សាលាក្រុង៖ អាជ្ញាធរមិនដែលគំរាមកំហែងអ្នកកាសែតយកព័ត៌មានវិវាទការងាររបស់ក្រុមហ៊ុនណាហ្គាវើលសូម្បីតែម្តង
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី តាមរយៈវិទ្យុបារាំងអន្តរជាតិនៅថ្ងៃទី១៣មីនានេះ បានច្រានចោលការលើកឡើងរបស់សម្ព័ន្ធអ្នកសារព័ត៌មានកម្ពុជា (CamboJa) ដែលថាមានអ្នកកាសែត៣រូបរងការយាយីពីសំណាក់អាជ្ញាធរក្រុងភ្នំពេញ អំឡុងពេលនៃការយកព័ត៌មានវិវាទការងាររបស់បុគ្គលិកក្រុមហ៊ុនណាហ្គាវើល។ មិនត្រឹមតែករណីមួយនេះទេ តែអ្នកនាំពាក្យរូបនេះអះអាងថា កន្លងមកអាជ្ញាធរក្រុងមិនដែលបានយាយី និងរារាំងដល់ការយកព័ត៌មានជុំវិញរឿងវិវាទការងារនេះឡើយ។
ចុះផ្សាយនៅថ្ងៃ៖
ស្តាប់ - ០២:២៤
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី បានបដិសេធចំពោះការផ្សព្វផ្សាយព័ត៌មានរបស់សម័ន្ធអ្នកសារព័ត៌មានកម្ពុជា (Camboja) ដែលថាមានអាជ្ញាធរស្លៀកពាក់ស៊ីវិលធ្វើសកម្មភាពគំរាមកំហែងយាយី ដល់អ្នកសារព័ត៌មាន VOD ២រូប និងអ្នកសារព័ត៌មានពលរដ្ឋមួយរូបទៀតកាលពីថ្ងៃសុក្រទី១១មីនានេះ។ លោកបន្តអះអាងថា កន្លងមកអាជ្ញាធរក្រុងមិនដែលបានយាយីនិងរារាំងដល់ការយកព័ត៌មានជុំវិញរឿងវិវាទការងារនេះម្តងណាឡើយ។
គួរជ្រាបថា នៅថ្ងៃទី១១មីនា Camboja បានថ្កោលទោសចំពោះសកម្មភាពគំរាមគំហែងដោយកម្លាំងអាជ្ញាធរមកលើអ្នកសារព័ត៌មាន ខណៈពួកគេកំពុងយកព័ត៌មានអំពីការបន្តធ្វើកូដកម្មរបស់បុគ្គលិកក្រុមហ៊ុនណាហ្គាវើលដ៏។ បើតាម Camboja អ្នកសារព័ត៌មានស្រ្តីរបស់ VODថា កម្លាំងអាជ្ញាធរបានមកឃាត់នាង និងសហការី ដែលជាជនជាតិបរទេស មិនអោយថតរូប ដោយសួរនាំរកលិខិត ត្រូវបានបង្ខំឲ្យលុបរូបភាពចោលទាំងអស់។ នាងបន្តថា ក្នុងករណីមិនលុបទេនោះ កម្លាំងអាជ្ញាធរនឹងនាំយកនាងទៅប៉ុស្ដ៍ប៉ូលីស។
ប៉ុន្តែបើតាមលោក មាស សុភ័ណ្ឌ អ្នកនាំពាក្យក្រសួងព័ត៌មាន បានបញ្ចាក់ប្រាប់វិទ្យុបារាំងអន្តរជាតិ នៅថ្ងៃអាទិត្យ ទី១៣ មីនា មិនមានរឿងពិតដូចការថ្កោលទោសរបស់សមាគមសារព័ត៌មាន (CamboJa)នេះឡើយ។ ជារឿងមិនពិតដូចការចោទប្រកាន់នោះ គឺបើតាមការរាយការណ៍របស់មន្ទីរព័ត៌មានរាជធានីភ្នំពេញ អ្នកកាសែតនោះ បានចូលទៅក្នុងក្រុមបាតុករ នៅពេលដែលសមត្ថកិច្ចកំពុងអនុវត្តតួនាទី និងភារកិច្ចរបស់ខ្លួននៅទីតាំង ធ្វើឲ្យសមត្ថកិច្ចស្មានថាពួកគាត់ជាក្រុមបាតុករ ដែលតម្រូវអោយឡើងរថយន្តដើម្បីទៅធ្វើចត្តាឡីស័ក។ បន្ទាប់ពីសួរនាំ អ្នកសារព័ត៌មាននោះ មិនបានតម្រូវអោយឡើងរថយន្តដើម្បីធ្វើចត្តាឡីស័កនោះទេ។
បន្ថែមពីនេះ មិនមានសកម្មភាពសមត្ថកិច្ចគំរាមកំហែងអោយលុបរូបភាព ដូចការចោទប្រកាន់នោះទេ។ ដូច្នេះ លោកបានលើកឡើងថា ករណីនេះមិនអាចចោទប្រកាន់សមត្ថកិច្ច ថាបានគំរាមកំហែង ឬធ្វើទុក្ខបុកម្នេញដល់អ្នកកាសែតនោះដែរ។
សូមបញ្ចាក់ផងដែរថា តាមរបាយការណ៍ប្រចាំឆ្នាំ២០២១ ស្តីពីការប្រឈមរបស់អ្នកសារពត័មានឯករាជ្យចេញផ្សាយដោយមជ្ឈមណ្ឌល CCIM នៅថ្ងៃទី១០ ខែមីនា បង្ហាញថា ស្ថានភាពសេរីភាពសារព័ត៌មាននៅកម្ពុជាក្នុងឆ្នាំ២០២១កាន់តែអាក្រក់ បើប្រៀបធៀបនឹងឆ្នាំ២០២០។ អាក្រក់ព្រោះថា អ្នកសារព័ត៌មានឯករាជ្យខ្លះនៅតែជួបបញ្ហាប្រឈមសម្ពាធនយោបាយ ការដាក់គំនាបរបស់រដ្ឋាភិបាល និងបញ្ហាផ្លូវច្បាប់ជាដើម។ តែយ៉ាងណាមិញ ក្រសួងព័ត៌មានបានច្រានចោលចំពោះរបាយការណ៍សិក្សានេះ ដោយបានអះអាងថាមិនបានធ្វើការផ្ទៀងផ្ទាត់និងធ្វើការសិក្សាលម្អិតច្បាស់លាស់ទៅតាមករណីនីមួយៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ