តំណាងឲ្យអាស៊ាន៖កម្ពុជាស្នើមេដឹកនាំយោធាបង្កើតច្រករបៀងមនុស្សធម៌សម្រាប់នាំជំនួយជូនប្រជាជនភូមា
លោកប្រាក់ សុខុន ក្នុងឋានៈជាប្រេសិតពិសេសអាស៊ានបានដល់ប្រទេសកម្ពុជាវិញហើយនៅថ្ងៃទី២៣មីនានេះ ក្រោយបញ្ចប់បេសកកម្មកាទូត៣ថ្ងៃនៅក្នុងប្រទេសភូមា។ បន្ទាប់ពីដាក់ជើងជាន់ដីកម្ពុជាភ្លាមលោក ប្រាក់ សុខុន បានប្រាប់អ្នកកាសែតភ្លេតថា លោកបានស្នើសុំបីចំណុចទៅកាន់មេដឹកនាំយោធាភូមាដើម្បីបន្ថូរភាពតានតឹងនៅទីនោះ។ ចំណុចមួយក្នុងចំណោមសំណើរបីចំណុចនោះ គឺលោកប្រេសិតបានសង្កត់ធ្ងន់ដោយស្នើឲ្យមេដឹកនាំយោធាបង្កើតច្រករបៀងមនុស្សធម៌សម្រាប់ប្រជាជនភូមា។ ប្រជាជនភូមាដែលកំពុងជួបបញ្ហាជីវភាពខ្វះខាត ដោយសារអស្ថិរភាពនយោបាយ ក្នុងប្រទេសជាងមួយឆ្នាំក្រោយរដ្ឋប្រហារយោធា។
ចុះផ្សាយនៅថ្ងៃ៖
ស្តាប់ - ០១:៥០
នៅចំពោះមុខមេដឹកនាំយោធាលោក មីន អ៊ុងឡាំង លោកប្រាក់ សុខុន បានលើកឡើងថា ក្នុងនាមជាប្រេសិតអាស៊ានលោកចង់ឃើញការអនុគ្រោះពីរបបសឹកសម្រាប់ការដឹកជញ្ជូនជំនួយមនុស្សធម៌ប្រកបដោយសុវត្ថិភាពដោយគ្មានការរើសអើង និងរារាំង។ លទ្ធភាពដែលអាចដឹកជញ្ជូនជំនួយមនុស្សធម៌ប្រកបដោយសុវត្ថិភាពគឺការបង្កើតច្រករបៀងដោយឡែក ព្រោះបើតាមលោកប្រាក់ សុខុន ទីតាំងខ្លះនៅក្នុងប្រទេសភូមាជំនួយមនុស្សធម៌ពិបាកទៅដល់ ដោយសារតែវាយប្រហារគ្នារបស់ក្រុមពាក់ព័ន្ធនានានៅក្នុងប្រទេសភូមា។
ប្រសិនបើច្រករបៀងសុវត្ថិភាពអាចបង្កើតឡើងបានតាមសំណើររបស់ប្រេសិតអាស៊ានលោកប្រាក់ សុខុន ក៏ចង់ឃើញការភ្ជាប់ទៅជាមួយនូវកម្មវិធីចាក់វ៉ាក់សាំងបង្ការកូវីដ១៩ សម្រាប់ចាក់ជូនប្រជាជនភូមាផងដែរ។ លោកប្រាក់ សុខុន បានគូសបញ្ជាក់ទៀតថា សំណើរនេះទទួលបានការស្វាគមន៍ និងការគាំទ្រពីសំណាក់ក្រុមការងារធ្វើការផ្នែកមនុស្សធម៌ដែរ។
ប៉ុន្តែយ៉ាងណាមិញចំពោះសំណើរដែលស្នើឡើងដោយប្រេសិតអាស៊ាន ឲ្យអាជ្ញាធរភូមាបង្កលក្ខណៈងាយស្រួលសម្រាប់ដឹកជញ្ជូនជំនួយមនុស្សធម៌នេះ មិនទាន់មានការឆ្លើយបែបណានៅឡើយទេពីសំណាក់មេដឹកនាំយោធាភូមាលោក មីន អ៊ុងឡាំង។ តែសម្រាប់ការឆ្លើយតបជារួមចំពោះសំណើរទាំងអំបាលមាណរបស់ប្រេសិតអាស៊ានមេដឹកយោធាទទួលស្ដាប់។
សូមជម្រាបជូនថា កង្វល់របស់ប្រេសិតអំពីឧបសគ្គក្នុងការដឹកជញ្ជូនជំនួយមនុស្សឲ្យទៅដល់ដៃប្រជាជនភូមាដែលត្រូវការជំនួយបន្ទាន់នោះ ធ្វើឡើងស្របនឹងអង្គការសហប្រជាជាតិកាលពីខែមុនបានអំពាវនាវស្វែងរកប្រាក់ជំនួយមនុស្សធម៌ ជាង ៨២៦លានដុល្លារសម្រាប់ជួយប្រជាជនភូមា ជាង ៦លាននាក់ ដែលត្រូវការជំនួយបន្ទាន់បំផុត នៅឆ្នាំ ២០២២។ តាមការវាយតម្លៃរបស់អង្គការសហប្រជាជាតិ នៅក្នុងចំណោមប្រជាជនភូមាសរុប ៥៤លាននាក់ មានប្រជាជនភូមា ចំនួនពាក់កណ្តាលកំពុងរស់នៅក្នុងភាពក្រីក្រ និងមនុស្សជាង ១៤,៤លាននាក់ ត្រូវការជំនួយមនុស្សធម៌ ដែលនៅក្នុងនោះ ៥លាននាក់ជាកុមារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ