ក្រសួងនឹងបើកកិច្ចប្រជុំជាថ្មីទៀតនៅរសៀលនេះដើម្បីដោះស្រាយវិវាទនៅក្រុមហ៊ុនណាហ្គាវើលដ៍
ក្រសួងការងារគ្រោងធ្វើការសម្របសម្រួលជាថ្មីទៀតនៅរសៀលថ្ងៃពុធនេះ ដើម្បីដោះស្រាយវិវាទការងារនៅក្រុមហ៊ុនណាហ្គាវើលដ៍។ ជាមួយគ្នានេះ ក្រសួងក៏អំពាវនាវឲ្យអតីតបុគ្គលិក និងបុគ្គលិកក្រុមហ៊ុនកាស៊ីណូមួយនេះបញ្ឈប់ការប្រមូលផ្តុំដែលបំពាននឹងបំរាមកូវីដ១៩។ បើពុំដូច្នេះទេ ក្រសួងព្រមានថា ពួកគេប្រឈមមុខនឹងការបណ្តេញចេញពីការងារ និងប្រឈមការបាត់បង់នូវប្រាក់អត្ថប្រយោជន៍ទៀតផង។
ចុះផ្សាយនៅថ្ងៃ៖
ស្តាប់ - ០១:៤៤
នៅក្នុងសេចក្តីថ្លែងការណ៍របស់រដ្ឋាភិបាលកម្ពុជា ក្រសួងការងារ បានអះអាងថា កន្លងមក ខ្លួនបាននិងកំពុងធ្វើការដោយចេះនឿយហត់ ក្នុងការដោះស្រាយវិវាទការងារ រវាងបុគ្គលិក និងក្រុមហ៊ុនណាហ្គាវើលដ៍។ វិវាទការងាររាប់ខែមកនេះ គឺកើតឡើងបន្ទាប់ពីក្រុមហ៊ុនកាស៊ីណូដ៏ធំមួយនេះបញ្ឈប់បុគ្គលិកពីការងារ២៥% ឬស្មើនឹងជាង១០០០នាក់ នៅក្រោមហេតុផលកូវីដ១៩។
ប៉ុន្តែការបញ្ឈប់បុគ្គលិកពីការងារនេះត្រូវបានសហជីពលើកឡើងថា ជាចេតនារើសអើងសមាជិកសហជីព ដែលនាំឲ្យពួកគេ៣៧៣នាក់ជំទាស់នឹងការបញ្ឈប់នេះ ហើយនៅទីបំផុតសម្រេចចិត្តកូដកម្ម។ មកដល់ពេលនេះ ក្រោយពីការចាប់ខ្លួនតំណាងសហជីព និងដោះលែងឲ្យនៅក្រៅឃុំវិញចំនួន៨នាក់នៅថ្ងៃទី១៤មីនា ក្រសួងការងារអះអាងថា គឺសល់អតីតបុគ្គលិកតែចំនួន២២០នាក់ប៉ុណ្ណោះ ដែលមិនព្រមទទួលយកសំណងជាថ្នូរនឹងការបញ្ឈប់ពីការងារនេះ។
ខណៈដែលក្រសួងការងារត្រូវកោះប្រជុំសាជាថ្មីម្តងទៀតនៅរសៀលថ្ងៃពុធ រវាងភាគីវិវាទនោះ ក្រសួងក៏អំពាវនាវឲ្យអតីតបុគ្គលិក និងបុគ្គលិកក្រុមហ៊ុនកាស៊ីណូមួយនេះបញ្ឈប់ការប្រមូលផ្តុំដែលបំពាននឹងបំរាមកូវីដ១៩។ បើពុំដូច្នេះទេ ក្រសួងព្រមានថា ពួកគេប្រឈមមុខនឹងការបណ្តេញចេញពីការងារ និងប្រឈមការបាត់បង់នូវប្រាក់អត្ថប្រយោជន៍ទៀតផង។
បើតាមក្រសួងការងារ ចំពោះអតីតបុគ្គលិកចំនួន៣នាក់ទៀតដែលត្រូវបានឃុំខ្លួនពាក់ព័ន្ធនឹងល្មើសបំរាមកូវីដ១៩នោះ គឺក្រសួងយុត្តិធម៌នឹងអន្តរាគមន៍ដោះលែងតាមនីតិវិធីច្បាប់ បន្ទាប់ពីតំណាងអតីតបុគ្គលិកក្រុមហ៊ុនណាហ្គាវើលដ៍ចំនួន៨នាក់ ត្រូវបានដោះលែងឲ្យនៅក្រៅឃុំបណ្ដោះអាសន្ន កាលពីយប់ថ្ងៃទី១៤មីនា២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ