ដំណើរទស្សនកិច្ចរបស់ប្រេសិតពិសេសនៅភូមា៖ អ្នកប្រឆាំងជេរប្រមាថអាស៊ានថាជាភាពអាម៉ាស់
ប្រេសិតពិសេសរបស់ប្រធានអាស៊ានដែលបានទៅដល់ភូមា ម្សិលមិញ គឺបានជួបសវនាការជាមួយមេដឹកនាំរបបសឹក ហើយក៏នឹងជួបជាមួយគណបក្សនយោបាយដែលមិនបានបញ្ជាក់ច្បាស់លាស់ផងដែរ ប៉ុន្តែការពិភាក្សាជាមួយតំណាងនៃកងទ័ពជនជាតិភាគតិចត្រូវបានលុបចោល។ នេះបើតាមកាសែតបាងកកប៉ុស្តិ៍។ ដំណើរទស្សនកិច្ចនេះ ត្រូវបានអ្នកប្រឆាំងនឹងរបបសឹកនៅភូមាចាត់ទុកថា ជាភាព«អាម៉ាស់»របស់អាស៊ានដែលពិបាកនឹងរកដំណោះស្រាយឲ្យភូមា។
ចុះផ្សាយនៅថ្ងៃ៖
ស្តាប់ - ០២:០៦
កាសែតបាងកកប៉ុស្តិ៍របស់ថៃបានផ្សាយដោយយោងតាមប្រព័ន្ធផ្សព្វផ្សាយរដ្ឋរបស់មីយ៉ាន់ម៉ា ដែលគ្រប់គ្រងដោយយោធា បាននិយាយនៅលើបណ្តាញ Telegram របស់ខ្លួនថា កិច្ចពិភាក្សារវាងប្រេសិតពិសេសអាស៊ាន គឺលោក ប្រាក់ សុខុន និង លោក មិន អ៊ុងលាំង មេដឹកនាំរបបសឹកភូមា គឺផ្តោតលើផែនការសន្តិភាពអាស៊ាន និងជំនួយមនុស្សធម៌។
យោងតាមប្រព័ន្ធផ្សព្វផ្សាយឯករាជ្យមួយចំនួនរបស់មីយ៉ាន់ម៉ា លោក ប្រាក់ សុខុន ក៏នឹងជួបជាមួយគណបក្សនយោបាយដែលមិនបានបញ្ជាក់ច្បាស់លាស់ផងដែរ ប៉ុន្តែគម្រោងពិភាក្សាជាមួយតំណាងនៃកងទ័ពជនជាតិភាគតិចត្រូវបានលុបចោល។
ទីភ្នាក់ងារសារព័ត៌មាន (AP) បានរាយការណ៍ថា លោក ប្រាក់ សុខុន បានជួបជាមួយមេដឹកនាំរដ្ឋប្រហារនៃរបបសឹក លោក មីន អ៊ុងលាំង និងមន្ត្រីជាន់ខ្ពស់នៃរបបនេះនៅរដ្ឋធានីណៃពិដោរ។ ពួកគេបានជជែកគ្នាអំពីការអនុវត្តផែនការកុងសង់ស៊ីស ៥ចំណុចរបស់អាស៊ាន ព្រមទាំងលក្ខខណ្ឌនានាសម្រាប់ការផ្តល់ជំនួយមនុស្សធម៌ និងកិច្ចសហការជាមួយអាស៊ាន។ ក៏ប៉ុន្តែ ក្រុមប្រឆាំងនឹងរបបសឹកភូមា ឈ្មោះអង្គភាពសម្របសម្រួលការតវ៉ាគ្រប់វិស័យ ដែលមានសមាជិកមកពីអង្គការ៣៦ស្ថាប័ននៅភូមា ដំណើរទស្សនកិច្ចរបស់ប្រេសិតពិសសអាស៊ានរូបនេះ គឺប្រៀបបាននឹងទៅជួបជាមួយក្រុមភេរវករ។
បើតាមក្រុមនេះ ដំណើរទស្សនកិច្ចរបស់លោក ប្រាក់ សុខុន ធ្វើឡើងផ្ទុយពីឆន្ទៈរបស់ប្រជាពលរដ្ឋភូមា ហើយកំពុងតែទាត់ចោលនូវលទ្ធផល និងការស្នើឡើងរបស់ក្រុមរដ្ឋមន្ត្រីការបរទេសអាស៊ានដែលបានស្នើឱ្យប្រេសិតពិសេសអាស៊ានជួបប្រជុំផ្លូវការជាមួយគ្រប់ភាគីពាក់ព័ន្ធក្នុងវិបត្តិភូមា រួមទាំងរដ្ឋាភិបាលរួបរួមជាតិភូមាផង។
ទោះជាយ៉ាងណា ក្រសួងការបរទេសកម្ពុជា កាលពីថ្ងៃទី១៨ ខែមីនា គូសបញ្ជាក់ថា ដំណើរទស្សនកិច្ចលើកដំបូងប្រេសិតពិសេសនេះ មានគោលបំណងដើម្បីបង្កើតលក្ខខណ្ឌអំណោយផលឈានទៅដល់ការបញ្ចប់អំពើហិង្សា និងការអត់ធ្មត់ខ្ពស់បំផុតរបស់គ្រប់ភាគីភូមាទាំងអស់។ ក្រៅពីនេះ ក៏មានគោលដៅចែកចាយជំនួយមនុស្សធម៌ និងលើកទឹកចិត្តឱ្យមានកិច្ចពិគ្រោះយោបល់ និងកិច្ចសន្ទនានយោបាយក្នុងចំណោមគ្រប់ភាគីពាក់ព័ន្ធទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ