លោក សម រង្ស៊ីថា អាមេរិកនឹងបន្ទោសលោក ហ៊ុន សែន លើបញ្ហាផ្ទៃក្នុងកម្ពុជា នាកិច្ចប្រជុំពិសេសអាស៊ាន-អាមេរិក
លោក សម រង្ស៊ី អតីតប្រធាននៃអតីតគណបក្សសង្គ្រោះជាតិ នៅថ្ងៃទី១មីនាម្សិលមិញបានលើកឡើងដោយបន្លាចជាមុនថា វត្តមានលោកនាយរដ្ឋមន្ត្រី ហ៊ុន សែន នៅលើទឹកដីអាមេរិកនៅចុងខែមីនានេះ នឹងរងការស្ដីបន្ទោសពីសំណាក់សហរដ្ឋអាមេរិកលើបញ្ហាចំពោះមុខមួយចំនួនរបស់កម្ពុជា។ តែអ្នកនាំពាក្យគណបក្សកាន់អំណាចថា ការលើកឡើងនេះ គ្រាន់តែចង់បានការឆ្លើយតបពីលោក ហ៊ុន សែន ប៉ុណ្ណោះ ខណៈដែលអ្នកនាំពាក្យបក្សកាន់អំណាចរូបនេះ អះអាងថា ប្រមុខបក្សកាន់អំណាចរក្សាភាពស្ងៀមស្ងាត់លែងឆ្លើយឆ្លងនឹងលោក សម រង្ស៊ី ទៀតហើយ។
ចុះផ្សាយនៅថ្ងៃ៖
ស្តាប់ - ០១:៤៦
នៅបន្ទាប់ពីសេតវិមានប្រធានាធិបតីនៅថ្ងៃចន្ទទី១មីនាម្សិលមិញ ប្រកាសពីការត្រៀមរៀបចំកិច្ចប្រជុំពិសេសអាស៊ាន-អាមេរិក នៅចុងខែមីនានេះ លោក សម រង្ស៊ី ឯណេះបានលើកយករបៀបវារៈដោយឡែកមកនិយាយថា វត្តមានលោកនាយរដ្ឋមន្ត្រី ហ៊ុន សែន នៅលើទឹកដីអាមេរិកនឹងរងការស្ដីបន្ទោសពីសំណាក់សហរដ្ឋអាមេរិកលើបញ្ហាចំពោះមុខមួយចំនួន។ បញ្ហាទាំងនោះរួមមានៈ ការគាំទ្ររបបដឹកនាំភូមាសព្វថ្ងៃ ទំនាក់ទំនងជិតស្និទ្ធរវាងកម្ពុជានិងចិន និងសំណុំរឿងតុលាការរបស់លោក កឹម សុខា។
នៅក្នុងសំណុំរឿងរបស់លោក កឹម សុខា លោក សម រង្ស៊ី សង្កត់ធ្ងន់ថា អាមេរិកនឹងទាមទារឲ្យលោក ហ៊ុន សែន ទម្លាក់ចោលការចោទប្រកាន់មកលើអាមេរិកថា នៅពីក្រោយសំណុំរឿងក្បត់ជាតិរបស់លោក កឹម សុខា។
ថ្លែងប្រាប់វិទ្យុបារាំងអន្តរជាតិនៅថ្ងៃទី២មីនានេះ លោក សុខ ឥសាន អ្នកនាំពាក្យគណបក្សកាន់អំណាចលើកឡើងថា កិច្ចប្រជុំពិសេសអាស៊ាន-អាមេរិក នៅចុងខែមីនានឹងមិនបញ្ចូលរបៀបវារៈស្ដីពី បញ្ហាផ្ទៃក្នុងកម្ពុជាទេ ទោះជាពេលកន្លងកម្ពុជានិងអាមេរិកធ្លាប់មានបញ្ហារកាំរកូសខ្លះក៏ដោយ។ ផ្ទុយទៅវិញកិច្ចប្រជុំពិសេសអាស៊ាន-អាមេរិក មានរបៀបវារៈច្បាស់លាស់មិនមែនដូចការបន្លាចទាំងអំបាលមាណរបស់លោក សម រង្ស៊ី ឡើយ។ នេះបើតាមលោក សុខ ឥសាន ។
បន្ថែមលើនេះ លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជ្យបណ្ឌិតសភាកម្ពុជាមើលឃើញកិច្ចប្រជុំពិសេសអាស៊ាន-អាមេរិក គេអាចនឹងនិយាយលើបញ្ហាដែលកំពុងតែមានចំពោះមុខដូចជាៈវិបត្តិសង្គ្រាមរវាងរុស្ស៊ីនិងអ៊ុយក្រែនជាដើម។ ហើយក៏គ្មានហេតុផលណាដែលអាមេរិកមកជីកកកាយរឿងរ៉ាវផ្ទាល់របស់កម្ពុជា ខណៈដែលប្រទេសមួយនេះត្រៀមធ្វើជាម្ចាស់រៀបចំកិច្ចប្រជុំកំពូលអាស៊ានឆ្នាំ២០២២នេះដែរ។
បើតាមសេតវិមានប្រធានាធិបតី កិច្ចប្រជុំពិសេសអាស៊ាន-អាមេរិក នឹងបង្ហាញពីការប្តេជ្ញាចិត្តយូរអង្វែងរបស់សហរដ្ឋអាមេរិកចំពោះអាស៊ាន និងរំលឹកខួប៤៥ឆ្នាំនៃទំនាក់ទំនងអាមេរិក និងអាស៊ាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ