សង្គ្រាមរុស្ស៊ី-អ៊ុយក្រែន៖ រដ្ឋមន្ត្រីការបរទេសអាស៊ានអំពាវនាវឲ្យមានការអត់ធ្មត់ខ្ពស់បំផុត
រដ្ឋមន្ត្រីការបរទេសអាស៊ានបានចេញមុខសំដែងការព្រួយបារម្ភចំពោះការវិវត្តន៍នៃស្ថានភាពការណ៍ និងការប៉ះទង្គិចដោយអាវុធនៅអ៊ុយក្រែន។ អ៊ុយក្រែនដែលរងការវាយប្រហារពីសំណាក់កងទ័ពរុស្ស៊ីកាលពីថ្ងៃព្រហស្បតិ៍ ដែលនៅតែបន្តមកដល់ពេលនេះ។ នៅចំពោះមុខនេះ រដ្ឋមន្ត្រីការបរទេសអាស៊ាន បានអំពាវនាវឲ្យគ្រប់ភាគី ត្រូវមានការអត់ធ្មត់ខ្ពស់បំផុត ហើយស្វែងរកការសន្ទនាគ្រប់មធ្យោបាយ ដើម្បីដោះស្រាយជម្លោះនៃប្រទេសជិតខាងទាំងពីរនេះ។
ចុះផ្សាយនៅថ្ងៃ៖
ស្តាប់ - ០១:៤០
តាមរយៈសេចក្តីថ្លែងការណ៍ដោយចុះកាលបរិច្ឆេទខែកុម្ភៈ២០២២ រដ្ឋមន្ត្រីការបរទេសអាស៊ាន បានអំពាវនាវឲ្យគ្រប់ភាគីទាំងអស់ ត្រូវមានការអត់ធ្មត់ជាអតិបរមា និងខិតខំឲ្យអស់ពីលទ្ធភាព ដើម្បីបន្តកិច្ចសន្ទនាគ្រប់ច្រកផ្លូវ ដើម្បីដោះស្រាយជម្លោះនៃប្រទេសជិតខាងទាំងពីរនេះ។
បើតាមក្រុមរដ្ឋមន្ត្រីការបរទេសអាស៊ានដែលមានការប្រយ័ត្នប្រយែងក្នុងការចេញសេចក្តីថ្លែងការណ៍នេះ កិច្ចសន្ទនាគ្រប់ច្រកផ្លូវ គឺសំដៅទៅដល់មធ្យោបាយការទូត ដើម្បីទប់ស្ថានការណ៍កុំឲ្យកាន់តែធ្ងន់ធ្ងរ កាត់បន្ថយភាពតានតឹង និងស្វែងរកដំណោះស្រាយដោយសន្តិវិធីតាមច្បាប់អន្តរជាតិ គោលការណ៍នៃធម្មនុញ្ញអង្គការសហប្រជាជាតិ និងសន្ធិសញ្ញាមិត្តភាព និងកិច្ចសហការនៅ តំបន់អាស៊ីអាគ្នេយ៍។
ទោះបីជាសង្គ្រាមនៅតែបន្ត ហើយមនុស្សរាប់រយនាក់ត្រូវបានស្លាប់ និងរាប់លាននាក់ត្រូវបង្ខំភៀសខ្លួនក៏ដោយ តែរដ្ឋមន្ត្រីការបរទេសអាស៊ាននៅតែជឿថានៅមិនទាន់ហួសទេសម្រាប់កិច្ចសន្ទនាដោយសន្តិវិធីដើម្បីទប់ស្កាត់កុំឲ្យស្ថានការណ៍នេះ វិវត្តន៍ទៅរហូតដល់គ្រប់គ្រងលែងបាន។
សំណុំរឿងរុស្ស៊ី និងអ៊ុយក្រែន គឺជាការទទួលខុសត្រូវរបស់គ្រប់ភាគីក្នុងការប្រកាន់ខ្ជាប់នូវគោលការណ៍នៃការគោរពគ្នាទៅវិញទៅមកលើអធិបតេយ្យភាព បូរណភាពទឹកដី និងសិទ្ធិស្មើគ្នានៃប្រជាជាតិទាំងអស់។ នេះគឺគូសបញ្ជាក់នៅក្នុងសេចក្តីថ្លែងការណ៍ដដែលនេះ។
ក្រុមអ្នកវិភាគ បានហៅ សង្គ្រាមរុស្ស៊ី និងអ៊ុយក្រែននៅពេលនេះថាជាវិញ្ញាសារអន្តរជាតិដំបូងរបស់ប្រធានអាស៊ានថ្មី ហើយជម្លោះនេះក៏បានជះឥទ្ធិពលផងដែរ មកលើផែនការប្រជុំរបស់អាស៊ាន និងបណ្តាប្រទេសធំៗលើពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ