អ្នកការពារព្រៃឈើស្នើរដ្ឋាភិបាលបង្កើនការរក្សាគម្របព្រៃឈើឲ្យបាន៦០%នៅឆ្នាំ២០៣០
អង្គការ និងសមាគមចំនួន២២ស្នើឲ្យរដ្ឋាភិបាល តាមរយៈក្រសួងពាក់ព័ន្ធ អនុវត្តការប្តេជ្ញាចិត្តរបស់ខ្លួន ដូចមានចែងក្នុងកម្មវិធីព្រៃឈើជាតិពីឆ្នាំ២០១០ដល់ឆ្នាំ២០២៩ និងការសន្យាជាមួយអង្គការសហប្រជាជាតិ ក្នុងការរក្សាគម្របព្រៃឈើនៅកម្ពុជាឲ្យបាន៦០%នៅឆ្នាំ២០៣០។ ការស្នើនេះធ្វើឡើងតាមរយៈការដាក់ញត្តិរបស់សកម្មជនព្រៃឈើនៅថ្ងៃអង្គារនេះទៅកាន់ក្រសួងកសិកម្ម និងក្រសួងបរិស្ថាន។
ចុះផ្សាយនៅថ្ងៃ៖
ស្តាប់ - ០២:១០
ដោយបង្ហាញពីការព្រួយបារម្ភពីការរឹតត្បិតសេរីភាពប្រជាពលរដ្ឋក្នុងការចូលរួមល្បាតព្រៃឈើ ក្រុមសកម្មជនបរិស្ថានកត់សំគាល់ថា គម្របព្រៃឈើនៅកម្ពុជាបានបាត់បង់ជាបន្តបន្ទាប់យ៉ាងឆាប់រហ័សពីជាង៦០%នៅឆ្នាំ២០០២ មកសល់តែជាង៤៦%នៅឆ្នាំ២០១៨។
ការបាត់បង់គម្របព្រៃឈើយ៉ាងគំហុកនេះត្រូវបានសកម្មជនព្រៃឈើអះអាងថា កើតឡើងស្របពេលដែលមានការរឹតត្បិតសេរីភាព ចំពោះការចូលរួមការពារព្រៃឈើ និងធនធានធម្មជាតិដោយស្ម័គ្រចិត្ត ដ៏ដូចជាការល្បាតព្រៃរបស់បណ្តាញសហគមន៍ព្រៃឡង់ សហគមន៍ព្រះរកា និងសកម្មជនព្រៃឈើ។
យោងតាមរបាយការណ៍ នៅឆ្នាំ២០២១ គម្រប់ព្រៃឈើជាង៦,២៧១ហិកតាត្រូវបានកាប់បំផ្លាញក្នុងដែនជម្រកសត្វព្រៃ«ព្រៃឡង់ និងដែនជម្រកសត្វព្រៃព្រះរកា»។ ដោយឡែករបាយការណ៍មួយទៀតបានអះអាងថាគម្របព្រៃឈើក្នុងដែនជម្រកសត្វព្រៃទាំងនេះគឺបានបាត់បង់ប្រមាណ១ម៉ឺនហិកតានៅឆ្នាំ២០២០។ នេះជាទិន្នន័យថ្មីបំផុតដែលបានរកឃើញបន្ទាប់ពីគំនិតផ្តួចផ្តើមសកលប្រឆាំងឧក្រិដ្ឋកម្មឆ្លងដែន បានចុះផ្សាយកាលពីឆ្នាំ២០២១ពីការបាត់បង់គម្របព្រៃឈើក្នុងទំហំ៥៥៧.០០០ហិកតា ស្មើនឹង១១,៧% នៃតំបន់ការពារធម្មជាតិរបស់កម្ពុជាចន្លោះឆ្នាំ២០០១ និងឆ្នាំ២០១៨។
នៅចំពោះមុខនៃការបាត់បង់គម្របព្រៃឈើនេះ អង្គការ និងសមាគមចំនួន២២ស្នើឲ្យរដ្ឋាភិបាល តាមរយៈក្រសួងកសិកម្ម និងក្រសួងបរិស្ថាន អនុវត្តការប្តេជ្ញាចិត្តរបស់ខ្លួន ដូចមានចែងក្នុងកម្មវិធីព្រៃឈើជាតិពីឆ្នាំ២០១០ដល់ឆ្នាំ២០២៩ និងការសន្យាជាមួយអង្គការសហប្រជាជាតិ ក្នុងការរក្សាគម្របព្រៃឈើនៅកម្ពុជាឲ្យបាន៦០%នៅឆ្នាំ២០៣០។
ប៉ុន្តែបើតាមក្រុមអង្គការទាំងនេះ កម្ពុជាបានខកខាន មិនបានបំពេញតាមសូចនាករណ៍គោលដៅអភិវឌ្ឍសហវត្សរបស់កម្ពុជាដែលមានគោលដៅរួម លុបបំបាត់ភាពក្រីក្រ ការធានានិរន្តរភាពបរិស្ថាន និងការរក្សាគម្របព្រៃឈើឲ្យបាន៦០%តាំងពីឆ្នាំ២០១៥។ និន្នាការនេះ បង្កឲ្យមានការព្រួយបារម្ភចំពោះការខកខានម្តងទៀត ក្នុងការបង្កើនគម្របព្រៃឈើឲ្យបាន៦០% នៃផ្ទៃដីសរុបរបស់កម្ពុជា នៅត្រឹមឆ្នាំ២០២៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ