កូដករណាហ្កាវើលដ៍ជ្រើសយកការធ្វើកូដកម្មតាមអនឡាញជាបណ្តោះអាសន្ន បន្ទាប់ពីកូដករមួយចំនួនត្រូវបន្តធ្វើចត្តាឡីស័ក
ក្រុមកូដករណាហ្កាវើលដ៍ បានសម្រេចរើសយកមធ្យោបាយធ្វើកូដកម្មតាមប្រព័ន្ធបណ្តាញសង្គមជាបណ្តោះអាសន្ន ដើម្បីបន្តទាមទារភាគីក្រុមហ៊ុនចូលមកដោះស្រាយវិវាទការងារជាមួយពួកគេ។ នេះបើតាមការបញ្ជាក់របស់កូដករប្រាប់វិទ្យុបារាំងអន្តរជាតិនៅព្រឹកថ្ងៃចន្ទនេះ។ ការសម្រេចធ្វើកូដកម្មតាមអនឡាញពេលនេះ ធ្វើឡើងបន្ទាប់ពីកូដករមួយចំនួនត្រូវអាជ្ញាធរចាប់បញ្ជូនឲ្យបន្តធ្វើចត្តាឡីស័ក ក្រោយពួកគេចេញធ្វើកូដកម្មជាថ្មីកាលពីសប្តាហ៍កន្លងទៅ។
ចុះផ្សាយនៅថ្ងៃ៖
ស្តាប់ - ០២:១៦
ការជ្រើសរើសមធ្យោបាយធ្វើកូដកម្មតាមប្រព័ន្ធអនឡាញនៅពេលនេះ គឺដើម្បីបញ្ជាក់ថាក្រុមកូដករនឹងមិនបោះបង់ចោលវិវាទការងារជាមួយក្រុមហ៊ុននោះទេ ហើយក្រុមកូដករនឹងនៅតែបន្តទាមទារឲ្យមានការដោះលែងតំណាងកម្មករចំនួន៨នាក់ និងកូដករចំនួន៣នាក់។ នេះបើតាមការបញ្ជាក់របស់លោកស្រី ខៀវ ហ័ង កូដករម្នាក់ដែលបន្តទាមទាររកដំណោះស្រាយ។
បើតាមលោកស្រី ខៀវ ហ័ង ការធ្វើកូដកម្មតាមប្រព័ន្ធអនឡាញនេះ ក្រុមកូដករនឹងទាមទារតាមរយៈការបង្ហោះខ្លឹមសារតាមបណ្តាញសង្គមហ្វេសប៊ុក ដើម្បីឲ្យភាគីពាក់ព័ន្ធចូលមកចរចាវិវាទការងារដែលអូសបន្លាយជិតមួយឆ្នាំ ក្រោយតែក្រុមហ៊ុនបានបញ្ឈប់ពួកគេតាំងពីខែឧសភាឆ្នាំ២០២១មកម៉្លេះ។
ការសម្រេចជ្រើសយកការធ្វើកូដកម្មតាមអនឡាញពេលនេះ ត្រូវបានកូដករដដែល បញ្ជាក់បន្ថែមថា ដោយសារកូដករមួយចំនួនត្រូវបានអាជ្ញាធរចាប់បញ្ជូនខ្លួនឲ្យធ្វើចត្តាឡីស័កបន្តទៀត។ កាលពីថ្ងៃទី២១កុម្ភៈ ក្រុមកូដករបានជូនដំណឹងអំពីការចេញធ្វើកូដកម្មជាថ្មី បន្ទាប់ពីពួកគេបានធ្វើចត្តាឡីស័កអស់មួយរយៈ។ បើតាមលោកស្រី ខៀវ ហ័ង មានកូដករប្រមាណជាង១០០នាក់ត្រូវបានអាជ្ញាធរតម្រូវឲ្យធ្វើចត្តាឡីស័កជាបន្តទៀត។
ទោះយ៉ាងណា ជាកូដករមួយរូប លោកស្រី ខៀវ ភ័គ ថាការធ្វើកូដកម្មតាមប្រព័ន្ធអនឡាញនេះ គ្រាន់តែជាជម្រើសបណ្តោះអាសន្នប៉ុណ្ណោះ ហើយក្រុមកូដករនឹងពិចារណាជាបន្តទៀត នៅពេលមានវិធានការណាមួយពីអាជ្ញាធរ។
ថ្លែងប្រាប់វិទ្យុបារាំងអន្តរជាតិ RFI ដែរនោះ អ្នកស្រី អ៊ូ ទេពផល្លីន ប្រធានសហព័ន្ធសហជីព កម្មករចំណីអាហារ និងសេវាកម្មកម្ពុជា ថាជម្រើសធ្វើកូដកម្មតាមប្រព័ន្ធអនឡាញពេលនេះ គឺកើតចេញពីវិធានរបស់សាលាក្រុងភ្នំពេញ និងមន្ទីរសុខាភិបាល ដែលតម្រូវឲ្យក្រុមកូដករបន្តធ្វើចត្តាឡីស័ក។
ប្រធានសហជីពរូបនេះ បន្តទៀតថា ជម្រើសរបស់កូដករពេលនេះ ដើម្បីបញ្ជាក់ក្រុមកូដករមិនព្រងើយកន្តើយក្នុងការទាមទាររកដំណោះស្រាយសមស្រប ទោះបីជាឧបសគ្គអ្វីក៏ដោយ។
គួរបញ្ជាក់ថា សំណុំរឿងវិវាទការងាររវាងបុគ្គលិកក្រុមហ៊ុនណាហ្គាវើលដ៍ នៅតែបន្តអូសបន្លាយអស់រយៈពេលជាង៥០ថ្ងៃមកនេះ ដោយមិនទាន់មានដំណោះស្រាយ។ គោលបំណងនៃកូដកម្មនោះ គឺភាគីកម្មករស្នើសុំការចូលធ្វើការងារវិញ ខណៈដែលភាគីក្រុមហ៊ុនរក្សាជំហរបញ្ឈប់ពួកគេ ដោយយោងលើមូលហេតុខាតបង់ចំណូលក្នុងអំឡុងពេលវិបត្តិកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ