កិច្ចប្រជុំពិសេសអាស៊ាន-អាមេរិកនឹងត្រូវធ្វើឡើងនៅចុងខែមីនានាទីក្រុងវ៉ាស៊ីនតោន
កិច្ចប្រជុំពិសេសអាស៊ាន-អាមេរិក នឹងត្រូវធ្វើឡើងនៅថ្ងៃទី២៨និងទី២៩ចុងខែមីនានេះនាទីក្រុងវ៉ាស៊ីនតោន ទឹកដីសហរដ្ឋអាមេរិក។ នេះបើតាមការបញ្ជាក់ពីសេតវិមានប្រធានាធិបតី នៅថ្ងៃចន្ទម្សិលមិញ។ កិច្ចប្រជុំពិសេសអាស៊ាន-អាមេរិក ដែលគ្រោងនឹងរៀបចំឡើងនៅចុងខែមីនានេះ គឺធ្វើឡើងបន្ទាប់គម្រោងរៀបចំកាលពីខែមករាត្រូវបានលើកពេល។
ចុះផ្សាយនៅថ្ងៃ៖
ស្តាប់ - ០១:៤៣
កិច្ចប្រជុំកំពូលពិសេសនេះនឹងបង្ហាញពីការប្តេជ្ញាចិត្តយូរអង្វែងរបស់សហរដ្ឋអាមេរិកចំពោះអាស៊ាន ដោយទទួលស្គាល់តួនាទីស្នូលរបស់ខ្លួនក្នុងការផ្តល់នូវដំណោះស្រាយប្រកបដោយនិរន្តរភាពចំពោះបញ្ហាប្រឈមដ៏លំបាកបំផុតក្នុងតំបន់ និងការរំលឹកខួប៤៥ឆ្នាំនៃទំនាក់ទំនងអាមេរិក និងអាស៊ាន។ នេះបើតាមសេចក្តីថ្លែងការណ៍របស់លោកស្រី Jen Psaki លេខាផ្នែកព័ត៌មាននៃសេតវិមាន កាលពីថ្ងៃចន្ទម្សិលមិញ។
បើតាមសេចក្តីថ្លែងការណ៍ កិច្ចប្រជុំអាស៊ានអាមេរិកនឹងពង្រឹងការចូលរួមរបស់លោកប្រធានាធិបតី Joe Biden នៅក្នុងកិច្ចប្រជុំកាលពីខែតុលាឆ្នាំ2021 ដែលធ្លាប់បានប្រកាសនូវទឹកប្រាក់ចំនួន១០២លានដុល្លារនៅក្នុងគំនិតផ្តួចផ្តើមថ្មីៗ ដើម្បីពង្រីកការចូលរួមជួយស្តារសេដ្ឋកិច្ចអាស៊ានឡើងវិញក្រោយវិបត្តិកូវីដ-១៩។
គួររំលឹកថា លោក ចូ បៃឌិន កាលពីពេលកន្លងទៅបានផ្ញើលិខិតមួយច្បាប់ដល់ប្រមុខរដ្ឋាភិបាលកម្ពុជា ដោយប្រកាសពីការទន្ទឹងរង់ចាំពេលវេលាធ្វើការជាមួយកម្ពុជាក្នុងរបត់ជាប្រធានអាស៊ានឆ្នាំនេះ។ លោក ចូ បៃឌិន បញ្ជាក់ជំហររបស់អាមេរិកថា ខ្លួនសង្ឃឹមថាទំនាក់ទំនងអាស៊ាន-អាមេរិកកាន់តែរីកចម្រើន និងសម្រេចបានគោលដៅរួមនៅក្នុងតំបន់។ ម៉្លោះហើយ សហរដ្ឋអាមេរិកនឹងរៀបចំកិច្ចប្រជុំកំពូលពិសេសអាស៊ាន-អាមេរិក នៅប៉ុន្មានខែខាងមុខ។
ជាការឆ្លើយតប នៅដើមខែកុម្ភៈ លោកនាយករដ្ឋមន្ត្រីហ៊ុន សែន បានបញ្ជាក់ថា ក្នុងនាមកម្ពុជា ជាប្រធានអាស៊ានឆ្នាំ២០២២ គាំទ្រយ៉ាងពេញទំហឹងចំពោះសហរដ្ឋអាមេរិក ក្នុងការរៀបចំកិច្ចប្រជុំកំពូលពិសេសអាស៊ាន-អាមេរិក នៅរដ្ឋធានីវ៉ាស៊ីនតោន។ សម្រាប់លោក ហ៊ុន សែន កិច្ចប្រជុំកំពូលពិសេសនេះ នឹងផ្តល់ប្រយោជន៍ដល់ភាគីទាំងសងខាងក្នុងការផ្លាស់ប្តូរយោបល់គ្នា ដើម្បីពង្រឹងកិច្ចទំនាក់ទំនងភាពជាដៃគូឲ្យកាន់តែរីកចម្រើន និងជិតសិ្នទ្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ