របាយការណ៍៖ ពលករចំណាកស្រុកខ្មែរផ្ញើប្រាក់ត្រឡប់មកស្រុកវិញជាង៣ពាន់លានដុល្លារក្នុងមួយឆ្នាំៗ
នៅថ្ងៃទី២៥កុម្ភៈម្សិលមិញ ក្រសួងការងារបានបង្ហាញរបាយការណ៍មួយឲ្យដឹងថា ពលករចំណាកស្រុកខ្មែរដែលទៅធ្វើការនៅបរទេស បានផ្ញើប្រាក់ត្រឡប់មកក្រុមគ្រួសាររបស់ពួកគេ នៅស្រុកកំណើត បានជាង៣ពាន់លានដុល្លារនៅក្នុងមួយឆ្នាំៗ។ សម្រាប់ក្រសួងការងារ ប្រាក់ចំណូលពីក្រៅប្រទេសរបស់ក្រុមពលករខ្មែរនេះ រួមចំណែកមួយផ្នែកដល់កំណើនសេដ្ឋកិច្ចជាតិ ជាពិសេសដល់ការទ្រទ្រង់ជីវភាពរបស់គ្រួសារពួកគេនៅកម្ពុជា។
ចុះផ្សាយនៅថ្ងៃ៖
បើតាមរបាយការណ៍របស់ក្រសួងការងារ មានពលករខ្មែរយ៉ាងហោចណាស់១លាន៣សែននាក់ កំពុងរស់នៅនិងបំពេញការងារនៅបរទេស។ ការងាររបស់ពួកគេនៅក្រៅប្រទេស បានចាក់បញ្ចូលទឹកប្រាក់ត្រឡប់មកកម្ពុជាវិញ ប្រមាណ៣ពាន់លានដុល្លារនៅក្នុងមួយឆ្នាំៗ។
តាមរយៈលំហូរមូលនិធិនេះ រដ្ឋាភិបាលកម្ពុជាសម្រេចបន្តជំរុញការអនុវត្តគោលនយោបាយស្តីពីការធ្វើចំណាកស្រុកការងារសម្រាប់កម្ពុជា ឆ្នាំ ២០១៩-២០២៣ និងបទដ្ឋានគតិយុត្តពាក់ព័ន្ធ ដើម្បីការពារ និងលើកកម្ពស់សិទ្ធិ និងផលប្រយោជន៍របស់កម្មករ រួមទាំងការការពារសង្គមក្នុងពេលកំពុងធ្វើការ និងត្រឡប់មកផ្ទះវិញ។
ជាការពិតហើយថា ការចាកចេញពីស្រុកកំណើតរបស់ពលករខ្មែរ ដើម្បីទៅធ្វើការនៅក្រៅប្រទេស បានផ្ដល់ត្រឡប់មកវិញនូវប្រាក់ចំណូលសម្រាប់ក្រុមគ្រួសារពួកគាត់ ក៏ដូចជាចំណេះជំនាញថ្មីៗ។ ប៉ុន្តែលោក ឃុន ថារ៉ូ អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារនិងសិទ្ធិមនុស្សហៅកាត់ថា អង្គការសង់ត្រាល់ បានគូសបញ្ជាក់ប្រាប់វិទ្យុបារាំងអន្ដរជាតិ RFI នៅថ្ងៃសៅរ៍ ទី២៦កុម្ភៈនេះថា ពលករខ្មែរដែលទៅធ្វើការនៅបរទេសទាំងអស់ ត្រូវចំណាយប្រាក់ច្រើនដើម្បីរត់ការ ទម្រាំបានចេញធ្វើការនៅក្រៅប្រទេស។ អម្រែកនេះ បង្ខំឲ្យពួកគាត់ត្រូវខ្ចីបុលពីស្ថាប័នមីក្រូហិរញ្ញវត្ថុ ហើយត្រូវសងត្រឡប់ទៅវិញ នៅពេលបានចេញទៅធ្វើការជាស្ថាពរ។
បើតាមលោក ឃុន ថារ៉ូ នេះគេនៅមិនទាន់និយាយដល់ការរំលោភបំពានសិទ្ធិការងារពីសំណាក់និយោជកមកលើពលករខ្មែរ កង្វះកិច្ចគាំពារសង្គមពីអាជ្ញាធរនៃប្រទេសដែលពលករទៅធ្វើការ និងកិច្ចអន្តរាគមន៍យឺតយ៉ាវពីសំណាក់ស្ថានទូតខ្មែរនៅបរទេសចំពោះពលករខ្មែរ នៅពេលដែលពួកគេជួបបញ្ហានានា។ លោក ឃុន ថារ៉ូ អំពាវនាវឲ្យរដ្ឋាភិបាលខ្មែរយកចិត្តទុកដាក់ សិក្សាស្វែងយល់ និងដោះស្រាយបញ្ហានេះជូនដល់ពលករខ្មែរ ប្រកបដោយប្រសិទ្ធភាពខ្ពស់។
សូមជម្រាបជូនថា មកទល់ពេលនេះ ពលករកម្ពុជាដែលកំពុងធ្វើការនៅបរទេស មានចំនួនសរុបជាង១លាន៣សែននាក់ ក្នុងនោះ ១លាន២សែននាក់ធ្វើការនៅប្រទេសថៃ ជាង៤ម៉ឺន៥ពាន់នាក់នៅប្រទេសកូរ៉េខាងត្បូង ២ម៉ឺន៣ពាន់នាក់នៅម៉ាឡេស៊ី ១ម៉ឺន១ពាន់នាក់នៅប្រទេសជប៉ុន ជាង៨០០នាក់នៅសិង្ហបុរី ២០០នាក់នៅហុងកុង និង៤៣នាក់នៅប្រទេសអារ៉ាប៊ីសាអូឌីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ