សំណុំរឿងណាហ្គាវើលដ៏៖កូដករមួយចំនួនរក្សាជំហរមិនទទួលសំណងបញ្ចប់វិវាទឡើយ
ក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃទី១០មីនាម្សិលមិញ បានអះអាងតាមរយៈសេចក្ដីជូនដំណឹងថា អតីតបុគ្គលិកក្រុមហ៊ុនណាហ្គាវើលដ៏ ជាបន្តបន្ទាប់បានយល់ព្រមទទួលយកការទូទាត់ប្រាក់បំណាច់បញ្ចប់កិច្ចសន្យាជាមួយក្រុមហ៊ុន គិតមកដល់ថ្ងៃទី៩មីនានេះ។ ក្នុងនោះអតីតបុគ្គលិកចំនួន១៤៧នាក់ ក្នុងចំណោម៣៧៣ ទទួលយកការទូទាត់សំណង ដោយនៅសល់តែ២២៦ប៉ុណ្ណោះមិនព្រមទទួលយក។ តែយ៉ាងណាមិញកូដករម្នាក់ក្នុងចំណោមកូដករឯទៀត ដែលចេញធ្វើសកម្មភាពតវ៉ារាល់ថ្ងៃអះអាងថា រូបគេមិនទទួលលុយបញ្ចប់រឿងទេ ពោលគឺនៅរក្សាជំហរដូចដើមឲ្យអាជ្ញាធរដោះលែងតំណាងដែលកំពុងជាប់ឃុំ និងទទួលយកពួកគេចូលធ្វើការវិញ។
ចុះផ្សាយនៅថ្ងៃ៖
ស្តាប់ - ០២:២៦
កូដករម្នាក់សុំមិនបញ្ចេញឈ្មោះបានប្រាប់វិទ្យុបារាំងអន្តរជាតិនៅថ្ងៃទី១១មីនានេះថា ការអះអាងរបស់ក្រសួងការងារគ្រាន់តែជារូបភាពមួយឲ្យសាធារណៈជនមើលមកថា សំណុំរឿងរបស់ក្រុមហ៊ុនណាហ្គាវើលដ៏មានដំណោះស្រាយយ៉ាងល្អដោយគ្រាន់តែទទួលសំណងបញ្ចប់រឿងជាការស្រេច។ កូដរូបនេះបន្ថែមទៀតថា សម្រាប់កូដករដែលយល់ព្រមទទួលសំណងបញ្ចប់រឿងធ្វើឡើងទាំងចិត្តមិនចង់ព្រោះដោយសារពួកគេមានតម្រូវការផ្នែកហិរញ្ញវត្ថុបន្ទាន់ប៉ុណ្ណោះ។
កូដករដដែលបានរិះគន់ភាគីពាក់ព័ន្ធថា ដោះស្រាយវិវាទសំណុំរឿងបុគ្គលិកណាហ្គាវើលដ៏អេសមិនចំរមាស់។ អ្វីដែលពួកគេចង់បានគឺ មិនទទួលលុយបញ្ចប់រឿងឡើយ ពោលគឺនៅរក្សាជំហរដូចដើមឲ្យអាជ្ញាធរដោះលែងតំណាងដែលកំពុងជាប់ឃុំសរុបចំនួន១១នាក់ ទទួលពួកគេចូលធ្វើការវិញ ហើយនៅតែទទួចឲ្យថៅកែក្រុមហ៊ុនល្បែងស៊ីសង ណាហ្គាវើលដ៍ចេញមុខមកដោះស្រាយជាមួយពួកគេ។ ក្រៅពីបង្ហាញជំហរដាច់ណាត់មិនទទួលយកសំណង់បញ្ចប់រឿងកូដករដដែលប្រាប់ថា ពួកគេនៅតែបន្តធ្វើបាតុកម្មរហូតទាល់តែមានដំណោះស្រាយសមរម្យ ទោះជាត្រូវប្រឈមនឹងការបង្ក្រាបយ៉ាងណាក៏ដោយ។
ក្រសួងការងារតាមរយៈសេចក្ដីជូនដំណឹងនៅថ្ងៃទី១០មីនា បានអំពាវនាវដល់អតីតបុគ្គលិកនិងបុគ្គលិកក្រុមហ៊ុនណាហ្គាវើលដ៏បញ្ឈប់នូវសកម្មភាពដែលបង្កជាកំហុសនាំឲ្យប៉ះពាល់ដល់ផលប្រយោជន៍ស្របច្បាប់របស់ខ្លួន ហើយក្រសួងនឹងបន្តសហការជាមួយស្ថាប័នពាក់ព័ន្ធដើម្បីដោះស្រាយរាល់កង្វល់នានារបស់ក្រុមអ្នកតវ៉ា និងត្រូវគិតផងដែរដល់សិទ្ធិស្របច្បាប់របស់អ្នកវិនិយោគគិន។ ទោះជាក្រសួងការងារនិងអាជ្ញាធររាធានីភ្នំពេញបង្ហាញជំហរដោះស្រាយបែបណា ក៏កូដករនៅតែយល់ថា ជំហររបស់ក្រសួងនិងអាជ្ញាធរក្រុងឈរខាងក្រុមហ៊ុនជាងឈរនៅជាមួយពួកគេ។
ពីខាងសាលារាជធានីភ្នំពេញធ្លាប់ បានអះអាងថា ការដែលក្រុមបាតុករចេញមុខតវ៉ាជាថ្មីទៀតនេះគឺដោយសារតែមានអ្នកនៅពីក្រោយរៀបចំសេណារីយូរួចជាស្រេច ដើម្បីផ្តិតយករូបពីការចាត់វិធានការរបស់សមត្ថកិច្ច។
គិតមកដល់ថ្ងៃទី១១ខែមីនានេះ សំណុំរឿងណាហ្គាវើលដ៏អូសបន្លាយជិតបីខែមកហើយ ដោយផ្ទុះឡើងដំបូងនៅអំឡុងពាក់ខែធ្នូឆ្នាំ២០២១។ ព្រោះតែភាពអូសបន្លាយនៃសំណុំរឿងនេះរដ្ឋមន្ត្រីក្រសួងមហាផ្ទៃលោក ស ខេង ក៏បានលូកដៃចូលរួមដោះស្រាយកាលពីថ្ងៃទី៩ខែមីនា។ ក៏ប៉ុន្តែ លោក ខៀវ សុភ័ក្ត្រ អ្នកនាំពាក្យក្រសួងមហាផ្ទៃបានបញ្ជាក់ថា កិច្ចប្រជុំផ្ទៃក្នុងនេះ គឺគ្រាន់តែ ពិនិត្យនិងស្តាប់មើលរបាយការណ៍បឋមប៉ុណ្ណោះ ដោយមិនទាន់ពិភាក្សាស្វែងរកដំណោះស្រាយនោះទេ។ កូដករហាក់ដូចជាមានជំនឿចិត្តលើយន្តការដោះស្រាយរបស់ក្រសួងមហាផ្ទៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ