ទំហំពាណិជ្ជកម្មទ្វេភាគីកម្ពុជាអាមេរិកកើនឡើងជាង៤២% នាដើមឆ្នាំ២០២២
ទំហំពាណិជ្ជកម្មទ្វេភាគីកម្ពុជាអាមេរិក សម្រាប់ខែដំបូងនៃឆ្នាំ២០២២នេះ មានការកើនឡើងប្រមាណ៤២%។ នេះបើតាមរបាយការណ៍ការិយាល័យជំរឿនអាមេរិក ចេញផ្សាយនៅដើមខែមីនានេះ។ អ្នកជំនាញមើលឃើញថានេះ គឺជាសញ្ញាល្អនៃការអនុវត្តកិច្ចសហប្រតិបត្តិការសេដ្ឋកិច្ចទ្វេភាគីរវាងកម្ពុជា និងសហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:៣២
យោងតាមរបាយការណ៍របស់ការិយាល័យជំរឿនអាមេរិកបានឲ្យដឹងថា ក្នុងខែមករា ឆ្នាំ២០២២នេះ ទំហំពាណិជ្ជកម្មទ្វេភាគីកម្ពុជាអាមេរិកមានទំហំ ៨៧៥.៥លានដុល្លារ ដែលបានកើនឡើងប្រមាណ ៤២.៤៧% ធៀបនឹងរយៈពេលដូចគ្នា កាលពីឆ្នាំ២០២១ ដែលមានទំហំត្រឹមតែ ៦១៤.៥លានដុល្លារ។
ទិន្នន័យរបស់ការិយាល័យជំរឿនអាមេរិកក៏បានឲ្យដឹងទៀតថា ការនាំទំនិញពីកម្ពុជាចូលទៅសហរដ្ឋអាមេរិកសម្រាប់ខែមករា ឆ្នាំ២០២២ គឺមានទំហំជាទឹកប្រាក់ ៨៤៧.៦លានដុល្លារ ដែលមានការកើនឡើងប្រមាណ ៤៥.៩៨% ធៀបនឹងខែមករា ឆ្នាំ២០២១កន្លងទៅ ដែលមានត្រឹមតែ ៥៨០.៦លានដុល្លារ។
ប៉ុន្តែការនាំចូលទំនិញពីសហរដ្ឋអាមេរិកមកកម្ពុជាវិញ មានការធ្លាក់ចុះធៀបនឹងរយៈពេលដូចគ្នា ពោលគឺ កម្ពុជាបាននាំទំនិញពីអាមេរិកមកក្នុងទំហំជាទឹកប្រាក់ ២៧.៩លានដុល្លារ ដែលបានធ្លាក់ចុះប្រមាណ១៧.៦៩% ធៀបនឹងរយៈពេលដូចគ្នា កាលពីឆ្នាំមុន ដែលមានទំហំ ៣៣.៩លានដុល្លារ។
លោក លឹម ហេង អនុប្រធានសភាពាណិជ្ជកម្មកម្ពុជាបានលើកឡើងថាការកើនឡើងនៃទំហំពាណិជ្ជកម្មនេះគឺជាសញ្ញាល្អនៃការអនុវត្តកិច្ចសហប្រតិបត្តិការសេដ្ឋកិច្ចទ្វេភាគីរវាងកម្ពុជា និងអាមេរិក។ លោកបន្តថាកំណើននៃការកើនឡើងនេះគឺគួបផ្សំនឹងអស្ថិរភាពនយោបាយនៅតាមប្រទេសមួយចំនួន និងបញ្ហាកូវីដឆ្លងក្នុងរោងចក្រសហគ្រាសតាមប្រទេសទាំងនោះផង ទើបធ្វើឲ្យការការបញ្ជាទិញត្រូវបង្វែរមកប្រទេសកម្ពុជា។
លោក លឹម ហេង បន្តថាបញ្ហាសង្រ្គាមពាណិជ្ជកម្មរវាងអាមេរិក និងចិនក៏ជាផ្នែកមួយ ដែលនាំឲ្យរោងចក្រមួយចំនួនមកដំឡើងនៅកម្ពុជា ដើម្បីផលិតនាំចេញទៅកាន់ទីផ្សារសហរដ្ឋអាមេរិក ក្រោមការអនុគ្រោះពន្ធ។
ទំនិញភាគច្រើនដែលកម្ពុជានាំចេញទៅកាន់ទីផ្សារសហរដ្ឋអាមេរិក គឺជាទំនិញវាយនភ័ណ្ឌ សម្លៀកបំពាក់ ស្បែកជើង និងផលិតផលធ្វើដំណើរ និងកាបូប រួមនិងទំនិញកសិកម្មមួយចំនួនដែរ។
សូមជម្រាបជូនថា ទំហំពាណិជ្ជកម្មទ្វេភាគីកម្ពុជាអាមេរិក កាលពីឆ្នាំ២០២១ មានទំហំ ៩.១៥ពាន់លានដុល្លារ កើនឡើងប្រមាណ ៣២.៦១% ធៀបនឹងរយៈពេល១២ខែកាលពីឆ្នាំ២០២០ ដែលមានទំហំជាង ៦.៩ពាន់លានដុល្លារ។ នេះបើតាមទិន្នន័យពីការិល័យជំរឿនអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ