អ្នកឃ្លាំមើល៖ការផ្តិតមេដៃសុំនៅក្រៅឃុំរបស់តំណាងសហជីពអាចស្ថិតក្រោមសម្ពាធណាមួយ
ក្រុមមន្ត្រីសិទ្ធិមនុស្សបានស្វាគមន៍ការដោះលែងឲ្យនៅក្រៅឃុំរបស់តំណាងសហជីពដែលចេញមុខតវ៉ានៅក្រុមហ៊ុនណាហ្គាវើលដ៍កាលពីយប់មិញនេះ។ ប៉ុន្តែពួកគេហាក់មានមន្ទិលថា ការផ្តិតមេដៃសុំនៅក្រៅឃុំរបស់សកម្មជនទាំងនោះ អាចធ្វើឡើងដោយសារតែមានសម្ពាធណាមួយ។ ប្រតិកម្មយ៉ាងដូច្នេះ គឺបន្ទាប់ពីតំណាងអតីតបុគ្គលិកក្រុមហ៊ុនណាហ្គាវើលដ៍ចំនួន៨រូប ត្រូវបានដោះលែងឲ្យនៅក្រៅឃុំបណ្ដោះអាសន្ន ខណៈសមាជិក៣រូបទៀត នៅបន្តឃុំខ្លួនពាក់ព័ន្ធនឹងវិធានច្បាប់កូវីដ១៩។
ចុះផ្សាយនៅថ្ងៃ៖
ស្តាប់ - ០១:៣៦
លោក មឿន តុលា នាយកអង្គការសង់ត្រាល់ ដែលធ្វើការផ្តោតលើសិទ្ធិការងារ កត់សំគាល់ថា ខ្លឹមសារនៃលិខិតដែលផ្តិតមេដៃដែលសរសេរដោយកុំព្យូទ័រ សុំនៅក្រៅឃុំរបស់តំណាងសហជីពទាំងនោះ គឺមានមន្ទិលជាច្រើន ពីព្រោះនៅក្នុងឃុំពន្ធនាគារ គឺមិនត្រូវបានអនុញ្ញាតឲ្យយកកុំព្យូទ័រចូលឡើយ។ ម្យ៉ាងទៀតលោកយល់ថា ខ្លឹមសារនៃលិខិតនោះ គឺប្រើភាសារដូចជាភាសាដែលអាជ្ញាធរបានប្រើកន្លងមក ដែលថា ជាការតវ៉ាខុសច្បាប់ ធ្វើឲ្យប៉ះពាល់សណ្តាប់សាធារណៈ ជាដើម។
ទោះជាយ៉ាងណា លោក មឿន តុលា អះអាងថា លោកគោរពនូវការសម្រេចចិត្តរបស់តំណាងសហជីពទាំងនោះ បើទោះបីជាការសម្រេចចិត្តរបស់ពួកគេនៅពេលនេះ ស្ថិតក្រោមសម្ពាធ ឬមិនឆ្លុះបញ្ចាំងពីឆន្ទៈសេរីក៏ដោយ។
ចំណែក លោក អំ សំអាត នាយករងអង្គការសិទ្ធិមនុស្ស លីកាដូ យល់ថា ទោះបីជាតំណាងសហជីពទាំងនោះ ស្ថិតនៅក្រៅឃុំបណ្តោះអាសន្ន ក៏មិនមានន័យថា ពួកគេមានសេរីភាពពេញនោះដែរ។ ហើយថាការចរចារកដំណោះស្រាយវិវាទការងារក៏មិនមានភាពស្មើគ្នាទេ ប្រសិនបើសកម្មជនសហជីពនៅមិនមានសេរីភាពពេញលេញគ្រប់គ្នា។
សូមបញ្ជាក់ថា តំណាងសហជីពក្រុមហ៊ុនណាហ្គាវើលដ៍ចំនួន៨រូប ត្រូវបានដោះលែងឲ្យនៅក្រៅឃុំបណ្តោះអាសន្ននៅយប់ថ្ងៃទី១៤មីនា ក្នុងនោះមានម្នាក់មានសុខភាពមិនល្អ ត្រូវសម្រាកនៅមន្ទីរពេទ្យ។ ចំណែកសកម្មជន៣នាក់ទៀត ដែលត្រូវបានចាប់ឃុំខ្លួននៅពេលចេញមុខទាមទារឲ្យដោះលែងតំណាងសហជីពទាំង៨រូបខាងលើ គឺនៅបន្តឃុំខ្លួនក្រោមការចោទប្រកាន់ពាក់ព័ន្ធនឹងការល្មើសវិធានច្បាប់កូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ