សំណុំរឿងណាហ្គាវើលដ៍៖អ្នកតវ៉ាជិត២០០នាក់ត្រូវបានបញ្ជូនទៅមណ្ឌលចត្តាឡីស័ក
អ្នកតវ៉ាប្រមាណ១៨០នាក់ ត្រូវបានអាជ្ញាធរចាប់បញ្ជូនទៅកាន់មណ្ឌលចត្តាឡីស័កនៅក្នុងខណ្ឌព្រែកសារជាថ្មីទៀតកាលពីម្សិលមិញ។ ចំណាត់ការនេះបានធ្វើឡើង ខណៈអ្នកតវ៉ាដែលជាបុគ្គលិក និងអតីតបុគ្គលិកក្រុមហ៊ុនណាហ្គាវើលដ៍ បាននាំគ្នាតវ៉ាជាថ្មី ជំរុញឲ្យមានដំណោះស្រាយវិវាទការងារ។ ការចាប់ខ្លួនអ្នកតវ៉ាដែលភាគច្រើនជាស្ត្រីនៅកៀកថ្ងៃសិទ្ធិនារីបែបនេះត្រូវបានរិះគន់ពីសំណាក់អ្នកការពារសិទ្ធិមនុស្ស ប៉ុន្តែអាជ្ញាធររាធានីភ្នំពេញ អះអាងថា ការតវ៉ារបស់ក្រុមនេះគឺដោយសារតែមានអ្នកនៅពីក្រោយ។
ចុះផ្សាយនៅថ្ងៃ៖
ស្តាប់ - ០២:០១
ក្នុងរូបភាពជាច្រើនសន្លឹកដែលភ្ជាប់នៅពីលើសេចក្តីថ្លែងការណ៍ថ្ងៃទី៧មីនា ពោលមុនមួយថ្ងៃនៃទិវាសិទ្ធិនារីអន្តរជាតិមកដល់ សហជីពទ្រទ្រង់សិទ្ធិការងារ បុគ្គលិកកម្មខ្មែរ នៃក្រុមហ៊ុនណាហ្គាវើលដ៍ បានអះអាងថា កងកម្លាំងអាជ្ញាធរ និងជនស៊ីវិល បានប្រើអំពើហិង្សាទៅលើកូដករ និងបៀតបៀនកេរ្តិ៍ខ្មាសកូដរជាស្ត្រីថែមទៀតផង។ ក្នុងចំណោមអ្នកតវ៉ាប្រមាណ១៨០នាក់ ដែលត្រូវបានចាប់ខ្លួនបញ្ជូនទៅមណ្ឌលចត្តាឡីស័ក គឺមានស្ត្រីចំនួន១៥៥នាក់។ ពួកគេបានចេញតវ៉ាជាថ្មីទៀត កាលពីថ្ងៃទី៧មីនា ជំរុញឲ្យថៅកែក្រុមហ៊ុនណាហ្គាវើលដ៍ចេញមុខដោះស្រាយវិវាទការងារជាមួយបុគ្គលិកដែលត្រូវបានបញ្ឈប់ពីការងារ។ ប៉ុន្តែគេឃើញមានតែកម្លាំងអាជ្ញាធរ មន្ត្រីក្រសួងការងារ និងមន្ត្រីសុខាភិបាលប៉ុណ្ណោះដែលចេញមុខរារាំងការតវ៉ានេះ។ នេះបើតាមការបញ្ជាក់នៅក្នុងសេចក្តីថ្លែងការណ៍របស់សហជីព។
ឆ្លើយបតនឹងការលើកឡើងនេះ ពីខាងសាលារាជធានីភ្នំពេញ បានអះអាងថា ការដែលក្រុមបាតុករចេញមុខតវ៉ាជាថ្មីទៀតនេះគឺដោយសារតែមានអ្នកនៅពីក្រោយរៀបចំសេណារីយូរួចជាស្រេច ដើម្បីផ្តិតយករូបពីការចាត់វិធានការរបស់សមត្ថកិច្ច។ បើតាមអាជ្ញាធររាជធានី គឺក្រុមនេះបានឆក់ឱកាសយកថ្ងៃសិទ្ធិនារី ដើម្បីយករូបភាពអវិជ្ជមានពីការអនុវត្តន៍វិធានសុខាភិបាល និងការរៀបចំសណ្តាប់ធ្នាប់សង្គម។
ទោះជាយ៉ាងណា បើតាមសហជីព ក្រុមកូដរកទាំងអស់គឺត្រូវបានកងកម្លាំងយកទៅទុកចោលនៅកន្លែងធ្វើចត្តាឡីស័កក្នុងខណ្ឌព្រែកព្នៅ ដែលជារូបភាពបិទសិទ្ធិសេរីភាពបុគ្គលិក កម្មករក្នុងការបញ្ចេញមតិ និងធ្វើកូដកម្មដើម្បីសិទ្ធិការងារ។ ក្រុមអ្នកតវ៉ានៅតែទទួចឲ្យថៅកែក្រុមហ៊ុនល្បែងស៊ីសង ណាហ្គាវើលដ៍ចេញមុខមកដោះស្រាយជាមួយពួកគេ ហើយដោះលែងតំណាងពួកគេដែលត្រូវបានចាប់ខ្លួន។ ប៉ុន្តែអាជ្ញាធររាជធានីភ្នំពេញ បានអំពាវនាវឲ្យអ្នកតវ៉ាឈប់ជឿតាមការអូសទាញពីអ្នកនៅពីក្រោយ និងបញ្ឈប់ការប្រមូលផ្តុំ ដោយងាកមកសហការជាមួយអាជ្ញាធរដើម្បីទប់ស្កាត់ការឆ្លងកូវីដ១៩ទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ