កាសែតថៃ៖ ស្ត្រីថៃមួយរូបបានគេចខ្លួនរួចពីការប៉ុនប៉ងយកសរីរាង្គដោយជនជាតិចិននៅកម្ពុជា
កាសែតអនឡាញថៃបានចុះផ្សាយថា ស្ត្រីជនជាតិថៃមួយរូបដែលត្រូវបានគេល្បួងមកធ្វើការងារខុសច្បាប់នៅប្រទេសកម្ពុជា ក្នុងខេត្តព្រះសីហនុ ប្រុងនឹងក្លាយជាជនរងគ្រោះដោយសារការវះយកសរីរាង្គ ដោយក្រុមបងតូចបងធំជាជនជាតិចិន ប៉ុន្តែនាងត្រូវបានរត់គេចខ្លួនដោយត្រដាបត្រដួស។ បើតាមប្រភពជាមន្ត្រីនគរបាលជាតិថៃ សមត្ថកិច្ចបានធ្វើការស្រាវជ្រាវនិងត្រួតពិនិត្យឃើញថា ជនជាតិចិននៅកម្ពុជាទាំងនោះ បានគ្រោងចាប់ជនរងគ្រោះប្រមាញ់យកសរីរាង្គ សម្រាប់លក់នៅក្នុងទីផ្សារងងឹត។
ចុះផ្សាយនៅថ្ងៃ៖
ស្តាប់ - ០២:២៦
រដ្ឋលេខាធិកានៃនគរបាលជាតិ លោក Surachate Hakparn បានគូសបញ្ជាក់ប្រាប់កាសែតអនឡាញរដ្ឋថៃជាភាសាអង់គ្លេសឈ្មោះ Thai PBS World ថាជនរងគ្រោះពីការប៉ុនប៉ងយកសរីរាង្គដោយជនទុច្ចរិតជនជាតិចិនកំពុងស្នាក់នៅកម្ពុជា គឺជាស្ត្រីជនជាតិថៃមកពីទីក្រុងបាំងកក មានវ័យ២៥ឆ្នាំ។ បើតាមលោកមន្ត្រីនគរបាលថៃ នាងត្រូវបានគេល្បូងមកធ្វើការខុសច្បាប់ ក្នុងក្រុមហ៊ុនហៅទូរស័ព្ទមួយនៅក្នុងខេត្តព្រះសីហនុ ដែលដំណើរការដោយជនជាតិចិន។ នៅពេលនាងធ្វើដំណើរពីថៃដល់កំពង់ផែក្រុងព្រះសីហនុ នាងត្រូវបានប្រាប់ឱ្យទៅធ្វើការភ្លាម។ ពេលនាងមិនព្រម នាងក៏ត្រូវគេវាយដំឃុំខ្លួនទុកឱ្យស្រេកឃ្លាន ហើយប្រាប់ឱ្យទាក់ទងទៅគ្រួសារនាងនៅប្រទេសថៃដើម្បីជម្រិតទារយកប្រាក់ជាថ្នូរនឹងការដោះលែងនាង។
នៅក្នុងអំឡុងពេលនៃការឃុំខ្លួននោះ នាងថានាងត្រូវចរន្តអគ្គិសនីឆក់ និងមានអ្នកបូមយកឈាមនាងដែរ។ ធ្ងន់ធ្ងរជាងនេះ នាងក៏បិះនឹងត្រូវគេវះយកសរីរាង្គរបស់នាងដែរ។ ក្រោយមក នាងបានស្វែងរកផ្លូវរតគេចខ្លួនមកដល់មន្ទីរពេទ្យក្រុងប៉ោយប៉ែត ព្រំដែនថៃ រហូតបាត់បង់ស្មារតី និងនាងក៏ត្រូវបានអាជ្ញាធរថៃនៅព្រំដែនជួយសង្គ្រោះ នៅថ្ងៃទីពុធទី៩មិនា កន្លងទៅនេះ។ នេះបើតាមការចុះផ្សាយរបស់កាសែតអនឡាញ Thai PBS World។
គិតត្រឹមម៉ោងផ្សាយនេះ វិទ្យុបារាំងអន្តរជាតិមិនទាន់បានការបញ្ជាក់ពីអ្នកនាំពាក្យក្រសួងការបរទេសកម្ពុជា លោក ជុំ សុន្ទរី និងអ្នកនាំពាក្យក្រសួងមហាផ្ទៃ លោក ខៀវ សុភ័គ នៅឡើយទេ។
មកដល់ពេលនេះ មានជនជាតិថៃប្រមាណ ៣០០០នាក់ដែលធ្វើការដោយខុសច្បាប់នៅក្នុងប្រទេសកម្ពុជា។ នេះបើតាមលោករដ្ឋលេខាធិកានៃនគរបាលជាតិ និងបន្ថែមថាប៉ូលីសថៃ និងស្ថានទូតថៃប្រចាំទីក្រុងភ្នំពេញ នឹងស្នើឱ្យមន្ត្រីសន្តិសុខកម្ពុជា ដោះស្រាយជាមួយក្រុមទុច្ចរិតនៅខេត្តព្រះសីហនុនេះផងដែរ។
លោក ស ខេង រដ្ឋមន្ត្រីក្រសួងមហាផ្ទៃ បានជម្រុញឱ្យអាជ្ញាធរខេត្តឆ្នេរសមុទ្រមួយនេះ បញ្ចប់ឲ្យបានជាអតិប្បរមានូវបទល្មើសឧក្រិដ្ឋនានា ឱ្យបានមុនការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ ឆ្នាំ២០២២នេះ។ ការថ្លែងរបស់លោក ស ខេង ដូច្នេះ គឺបន្ទាប់ពីលោកទទួលបានរបាយការណ៍ពីស្នងការប៉ូលីសខេត្តព្រះសីហនុ ដែលបង្ហាញពីបទល្មើសសាហាវៗកន្លងមក។ លោកថារូបភាពសាហាវឃោរឃៅនៅខេត្តព្រះសីហនុ វានឹងប៉ះពាល់ដល់កេរឈ្មោះកម្ពុជាទាំងមូល នៅពេលដែលមានការផ្សព្វផ្សាយនៅទូទាំងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ