត្រូវដោះស្រាយប្រកបដោយតម្លភាព និងអភិបាលកិច្ចល្អ ចំពោះការផ្តល់សំណង និងការតាំងទីលំនៅឋានរបស់ប្រជាជន បន្ទាប់ពីអាជ្ញាធរបញ្ចេញចេញ។ ការធ្វើបែបនេះ ដើម្បីធានានូវជីវភាពគ្រួសារដែលរងផលប៉ះពាល់ និងធានាពីការធ្លាក់ចូលទៅក្នុងភាពក្រីក្រខ្លាំង និងបញ្ហាជំពាក់បំណុលជាដើម។ ម្យ៉ាងវិញទៀត សាលាក្រុងភ្នំពេញត្រូវ ដោះស្រាយបញ្ហាជន់លិចផ្ទះសម្បែងរបស់ពលរដ្ឋ ក្នុងរដូងភ្លៀងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ