សាលាក្រុងចោទថា កូដករកំពុងបំពានច្បាប់ ក្រោយប្រើអំពើហឹង្សា និងរបួសស្នាមមកលើសមត្ថកិច្ច
សាលាក្រុងភ្នំពេញកាលពីម្សិលមិញ បានចោទប្រកាន់មកលើក្រុមកូដកររបស់ក្រុមហ៊ុនណាហ្គាវើលដ៍ថា បានបង្កជារបួសស្នាម និងប្រើពាក្យអសុរោះ មកលើអាជ្ញាធរមានសមត្ថកិច្ចដែលកំពុងបំពេញភារកិច្ចការពារសន្តិសុខ និងសណ្តាប់ធ្នាប់។ សកម្មភាពនេះ ត្រូវសាលាក្រុងភ្នំពេញចាត់ទុកថា ក្រុមកូដករកំពុងបំពានមកលើច្បាប់បន្ថែមទៀត ក្នុងរូបភាពបម្រើមហិច្ឆតារបស់ខ្លួន។ ក៏ប៉ុន្តែលោក ឃុន ថារ៉ូ អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស របស់អង្គការសង់ត្រាល់ បានកត់សំគាល់ថា ការចោទប្រកាន់គ្រប់បែបយ៉ាង ពីអាជ្ញាធរនេះមិនមែនជារឿងចម្លែក និងថ្មីនោះទេ។
ចុះផ្សាយនៅថ្ងៃ៖
ស្តាប់ - ០២:៥៥
នេះមិនមែនជារឿងថ្មី និងលើកទី១នោះទេ ដែលសាលាក្រុងភ្នំពេញបានចេញសេចក្តីប្រកាសព័ត៌មានស្រាយបំភ្លឺទៅកាន់សាធារណជន ជុំវិញករណីអំពើហឹង្សាដែលកើតមានឡើងរវាងបុគ្គលិកក្រុមហ៊ុនណាហ្គាវើលដ៍ និងកងកម្លាំងសមត្ថកិច្ច។
ជាក់ស្តែង កាលពីថ្ងៃទី២៣ មីនា សាលាក្រុងភ្នំពេញបានចេញសេចក្តីប្រកាសព័ត៌មានចំនួន២សន្លឹក ដោយបានចោទប្រកាន់បុគ្គលិកណាហ្គាវើលដ៍ ថាបានសម្តែងមតិខុសច្បាប់នៅតាមទីសាធារណៈ និងផ្ទុយពីការណែនាំរបស់អាជ្ញាធរ។ សាលាក្រុងភ្នំពេញ ក៏បានបញ្ជាក់ទៀតថា ខ្លួនមានការសោកស្តាយចំពោះសកម្មភាពមិនគោរពវិធានការរដ្ឋបាល វិធានការច្បាប់ និងវិធានអប់រំនានារបស់អាជ្ញាធរទៅកាន់ក្រុមកូដករ។ ក៏ប៉ុន្តែ កូដករនៅតែបន្តបំពានសកម្មភាពច្បាប់ និងដើម្បីកេងចំណេញរូបភាពបម្រើមហិច្ឆតារបស់ក្រុមខ្លួន និងរហូតឈានដល់សម្តែងធ្វើជាជនរងគ្រោះ។ នេះជាការបញ្ជាក់បន្ថែមពីសាលាក្រុងភ្នំពេញ។
លើសពីនេះ សាលាក្រុងក៏បានចោទប្រកាន់មកលើក្រុមកូដករថា ពួកគេបានបង្កជារបួសស្នាម បង្ហាញកាយវិការមិនសមរម្យ ប្រើប្រាស់ពាក្យអសុរោះ មកលើអាជ្ញាធរថែមទៀត។ សកម្មភាពទាំងអស់នេះ អាជ្ញាធរចាត់ទុកថា ធ្វើឡើង ដើម្បីបញ្ជោះកំហឹងរបស់សមត្ថកិច្ច ក្នុងការត្រៀមចាំផ្តិតយករូបភាពផ្សេងៗទុកធ្វើការចោទប្រកាន់មកលើអាជ្ញាធរជាដើម។ បើតាមសេចក្តីបញ្ជាក់ពីសាលាក្រុង អាជ្ញាធរមិនបានប្រើប្រាស់អំពើហឹង្សាទៅលើកូដករនោះទេ ពោលគឺ អាជា្ញធរគ្រាន់តែកូដករឡើងឡាន ដើម្បីទៅធ្វើការសម្តែងមតិនៅទីលានប្រជាធិបតេយ្យប៉ុណ្ណោះ។
ក្រោយការចេញមុខស្រាយបំភ្លឺពីសំណាកភាគីអាជ្ញាធរនាពេលនេះ លោក ឃុន ថារ៉ូ អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស របស់អង្គការសង់ត្រាល់ បានបញ្ជាក់ប្រាប់វិទ្យុបារាំងអន្តរជាតិថា លោកមិនចំឡែកនោះទេ ចំពោះការចោទប្រកាន់របស់សាលាក្រុងភ្នំពេញមកលើក្រុមកូដករ ពីព្រោះជាទម្លាប់របស់អាជ្ញាធរទៅហើយ។ លោកបន្តថា ទោះបីអាជ្ញាធរចោទប្រកាន់យ៉ាងណាក្តី សាធារណជនបានឃើញនូវរូបភាព និងវីឌីអូផ្សព្វផ្សាយយ៉ាងព្រោងព្រាតជុំវិញសកម្មភាពប្រើប្រាស់អំពើហឹង្សាមកលើកូដកររួចទៅហើយ។
លោក ឃុន ថារ៉ូបន្តថា អាជ្ញាធរកំពុងដើរខុសពីតួនាទី និងការអនុវត្តច្បាប់របស់ខ្លួនចំពោះការរារាំងការធ្វើកូដកម្មដោយសន្តិវិធីរបស់កូដករ។ បើតាមសិទ្ធិការងារ កូដករមានសិទ្ធិធ្វើកូដកម្មដោយសន្តិវិធីនៅមុខកន្លែងធ្វើការ ដោយមិនរងការចោទប្រកាន់ខុសច្បាប់ណាមួយនោះទេ។ មន្ត្រីសិទ្ធិមនុស្សរូបនេះបញ្ជាក់ទៀតថា កូដករគួរតែដាក់ពាក្យបន្តឹងទៅលើបុគ្គលដែលពាក់ឯកសណ្ឋានស៊ីវិល ចូលមកប្រើប្រាស់អំពើហឹង្សាមកកូដករជាដើម។
ជុំវិញរឿងនេះដែរ កូដករមួយរូបសុំមិនបញ្ចេញឈ្មោះបានប្រាប់ឱ្យវិទ្យុបារាំងអន្តរជាតិដឹងថា ការចោទប្រកាន់របស់អាជ្ញាធរជាហូរហែមកលើកូដករ គឺមិនមានភស្តុតាងណាមួយច្បាស់លាស់នោះទេ ខណៈអាជ្ញាធរវិញបានប្រើប្រាស់ពាក្យអសុរោះ និងមិនគប្បីជាច្រើនមកលើកូដករដែលជាស្ត្រី ជាពិសេសការបៀតបៀនរូបរាងកាយជាដើម។ កូដករដែលសុំមិនបញ្ចេញឈ្មោះខាងលើបន្តថា សកម្មភាព និងពាក្យសម្តីរបស់កូដករ គឺធ្វើត្រាប់តាមទង្វើនិងសកម្មភាពរបស់អាជ្ញាធរតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ